Հայաստանի վարչապետը խոսել է պետական համակարգում աշխատանքից ազատման ալիքի մասին՝ իր մասնակցությամբ տեսանյութի արտահոսքից հետո
Ապրիլի 19–ի ուշ երեկոյան Հայաստանի վարչապետը պետական ապարատից աշխատանքից հեռացման նոր ալիքի մասին է հայտարարել ֆեյսբուքյան իր էջում։ Միաժամանակ Փաշինյանն ընդգծել է, որ կատարում է 2018 թ–ի «թավշյա» հեղափոխության ժամանակ տված իր խոստումը։ Դրանից հետո իշխանության եկած վարչապետը կրկին պնդում է, որ «վենդետա և կադրային ջարդ» չի լինելու, սակայն հեռանալու են «նախորդներից» նրանք, ովքեր չեն գիտակցել իրենց ընձեռնված հնարավորությունը։
Վարչապետի վերջին ելույթը սոցցանցում տեղի է ունեցել մի տեսագրության հետ կապված սկանդալի ֆոնին, որը մոնտաժվել է ապրիլի 17–ի նրա մասնակցությամբ հեռուստատեսային ուղիղ եթերին նախապատրաստման կադրերից։ Այդ օրը Փաշինյանն ուղերձով դիմեց երկրի բնակիչներին՝ պատմելու համար կորոնավիրուսի դեմ պայքարի և կառավարության քայլերի մասին, որոնք ուղղված են չեզոքացնելու տնտեսության կորուստները։ Ուղերձի տեսագրման պարտավորությունը դրված էր Առաջին ալիքի՝ Հայաստանի հանրային հեռուստաընկերության վրա։ Սակայն այն հեռարձակել են նաև այլ ալիքներ։
Եթերին նախապատրաստվելու կադրերը, որոնք մոնտաժվել են որոշակի ծաղրանքով, համացանցում են հայտնվել և ակտիվորեն սկսել են քննարկվել ողջ հասարակության կողմից։ Տեսանյութում Փաշինյանը կատակում է, շշից խմում, դեղ ընդունում և հազում։
Տեսագրության տարածմանը սկզբից կոշտ արձագանքել է վարչապետի մամուլի խոսնակն՝ Առաջին ալիքին մեղադրելով ոչ պրոֆեսիոնալիզմի և «թափթփված» աշխատանքի համար։ Դրան հետևել են հեռուստաալիքի պարզաբանումները․ հեռարձակման նախապատրաստական կադրերը հասանելի են եղել նաև մյուս հեռուստաալիքներին, որոնք հեռարձակել են վարչապետի ուղերձը։
Տեսանյութն առաջացրել է և իշխող կուսակցության, և ընդդիմության պատգամավորների, և օմբուդսմենի վրդովմունքը։
Համաճարակ, արտակարգ դրություն Երևանում, ի՞նչ տեսք ունի այն։ Տեսանյութ
Ի՞նչ է ասում Առաջին ալիքը
Ապրիլի 18–ի երեկոյան հեռուստաալիքի ֆեյսբուքյան պաշտոնական էջում հայտարարություն է հայտնվել․ հանրային հեռարձակողը կադրերի արտահոսքի հետ որևէ կապ չունի։ Կառավարության պնդմամբ հեռարձակումը հասանելի է եղել նաև 8 այլ հեռուստաընկերությունների։
«Բոլոր վերահեռարձակող հեռուստաընկերությունները եթերին նախապատրաստվելու համար ստանում են այդ տեխնիկական տեսաազդանշանը՝ ուղիղ եթերի հեռարձակմանը նախապատրաստվելու համար: Այսինքն ՀՀ վարչապետի եթերը վերահեռարձակող բոլոր հեռուստաընկերություններն էլ ստացել են այդ տեխնիկական տեսաազդանշանը: Հանրային հեռուստաընկերությունից որևէ տեսանյութի արտահոսք չի եղել․․․Եթերից առաջ հեռուստաընկերության աշխատակիցը ներկաներին բարձրաձայն տեղեկացրել է ՝ մենք ձայնագրման փուլում ենք: Սա պարտադիր ընթացակարգ է», — ասված է հայտարարությունում։
Կատարվածի մասին խոսել է նաև հեռուստաընկերության՝ այդ հեռարձակման պատասխանատու աշխատակից Վարդան Հակոբյանը։ Ֆեյբուքյան իր էջում նա գրել է, որ ինքն ու մամուլի քարտուղարը գտնվել են միևնույն սենյակում, և ինքն անձամբ է նրան հաղորդել հեռարձակման մեկնարկի մասին։ Սակայն վարչապետին ինքը չի հաղորդել հեռարձակման մասին, քանի որ դա իր պարտականությունների մեջ չէր մտնում։
Վարչապետի աշխատակազմն ադեկվատ բացատրությունների է սպասում
Հանրային հեռարձակողի հայտարարությունը չի բավարարել վարչապետի մամուլի քարտուղար Մանե Գևորգյանին։
Ֆեյսբուքյան իր էջում նա անդրադարձել է եթերին մյուս հեռուստաալիքների միացման թեմային։ Նրա կարծիքով՝ մյուս հեռուստաալիքներին հեռարձակումը պետք է հասանելի դառնար եթեր դուրս գալուց ընդամենը մի քանի վայրկյան, «այլ ոչ թե 5, 10, 15 կամ 20 րոպե» առաջ։
Ըստ մամուլի քարտուղարի՝ կառավարության լրատվական ծառայությանը տեղեկացվել է, որ նախքան վարչապետի ուղերձի մեկնարկը եթերում լինելու է միայն լուսանկար։
«Տեղի ունեցածը վկայում է, որ փորձնական հեռարձակումը այլ հեռուստաընկերություններին հասանելի դարձնելը ոչ պրոֆեսիոնալիզմի արդյունք է, քանզի ոլորտի սկսնակ մասնագետներն էլ տեղյակ են, որ հեռարձակումը փորձարկում են նախապես, մինչև վարչապետին տեսախցիկի առաջ հրավիրելը։
Խիստ թափթփված աշխատելաոճի վկայություն է նաև վարչապետին տեղյակ չպահելը, որ նա եթերում է՝ թեկուզ փորձնական։ Վարչապետի աշխատակազմը պատշաճ պարզաբանումներ է ակնկալում հեռուստաընկերությունից տեխնիկական փորձի կադրերի արտահոսքի վերաբերյալ»։
«Թավշյա» հեղափոխությունից հետո հայկական լրատվամիջոցներում ժամանակ առ ժամանակ հոդվածներ են հայտնվում Հանրային հեռուստաընկերության գործադիր տնօրեն Մարգարիտա Գրիգորյանի և նոր իշխանությունների միջև ոչ լիարժեք ըմբռնումների վերաբերյալ։
Բանն այն է, որ նա հեռուստաալիքի ղեկավարն է եղել դեռ նախորդ իշխանությունների օրոք, իսկ ընդդիմադիր Նիկոլ Փաշինյանը բազմիցս քննադատել է Հանրային հեռուստատեսությանը ոչ կոռեկտ տեղեկատվություն տարածելու համար։ Հեղափոխությունից հետո հեռուստաալիքում լուրջ կադրային փոփոխություններ են տեղի ունեցել, սակայն Մարգարիտա Գրիգորյանին հաջողվել էր պահպանել իր պաշտոնը։
Վարչապետի արձագանքը
Նիկոլ Փաշինյանն ապրիլի 19–ին՝ կեսգիշերին մոտ, ուղիղ եթեր է մտել իր ֆեյսբուքյան էջից։ Տեսաուղերձն էմոցիոնալ էր։ Թեմաներից մեկը չարաբաստիկ հոլովակն էր։ Ըստ Փաշինյանի՝ մարդիկ դադարել են վախենալ, որ իրենց բառի բուն իմաստով կբռնեն, կծեծեն կամ կսպանեն նման արարքների համար։
«Նախորդ իշխանությունների օրոք մարդիկ վախենում էին վիրավորել՝ վախենալով իրենց կյանքի և առողջության համար։ Այսօր չկան այդ քրեական խմբավորումները, թաղային հեղինակությունները, որոնց իշխանություններն իրենց կողքն էին պահում բնակչությանն ահաբեկելու համար։ Այսօր բոլորը գիտեն, որ մենք նման բանի չենք գնա, այդ պատճառով էլ լկտիացել են։ Նրանք ուզում են այնպես անել, որ մեր մասին մտածեն որպես կամազուրկ անողնաշար իշխանության։ Նրանք ուզում են մեզ ափերից հանել, սակայն մենք այդ ճանապարհով չենք գնալու»։
Վարչապետը հայտարարել է, որ ժամանակն է վերանայել կադրերը ու պետական ապարատում աշխատանքից ազատման նոր ալիք սկսել․
«Մենք ասել ենք, որ վենդետա չի լինելու, լինելու է սիրո և համերաշխության հեղափոխություն։ Կադրային ջարդ չի լինելու։ Եվ մենք պահել ենք մեր խոստումը։ Եվ ճիշտ ենք արել, որ պահել ենք։ Արդյո՞ք մենք տուժել ենք դրանից։ Այո։
Կադրային զտումներ չեն լինելու, սակայն «թավիշը» չարաշահողները պետք է մաքրվեն։ Մարդիկ, որոնք չարաշահել են ստացած շանսը․․․ պետք է մաքրվեն պետական կառավարման համակարգից։ Այն, ինչ տեղի է ունեցել 2018 թ–ին, էմոցիաներ էին։ Իսկական հեղափոխությունը հիմա է տեղի ունենում»։
Իշխող կուսակցության արձագանքը
Իշխող «Իմ քայլը» խմբակցության առաջնորդ Լիլիթ Մակունցը հայտարարել է, որ իշխող քաղաքական ուժը պարզաբանումներ է սպասում նրանցից, ովքեր պատասխանատու են վարչապետի եթերին նախապատրաստվելու կադրերի տարածման համար․
«Այն, ինչ տեղի է ունեցել, անընդունելի է մեր խմբակցության համար․․․ Մեր դիրքորոշումն այդ առումով բավականին կոշտ և վճռական է»։
Իշխող մեծամասնությունը կատարվածը կապում է տեղեկատվական անվտանգության հետ։ Ըստ խմբակցության ղեկավարի՝ վարչապետը կարող էր նախադասություն կամ արտահայտություն անել, որոնք ոչինչ չեն ասում ներկաներին, սակայն դա կարող էր անվտանգության լուրջ խնդիր դառնալ։
Այդ առնչությամբ «Իմ քայլն» ակնկալում է, որ մեղավորներն անհապաղ կհայտնաբերվեն և կպատժվեն։
Օմբուդսմենի արձագանքը
Օմբուդսմեն Արման Թաթոյանը համացանցում հայտնված հոլովակը գնահատել է որպես վարչապետին ծաղրելու հակաբարոյական փորձ․
«Հանրային գործչի, ընդդիմախոսի կամ նույնիսկ քաղաքական ընդդիմադիրի կամ ընկերոջ ու ազգականի նկատմամբ այսպիսի վերաբերմունքը կամ արձագանքն անընդունելի է: Մենք պետք է առաջնորդվենք մեր պետության ու ժողովրդի խոհրդանիշների նկատմամբ բարձր հարգանքով՝ նախագահից ու վարչապետից, Հայ առաքելական եկեղեցուց ու վեհափառ հայրապետից սկսած: Հակառակ դեպքում մենք չենք ունենա ո՛չ ներդաշնակություն մեր հանրային կյանքում, ո՛չ էլ համերաշխություն ու խաղաղություն սերունդների միջև»։
