Հայաստանը հումանիտար առաքելություն կուղարկի Սիրիա

Հայաստանը մոտ ապագայում հումանիտար առաքելություն կուղարկի Սիրիա։ Ծրագիրն իրականացվում է ռուսական կողմի հետ համատեղ։

Ո՞ւմ են Սիրիա ուղարկում

Սիրիա կմեկնի մոտ 100 մասնագետ, որոնց թվում կլինեն՝ ռազմական բժիշկներ, սակրավորներ, ինչպես նաև խումբ, որը կոչված է ապահովել նրանց անվտանգությունը։

Դեռ հայտնի չէ, թե առաքելությունը երբ կմեկնի Սիրիա։ Սակայն, դատելով Հայաստանի ղեկավարության հայտարարություններից, դա տեղի կունենա մոտ ժամանակներս։

• Տագնապ Պանկիսիի կիրճում․սիրիական պատերազմի արձագանքը Վրաստան է հասել

• Ճգնաժամ Սիրիայում․ աշխարհը՝ հանգուցալուծման սպասելիս

• Ռուսաստանի բիզնես-շահերը Սիրիայում

Հայ մասնագետներին ուղարկելու նպատակը

Հայաստանի ղեկավարությունն ամեն կերպ ընդգծում է, որ խումբը Սիրիա է մեկնում բացառապես խաղաղ նպատակներով։ Երկրի վարչապետի պաշտոնակատար Նիկոլ Փաշինյանը նախօրեին հայտարարել է, որ խմբի հիմնական նպատակը հայկական համայնքին օգնելն է, որպեսզի այն վերադառնա խաղաղ կյանքի․

«Դա բացառապես հումանիտար ծրագիր է, և ոչ մի ռազմական նշանակություն չունի։ Մենք մտադիր ենք այդ ծրագիրն իրականացնել Հայաստանի բյուջետային հնարավորությունների շրջանակում»։

Փաշինյանը հայտարարել է նաև, որ Հայաստանի կառավարությունը միջազգային կազմակերպությունների և առանձին պետությունների մոտ բարձրացրել է ականազերծման և հայրենակիցներին հումանիտար օգնություն ցուցաբերելու հարցերը․

«Քննարկումների արդյունքում ծագել է գաղափար, որ քանի որ իրավիճակը Սիրիայում փոխվել է, փոխվում է, որ պետք է պատրաստվել խաղաղ կյանքի, պատրաստել խաղաղ կյանքի նաև Հալեպի մեր համայնքը»։

Արձագանքը՝ Սիրիա հայկական առաքելություն գործուղելուն

Հայ-ռուսական համատեղ հումանիտար առաքելությունը Սիրիա գործուղելու մտադրության մասին Նիկոլ Փաշինյանը հայտարարել է սեպտեմբերին՝ Ռուսաստանի նախագահ Վլադիմիր Պուտինի հետ հանդիպումից հետո։

Հայաստան կատարած այցի ընթացքում ծրագիրը մեկնաբանեց ԱՄՆ նախագահ Դոնալդ Թրամփի անվտանգության հարցերով խորհրդական Ջոն Բոլթոնը։ Նա հայտարարեց, որ առաքելությունը չպետք է օգնություն ցուցաբերի ահաբեկիչներին կամ իշխանություններին․

«ԱՄՆ-ն նույնպես հումանիտար աջակցություն է ցուցաբերում Սիրիային։ Դա չպետք է ազդի քաղաքական հարաբերությունների վրա՝ մի կողմից, ռեժիմի վրա, մյուս կողմից, ահաբեկիչների»։

Պատերազմը Սիրիայում

Քաղաքացիական պատերազմը Սիրիայում սկսվել է 2011թ-ին, երբ գրեթե ամբողջ արաբական աշխարհը համակել էր ցույցերի ալիքը: «Արաբական գարունը» հանգեցրեց հեղափոխության Եգիպտոսում, Թունիսում, Յեմենում, քաղաքացիական պատերազմի Լիբիայում:

Երկրում ժողովրդավարական բարեփոխումների անցկացման և նախագահ բաշար Ասադի հրաժարականի պահանջով սկսված զանգվածային ակցիաները Սիրիայում 2011թ-ի ամռանը վերաճեցին լիարժեք քաղաքացիական պատերազմի: Մինչև 2013թ-ը դա կառավարական զորքերի և «Սիրիական ազատ բանակի» միջև դիմակայություն էր, վերջինիս կազմավորումները ղեկավարում էր տեղի ընդդիմությունը միավորած կազմակերպությունը՝ Սիրիական ագային խորհուրդը (ՍԱԽ):

2013թ-ին ընդդիմությունում պառակտում տեղի ունեցավ, և ՍԱԽ-ից անջատվեց մի քանի արմատական իսլամիստական խմբավորում: Նրանք «Իսլամական ճակատ» կազմավորեցին, որի կազմում առավել մասշտաբային խմբավորում դարձավ «Իսլամական պետությունը» (ԻՊ):

2014թ-ին սիրիական հակամարտությանը միջամտեց ԱՄՆ-ն ու նրա դաշնակիցները, իսկ 2015թ-ից ռուսական բանակը սկսեց աջակցություն ցուցաբերել կառավարական զորքերին: Եվ Արևմուտքի, և Ռուսաստանի զորքերն, ըստ պաշտոնական հայտարարությունների, Սիրիայում ներկա էին ահաբեկչական խմբավորումներն, այդ թվում՝ ԻՊ-ն, ոչնչացնելու համար: Սակայն լրատվամիջոցներում բազմիցս տեղեկատվություն է հայտնվել այն մասին, որ ռուսական բանակը հարվածներ է հասցնում ընդդիմադիր ապստամբների դիրքերին:

2018թ-ին ռուսական իշխանությունները հաղորդեցին ԻՊ ջախջախվելու մասին։ Սակայն ապստամբների և կառավարական զորքերի միջև հակամարտությունը չի ավարտվել: Չնայած Վլադիմիր Պուտինի այն պնդումներին, թե ռուսական զորքերը դուրս կբերվեն Սիրիայից, դա դեռ տեղի չի ունեցել:

Պատերազմի ընթացքում մոտ 500 հազար մարդ է սպանվել, ավելի քան 5մլն մարդ փախչել է Սիրիայից: