Կորոնավիրուսի դեպքերի թիվը Հայաստանում անցավ 4 հազարը, մահացել է 3 մարդ

Հայաստանում անցած մեկ օրում գրանցվել է կորոնավիրուսից մահվան երեք դեպք։

«Պացիենտները եղել են 68 (կին), 81 (տղամարդ), 82 (տղամարդ) տարեկան և ունեցել են ուղեկցող խրոնիկական հիվանդություններ», — հաղորդում է առողջապահության նախարարությունը:  

Ընդհանուր առմամբ, կորոնավիրուսային հիվանդությունից գրանցվել է մահվան 52 դեպք։

Մայիսի 15-ի դրությամբ կորոնավիրուսով վարակվածների թիվն ավելացել է 184-ով և հասել 4 044-ի։ Բուժվածների թիվն ավելացել է 94-ով, նրանց ընդհանուր թիվը կազմում է 1 666: Շարունակում են բուժում ստանալ 2 304 մարդ:

• Հայաստանում արտակարգ դրությունը երկարաձգվել է ևս մեկ ամսով, սակայն ձեռնարկությունները շարունակելու են աշխատել
• Քաղաքական գործիչները՝ կորոնավիրուսի մասին։ Ինչո՞ւ է Հայաստանը վարակվածների թվով առաջատարը տարածաշրջանում

Հայաստանում կորոնավիրուսային համավարակի 3-րդ՝ վերջին փուլն է, ասել է առողջապահության նախարարի տեղակալ Լենա Նանուշյանը։

Նրա խոսքով՝ համավարակի առաջին օրերին կարողանում էին հայտնաբերել վարակի աղբյուրը:

«Վերջին օրերին հնարավոր չի լինում պարզել, թե անձը ումից է վարակվել։ Նման դեպքերում հնարավոր չի լինում արդյունավետ իրականացնել համաճարակաբանական բոլոր միջոցառումները։ Բոլոր ջանքերն ուղղում ենք, որպեսզի կարողանանք կառավարել համավարակը»։

Երբ հատուկ վայրերում և հիվանդանոցներում վարակվածներին չեն կարողանա ապահովել բժշկական հսկողությամբ, Լենա Նանուշյանի խոսքով՝  բոլոր թեթև հիվանդներին կթողեն տանը․

«Կապահովենք առողջության առաջնային պահպանման օղակի բժշկական հսկողությամբ»։

Առողջապահության համաշխարհային կազմակերպության կորոնավիրուսի դեմ պայքարի հատուկ հարցերով ներկայացուցիչ Դևիդ Նաբարոն էլ հայտարարել է, որ մարդկանց կյանքն այլևս չի լինի այնպիսին, ինչպիսին COVID-19 կորոնավիրուսի պանդեմիայից առաջ էր։ Նրա խոսքով, մարդկությունը ստիպված կլինի համակերպվել նոր իրավիճակի հետ․

«Մենք կփոխենք մեր վարքագիծը, որպեսզի նվազեցնենք այն սպառնալիքը, որից կախված ենք յուրաքանչյուրս։ Մենք գիտենք, որ որոշ վայրերում դա բարդ կլինի։ Բայց մենք կսովորենք և հանգստանալ, և աշխատել, և շփվել, և ժամանակ անցկացնել մտերիմների հետ։ Փաստացի, այն կդառնա մեր կյանքի մի մասը»։

Դևիդ Նաբարոն կարծում է, որ կորոնավիրուսի տարածումը ամբողջությամբ վերահսկելու համար մարդկությանը կպահանջվի առնվազն հինգ տարի։ Գիտնականները կգտնեն թերապիայի մեթոդներ, սակայն վիրուսը որևէ տեղ չի անհետանա։