«Հայաստանն անկախանում է ՌԴ-ից»․ կարծիք ԱԱԾ բարեփոխումների մասին
Կարծիք ԱԱԾ բարեփոխումների մասին
2024 թ․-ի հունվարի 1-ից դադարել է գործել Հայաստանի ազգային անվտանգության ծառայության քննչական դեպարտամենտը։ Գործառույթները փոխանցվել են Քննչական կոմիտեին։
Հենց այս կառույցն է այսուհետ զբաղվելու պետության և հասարակության անվտանգության դեմ ուղղված հանցագործություններով, այդ թվում՝ պետական դավաճանության, ահաբեկչության նախապատրաստման և ֆինանսավորման դեպքերով։
Փաստաբան Գևորգ Դավթյանի կարծիքով՝ փոփոխությունը կարելի է դրական գնահատել այն դեպքում, եթե դրա նպատակը այլ երկրներից, մասնավորապես՝ Ռուսաստանից կախվածությունը նվազեցնելն է։ Ասում է՝ «թելերը միանգամից կտրելու» պարագայում հնարավոր կլինի ՀՀ ազգային անվտանգությունն ապահովել այնպես, ինչպես նախատեսված է երկրի Սահմանադրությամբ և օրենքներով։
39 քննիչից 17-ն է ցանկացել շարունակել աշխատանքը
Փոփոխության արդյունքում Քննչական կոմիտեին (ՔԿ) է փոխանցվել ԱԱԾ Քննչական գլխավոր վարչության 47 հաստիք, որից 39-ը՝ քննիչի։ Նրանցից միայն 17-ն են ցանկություն հայտնել աշխատանքը կոմիտեում շարունակել։
Քննչական կոմիտեում ձևավորվել է նոր ստորաբաժանում՝ «Պետության սահմանադրական կարգի հիմունքների և հասարակական անվտանգության դեմ ուղղված հանցագործություններով քննության գլխավոր վարչություն»։
ՔԿ նախագահի խորհրդական Գևորգ Բաղդասարյանի փոխանցմամբ՝ վարչությունը նախաքննություն է իրականացնելու հասարակական անվտանգության դեմ ուղղված հանցագործությունների զգալի մասով, այդ թվում՝ ահաբեկչության, պետական դավաճանության, լրտեսության և պետական իշխանության յուրացման։
«Ստորաբաժանման իրավասությանն են վերապահվել նաև կառավարման կարգի դեմ ուղղված հանցագործությունները, որոնք կապված են պետության, պետական սահմանի անվտանգության հետ, օրինակ՝ ապօրինի միգրացիան կամ պետական սահմանն ապօրինի հատելը»,- պարզաբանել է Բաղդասարյանը։
Փորձագիտական կարծիք
Փաստաբան Գևորգ Դավթյանի խոսքով՝ իրավական առումով ոչինչ չի փոխվում, տեխնիկական ձևափոխություններ են արվում․ ԱԱԾ քննչական դեպարտամենտի գործառույթները փոխանցվում են Քննչական կոմիտեին։
Հիշեցնում է՝ Հայաստանի ազգային անվտանգության ծառայությունն իր կառուցվածքը վերցրել է ԽՍՀՄ ժամանակներից։ Բացի այդ՝ ծառայողները ուսում էին ստանում ՌԴ-ում, շատ դեպքերում՝ ՀՀ էին գալիս միայն այնտեղ պարտադիր վերապատրաստումներ անցնելուց հետո։ Շեշտում է՝ Ռուսաստանից կախվածություն կար։
«Կարծես թե նկատվում է անկախության որոշակի էլեմենտ, ՀՀ-ն փորձում է իրավական առումով ամբողջությամբ անկախանալ և ունենալ մարմին, որը երբևէ որևէ փոխկապակցվածություն չի կարող ունենալ այլ երկրի, տվյալ դեպքում՝ ՌԴ հետ»,- 1in.am-ի հետ զրույցում նշել է նա։
Փոփոխության նպատակն, ըստ նրա, այն է, որ այսուհետ Քննչական կոմիտեն լիիրավ, առանց կողմնակի ազդեցության, միայն ՀՀ վերահսկողությամբ իրականացնի ԱԱԾ գործառույթները, մասնավորապես՝ քննի պետության անվտանգության դեմ ուղղված հանցագործությունները։
«2020 թ․-ի 44-օրյա պատերազմից հետո բազմաթիվ անձանց մեղսագրվում էին արարքներ, որոնք վերաբերում էին հենց ազգային անվտանգության դեմ ուղղված հանցագործություններին՝ դիվերսիա, դավաճանություն, գործակալական ցանցեր և այլն»,- ընդգծում է Դավթյանը։
Փաստաբանի փոխանցմամբ՝ եղել են նաև քրեական գործեր, երբ ԱԱԾ համակարգի աշխատակցին մեղադրանք է առաջադրվել, իսկ նա «պաշտպանություն է գտել Ռուսաստանում»։
Գևորգ Դավթյանը լավատես է, որակական փոփոխությունների հույս ունի։
«Իրավական նախադրյալները ստեղծված են, բովանդակային առումով ենթադրվում է, որ մասնագետները կառաջնորդվեն բացառապես ազգային անվտանգության շահերով»,- նկատել է նա։
Հետևեք մեզ — Facebook | Youtube | Telegram
Կարծիք ԱԱԾ բարեփոխումների մասին
