«ԼՂ վտարանդի կառավարության մասին խոսողները սպասարկում են ՌԴ շահերը»․ կարծիք
ԼՂ վտարանդի կառավարություն
Հայաստանի վարչապետ Նիկոլ Փաշինյանն այսօր հայտարարել է՝ Լեռնային Ղարաբաղից բռնի տեղահանված անձանց որոշ շրջանակ «կամա, թե ակամա անում է գործողություններ և քայլեր, որոնք սպառնալիք են ստեղծում Հայաստանի ազգային անվտանգության համար»։
«Հայտարարում են ինչ-որ վտարանդի կառավարությունների և այլնի մասին։ Ես ուզում եմ շատ հստակ հայտարարել, որ բոլորի համար պարզ լինի` ՀՀ-ում կա մեկ կառավարություն, և այդ կառավարությունը նստած է այս դահլիճում»,- գործադիրի նիստում շեշտել է նա։
Փորձագետները նկատում են՝ վարչապետն այս կերպ արձագանքում է ԼՂ-ի նախկին նախագահ Սամվել Շահրամանյանին։ Վերջինս ֆրանսիական Le Figaro-ին տված հարցազրույցում ասել է, թե Երևանի այն շենքում, որտեղ ընդունել է լրագրողին, գտնվում են Արցախի նախագահի և մյուս պետական կառույցների գրասենյակները։
Քաղաքագետ Արեգ Քոչինյանը կիսում է վարչապետ Փաշինյանի գնահատականը։ Ասում է՝ վտարանդի կառավարության մասին խոսույթը կարող է վտանգել հայ-ադրբեջանական բանակցային գործընթացը, հետևաբար՝ նաև Հայաստանի խաղաղությունն ու ազգային անվտանգությունը։
«Այդ մարդիկ, ովքեր խոսում են վտարանդի կառավարություններից, Արցախի շարունակականությունից և այլն, կամա, թե ակամա սպասարկում են Ռուսաստանի շահերը»,- JAMnews-ի հետ զրույցում ընդգծել է նա։
Ի՞նչ է հայտարարել Փաշինյանը
Կառավարության ղեկավարն ասել է, որ բացի Հայաստանի Հանրապետության կառավարությունից երկրում որևէ այլ կառավարություն չի եղել, չկա և գոյություն ունենալ չի կարող։
Փաշինյանի խոսքով՝ պետության նկատմամբ նման գործողությունները չեն կարող անարձագանք մնալ։ Ասում է՝ անհրաժեշտության դեպքում պետք է ձեռնարկվեն համապատասխան քայլեր, որպեսզի որոշ շրջանակներ ՀՀ անվտանգության համար սպառնալիք ստեղծելու նպատակով չօգտագործվեն, այդ թվում՝ «արտաքին ուժերի» կողմից։
Շեշտել է՝ «վտարանդի կառավարության» մասին ուղերձներով հանդես եկողներն ունեցել են «պատասխանատվությամբ հանդես գալու հնարավորություն»։
«Եվ տեսել ենք՝ ինչ են արել այդ հնարավորության հետ»,- ասել է նա։
«Կամավոր հիմունքներով պաշտոնավարում են»․ ԼՂ նախկին նախագահ
Ֆրանսիական Le Figaro-ի թղթակիցը Արցախի նախկին նախագահ Սամվել Շահրամանյանին հարցրել է՝ գոյություն ունի՞ արդյոք վտարանդի պետություն և կառավարություն։ Ի պատասխան Շահրամանյանն ասել է․
«Այո, այն շենքում, որտեղ ես հյուրընկալում եմ ձեզ Երևանում, գտնվում են Արցախի նախագահի գրասենյակը և դատական ու օրենսդիր կառույցների գրասենյակները։ Խորհրդարանականները կարող են հավաքվել այստեղ՝ քվեարկելու համար։ Հոկտեմբերին ստորագրել եմ հրամանագիր, որով սահմանվում է, որ կառավարության բոլոր նախարարները մնում են իրենց պաշտոններում կամավոր հիմունքներով»։
2023 թ․-ի սեպտեմբերին Ադրբեջանի ձեռնարկած ռազմական գործողություններից հետո ստեղծված իրավիճակում արցախցիների վերադարձը ԼՂ անիրատեսական է համարել։ Նկատել է՝ տարիներ կպահանջվեն, որպեսզի հարևանների միջև խաղաղ գոյակցությունը հնարավոր դառնա։
Անդրադարձել է նաև Հայաստանի հայերի խնդիրներին ու հարց ուղղել․
«Ինչպե՞ս կարող են Երևանի իշխանությունները իրենց երկիրն անվտանգ համարել, երբ նրա տարածքի որոշ հատվածներ արդեն օկուպացված են ադրբեջանցիների կողմից, իսկ Բաքվի առաջնորդները հրապարակայնորեն հայտարարում են մյուս տարածքների նկատմամբ իրենց իրավունքների մասին»։
Փորձագիտական կարծիք
Քաղաքագետ Արեգ Քոչինյանն ասում է՝ Հայաստան-Ադրբեջան խաղաղության պայմանագրի կնքմանը մոտ լինելու մասին խոսակցությունները արդյունք են նրա, որ Բաքուն կարողացել է հասնել արցախյան հարցի՝ իր համար ցանկալի հանգուցալուծման։
«Արցախի Հանրապետություն այլևս չկա և դա, ըստ էության, ճանաչել է Հայաստանը, երբ ասել է այն մասին, որ ՀՀ միակ առաջնահերթությունը սեփական տարածքային ամբողջականության և ինքնիշխանության ապահովումն է»,- նկատել է նա։
Քաղաքագետի գնահատմամբ՝ ՀՀ-ում որևէ վտարանդի կառավարություն չճանաչելու մասին Փաշինյանի հայտարարությունը դրա «հավելյալ առհավատչյան» է։
Կարծում է՝ այս տրամաբանությանը հակասող ցանկացած հայտարարություն կամ գործողություն հարվածում է հայ-ադրբեջանական բանակցային գործընթացին․
«Այս պահի դրությամբ՝ խաղաղության գործընթացն ու պայմանագիրը Հայաստանի ապագայի, հարատևության, անկախության, անվտանգության ամենակարևոր բաղկացուցիչներն են»։
Քոչինյանի համոզմամբ՝ չեն լինելու արևմտյան երաշխիքներ, որոնք ապահովելու են երկրի անվտանգությունը։ Ասում է՝ միակ գործոնը ՀՀ-Ադրբեջան, իսկ հետո՝ ՀՀ-Թուրքիա կարգավորումն է։ Ըստ նրա՝ երկուսն էլ չեն բխում Մոսկվայի շահերից։
Շեշտում է՝ ՌԴ համար տարածաշրջանում առավել հետաքրքիր են ոչ թե Հայաստանն ու Ադրբեջանը, այլ հակամարտությունը, այն ուժերը, որոնք պատրաստ են «սպասարկել դրա վերարտադրությունը»։ Ուստի կարծում է՝ կան մարդիկ, որոնք «գիտակցված և նպատակադրված» են խոսում «վտարանդի կառավարության» մասին։
JAMnews-ը քաղաքագետից հետաքրքրվել է՝ արդյո՞ք «վտարանդի կառավարությունից» հրաժարվելը չի խանգարելու հետագայում ԼՂ-ում ապրած հայերի իրավունքների իրացմանը։
«Չեմ տեսնում մեխանիզմներ, որոնցով մենք կարողանալու ենք իրացնել Ղարաբաղում նախկինում ապրող մեր հայրենակիցների որևէ իրավունք, այդ թվում՝ վերադարձի իրավունքը»,- արձագանքել է Քոչինյանը։
«Մեծագույն սուտ և ինքնախաբեություն» է որակում սցենարները, թե արցախցիները վերադառնալու են ԼՂ, լինելու են ինքնիշխանության ինչ-որ էլեմենտներ։ Ասում է՝ հայկական կողմը տարիներ շարունակ ստատուս-քվոն պահել է բացառապես ուժային բալանսի շնորհիվ, որն այսօր չկա։
Հետևեք մեզ — Facebook | Youtube | Telegram
ԼՂ վտարանդի կառավարություն
