Bloomberg պարբերականը հաղորդում է, որ հուլիսին «Վրացական երազանքի» հիմնադիր և նախկին վարչապետ Բիձինա Իվանիշվիլիի կարողությունը հասել է վերջին 10 տարվա մեջ ամենաբարձր մակարդակին և այժմ կազմում է 6,2 միլիարդ դոլար։ Հուլիսի 5-ին այն հասել է տասնամյակի բացարձակ առավելագույնին՝ 6,25 միլիարդ դոլարի։
Իվանիշվիլին Bloomberg-ի միլիարդատերերի ցուցակում 411-րդն է։ Պարբերականի տվյալներով՝ Իվանիշվիլիին են պատկանում 1 միլիարդ դոլար արժողությամբ արվեստի գործեր, 45 միլիոն դոլար արժողությամբ անշարժ գույք, 5,15 միլիարդ դոլարի ֆինանսական ակտիվներ։
Բիձինա Իվանիշվիլիի ակտիվները ներկայիս ցուցանիշը գերազանցել են միայն 2013 թ.-ին։
Bloomberg-ն ընդգծում է, որ Իվանիշվիլիի տներից մեկում մասնավոր կենդանաբանական այգի կա։
Իվանիշվիլին իր հարստությունը կուտակել է Ռուսաստանում 1990-ականներին՝ զբաղվելով մետաղագործական և բանկային բիզնեսով: 2003 թ․-ին նա վերադարձել է Վրաստան, թեև չի հայտնվել հանրային տիրույթում․ մամուլում կամ ինտերնետում կարելի էր գտնել միայն երկու լուսանկար։
Իվանիշվիլին երկար տարիներ զբաղվել է բարեգործությամբ։ Սկզբում նա աջակցում էր Սաակաշվիլիի կառավարությանն ու ֆինանսավորում նրա կողմից իրականացվող մի շարք խոշոր նախագծեր։
2012 թվականի հոկտեմբերին կայացած խորհրդարանական ընտրություններում Իվանիշվիլիի կոալիցիան հաղթեց և վերջ դրեց Սաակաշվիլիի «Միացյալ ազգային շարժում» կուսակցության իննամյա կառավարմանը։ 2012 թվականի նոյեմբերին Իվանիշվիլին դարձավ երկրի վարչապետ։
13 ամիս անց, այն բանից հետո, երբ նրա «Վրացական երազանք» կուսակցությունը հաղթեց նախագահական ընտրություններում, Իվանիշվիլին հայտարարեց, որ կատարել է իր խնդիրը և սեփական կամքով է լքել վարչապետի պաշտոնը։
Սակայն 2018 թվականի ապրիլին՝ նախագահական ընտրություններից մի քանի ամիս առաջ, Իվանիշվիլին կրկին վերադարձավ հանրային քաղաքական հարթակ և դարձավ իշխող «Վրացական երազանք-դեմոկրատական Վրաստան» կուսակցության նախագահը։
2021 թվականի հունվարի 11-ին երկրի ոչ պաշտոնական կառավարիչ Բիձինա Իվանիշվիլին հայտարարեց, որ լքում է իշխող թիմի ղեկավարի պաշտոնը և վերջնականապես հեռանում է քաղաքականությունից։
Իվանիշվիլին իր ծավալուն հարցազրույցում հերքել էր, որ երկիրը ղեկավարում է ստվերային ճանապարհով։ «Ես ներդրեցի սոցիալական վերահսկողություն, ոչ թե ոչ ֆորմալ կառավարում»,- ասել էր նա:
Սակայն նույն հարցազրույցում խոստովանել էր, որ մասնակցել է վարչապետի թեկնածուի ընտրությանը, ինչպես նաև կառավարության՝ բանկային ոլորտին վերաբերող քննարկումներին։