Թուրքիան պատրաստ է զբոսաշրջային սեզոնը բացել արդեն մայիսի վերջին։ Ինչպե՞ս է դա կազմակերպվելու։ Լուսանկարներ
Աղբյուր՝ Hurriyet
Եթե նոր խնդիրներ չառաջանան, ապա մայիսի վերջին Թուրքիան կվերսկսի ներքին զբոսաշրջությունն ու կբացի ներքին ավիահաղորդակցությունը։
Սակայն հանգստավայրերում իրավիճակը զգալիորեն կփոխվի, մասնավորապես, կարգելվի բուֆետների տարածված պրակտիկան, քանի որ այն բերում է փոքր տարածքում մարդկանց կուտակումների։
Այդ առնչությամբ, ըստ ամենայնի, կաճեն նաև գները կանխարգելիչ միջոցների մի ամբողջ համակարգի պատճառով, որը թույլ չի տա կորոնավիրուսային վարակի նոր բռնկում։
Ապրիլի 29–ի դրությամբ Թուրքիան աշխարհում յոթերորդ տեղում է COVID-19–ով վարակվածների թվով։ Ընդհանուր առմամբ, գրեթե 115 հազար հիվանդ կա։ Նրանցից գրեթե երեք հազարը մահացել է։
- Ռամադանն Ադրբեջանում․ մզկիթները փակ են, ոչ մի զանգվածային հավաք և աղոթք չկա
- Մահացություն, նստարանների ապամոնտաժում և ծերերի հարկադիր ախտահանում․ կորոնավիրուսը Թուրքիայում
- Վրաստան․ ի՞նչ է լինելու զբոսաշրջության հետ
Ինչպես պատմել է Թուրքիայի մշակույթի և զբոսաշրջության նախարար Մեհմեթ Էրսոյը, Թուրքիայում արտոնագրման հատուկ հանձնաժողով է ստեղծվել, որը զբոսաշրջային օբյեկտների համար կանոններ է մշակել։
- Հանձնաժողովը պարբերաբար ստուգելու է հյուրանոցներն ու ռեստորանները և ամեն անգամ տեղեկանք է տրամադրելու, որ դրանք վարակի դեմ մշակում են անցել։
- Պարբերաբար տրանսպորտի սանիտարական ախտահանում է իրականացվելու, որը զբոսաշրջիկների է տեղափոխում։ Վարորդները հատուկ թրեյնինգներ կանցնեն, որոնց ընթացքում կսովորեն համավարակի պայմաններում աշխատել։
- Օդանավակայանները, հյուրանոցները, ռեստորանները, թանգարաններն ու հնէաբանական օբյեկտները կհարմարեցվեն սոցիալական հեռավորության պահպանման պահանջներին։
- Բոլոր հանգստավայրերում պատրաստ կլինեն բուժաշխատողներ և մասնագիտացված սարքավորումներ կտեղադրվեն՝ ներառյալ ջերմացույցներ ջերմության զանգվածային չափման համար։
- Բժշկական ենթակառուցվածքի, այդ թվում՝ ինտենսիվ թերապիայի հիվանդասենյակների, թոքերի արհեստական օդափոխման սարքերի գույքագրում կկատարվի, արդյունքները կտրամադրվեն տուրօպերատորներին։
Մայիսի վերջին Թուրքիան նշելու է Ռամադան ամսվա ավարտը։
«Մենք այդ առնչությամբ ակնկալում ենք զբոսաշրջության աշխուժացում այնպիսի ավաններում, ինչպիսիք են Սեգութը, Սելիմիեն և Բոզբուրունը։ Պահանջված կլինեն հյուրատներն ու ապարտ-հոթելները», – կարծում է Մարմարիսի քաղաքապետ Մեմեթ Օքթայը։
Նրա խոսքով՝ դիտարկվում է լողափերում պառկելաթախտերի քանակի կրկնակի կրճատման հավանականությունը։
«Ակնկալում ենք, որ առաջինը կհայտնվեն բնակարաններ վարձակալողներն, իսկ որոշ ժամանակ անց՝ հյուրանոցների կենվորները», — ասել է Բոդրումի քաղաքապետ Ահմեթ Արասը։ Քաղաքում խստորեն վերահսկվելու է հյուրերի թիվը յուրաքանչյուր ռեստորանում, գիշերային ակումբում և լողափերում։
Էքսկուրսիա տանող նավեր կթույլատրվի բարձրանալ մինչև 12 հոգուց կազմված խմբերի՝ ոչ ավելի։
Արտասահմանյան զբոսաշրջություն
Ներքին զբոսաշրջությունից հետո Թուրքիան պլանավորում է բացել իր հանգստավայրերն արտասահմանցիների համար։
Ըստ զբոսաշրջության նախարարի՝ հուլիսի կեսերին ակնկալվում է զբոսաշրջիկների այց ասիական երկրներից։ Այնուհետև կաշխուժանան այնպիսի ուղղություններ, ինչպիսիք են Գերմանիան և Ավստրիան։ Եվ վերջին փուլում, սակայն նույնպես 2020 թ–ի ամռանը Մեհմեթ Էրսոյը սպասում է, որ զբոսաշրջիկներ են այցելելու Մեծ Բրիտանիայից և Ռուսաստանից։
2019 թ–ը ռեկորդային էր Թուրքիայի զբոսաշրջային ոլորտի համար։ 52 միլիոն զբոսարջիկները երկրին մոտ 35 մլրդ դոլար եկամուտ են բերել։
