Հայաստանում թմրամիջոցների ապօրինի շրջանառության դեպքերն աճել են 14,1%-ով
Թմրամիջոցների շրջանառության աճ Հայաստանում
«Հայաստանում 2024 թվականի առաջին եռամսյակում արձանագրվել է թմրամիջոցների ապօրինի շրջանառության 1130 դեպք, 2023 թվականի նույն ժամանակահատվածում այդ ցուցանիշը եղել է 981։ Շրջանառության դեպքերի աճը կազմել է 14,1%»,- լրագրողների հետ զրույցում հայտնել է Քննչական կոմիտեի ներկայացուցիչ Հովհաննես Համբարյանը։
Այս ֆոնին մեծացել է նաև քրեական պատասխանատվության ենթարկված անձանց շրջանակը։ Հունվար-մարտ ամիսներին պատասխանատվության է ենթարկվել 301 անձ՝ նախորդ տարվա նույն ժամանակահատվածի 144-ի համեմատ։ Նրանցից 5-ն անչափահասներ են։
Իրավապահներն ուշադրություն են հրավիրում այն հանգամանքի վրա, որ բավական մեծ թիվ են կազմում համացանցի միջոցով իրականացվող թմրանյութերի ապօրինի շրջանառության դեպքերը: Առողջապահական համակարգի ներկայացուցիչների խոսքով՝ թիրախում հայտնվող անչափահասները հետագայում բախվում են առողջական լուրջ խնդիրների։
Ապօրինի շրջանառության աճ է նկատվել նաև 2023 թ․-ին
Քննչական կոմիտեի հատկապես կարևոր գործերի քննության գլխավոր վարչության մարդկանց թրաֆիքինգի, անչափահասների սեռական անձեռնմխելիության դեմ ուղղված և թմրամիջոցների ապօրինի շրջանառության հանցագործությունների քննության վարչության պետ Հովհաննես Համբարյանի փոխանցմամբ՝ աճի միտում է նկատվել նախորդ տարի․
«Մասնավորապես, 2022 թ․-ին հանրապետությունում արձանագրվել է թմրամիջոցների ապօրինի շրջանառության 2266 դեպք, 2023 թ․-ին՝ 5070 դեպք [123,7% աճ]»։
Համբարյանի խոսքով՝ հանրությունը քննարկում է այն, որ «թմրամիջոցների շրջանառության ծավալներն աննախադեպ չափերի են հասել», սակայն միշտ չէ, որ դա համապատասխանում է իրականությանը։
«Նշված վիճակագրական տվյալները կարող են նաև իրականացված պայքարի [թմրանյութերի ապօրինի շրջանառության դեմ] ու բացահայտումների արդյունք լինել։ Նույնիսկ կարող եմ նշել, որ 2023-ի բացահայտումների ցանկում կան դեպքեր, որոնք տեղի են ունեցել տարիներ առաջ»,- պարզաբանել է նա։
Քննչական կոմիտեի ներկայացուցչի խոսքով՝ ամեն դեպքում ցուցանիշները մտահոգիչ են, կա իրականացվող բազմակողմանի աշխատանքների ծավալներն ավելացնելու կարիք։
«Կախվածություն ունեցող 15-ամյա աղջկա ենք ուղեգրել հոգեկան առողջության կենտրոն»
Թմրանյութերի ապօրինի շրջանառության աճին զուգահեռ դիմելիության աճ է նկատվում Կախվածությունների բուժման ազգային կենտրոնում։
Կենտրոնի տնօրեն Սուրեն Նազինյանի խոսքով՝ թմրամիջոց օգտագործած բուժառուների շարքերում կան նաև անչափահասներ։ Անցյալ տարի 7 անչափահաս բուժառու են ունեցել, բոլորը՝ տղաներ․
«Այս տարի 15 տարեկան աղջիկ ենք ունեցել, ցավոք, արդեն հոգեախտաբանական խնդիրներ կային։ Ուղեգրեցինք հոգեկան առողջության կենտրոնի մանկական բաժին»։
Սուրեն Նազինյանի խոսքով՝ վերջին շրջանում տարածում են գտել «ոչ ավանդական»՝ հոգեխթանիչ հանդիսացող սինթետիկ թմրամիջոցները, որոնք բավական վտանգավոր են ու շատ արագ կախվածության մեջ են գցում մարդուն։ Շեշտում է՝ դրանք ունակ են առաջացնել հոգեախտաբանական խնդիրներ։
Կախվածությունների բուժման ազգային կենտրոնի տնօրենն անչափահասների ծնողներին հորդորում է առավել ուշադիր լինել իրենց երեխաների վարքին՝ նկատելու համար այն փոփոխությունները, որոնք կարող են առաջանալ թմրամիջոցների հնարավոր օգտագործման հետևանքով։
«Մասնավորապես, փոխվում է ընկերական շրջապատը, առողջ հետաքրքրությունները փոխարինվում են բացասական հետաքրքրություններով, սկսում են ուշ տուն գնալ, տնից փախչում են, մեկուսանում և այլն»,- մանրամասնել է Նազինյանը։
Ասում է՝ որոշ դեպքերում կարող են լինել նաև ֆիզիկական նշաններ, օրինակ՝ մարիխուանայի գործածման հետևանքով նկատվում է եղջերաթաղանթի կարմրություն։ Իր ղեկավարած կենտրոնում բուժառուներին օգնում են հաղթահարել խնդիրը, իրականացնում ոչ միայն դեղորայքային բուժում, այլև սոցիալ-հոգեբանական աջակցության ծրագրեր։
Հետևեք մեզ — Facebook | Youtube | Telegram
Թմրամիջոցների շրջանառության աճ Հայաստանում
