Վրաստանի խորհրդարանի խոսնակի գրառումից հետո ակտիվիստին ծեծի են ենթարկել
Թբիլիսիում ծեծի են ենթարկել ակտիվիստին
Հունիսի 11-ի առավոտյան Թբիլիսիում՝ իր տան մոտ ծեծի է ենթարկվել քաղաքացիական ակտիվիստ Զուկա Բերձենիշվիլին։
Ինչպես Facebook-ում գրում է նրա ընկերուհին՝ Սալոմե Նիկոլեիշվիլին, միջադեպը տեղի է ունեցել առավոտյան ժամը 11-ին՝ ուղիղ մեկ ժամ անց այն բանից հետո, երբ խորհրդարանի նախագահ Շալվա Պապուաշվիլին Facebook-ում գրառում է կատարել Բերձենիշվիլիի մասին։
«Պապուաշվիլիի գրառումից մեկ ժամ անց «վրդովված քաղաքացիները» Զուկային դիմավորել են իր տան մոտ և հարձակվել նրա վրա։ Հնարավոր է՝ դա պարզապես պատահականություն է»,— գրել է Նիկոլեիշվիլին։
Խորհրդարանի նախագահ Շալվա Պապուաշվիլին առավոտյան ժամը 09:15-ին հրապարակել էր գրառում, որտեղ կոնկրետ լրագրողների և ակտիվիստների մեղադրել էր «կազմակերպված և քաղաքական դրդապատճառներ ունեցող ահաբեկչական արշավի մեջ»։
Իր գրառման մեջ Պապուաշվիլին հիշատակել էր նաև JAMnews-ը և լրատվամիջոցի աշխատակցին, քանի որ JAMnews-ը սոցցանցերի իր հրապարակումներից մեկում ցուցադրել էր Վախուշտիի կամրջի վրա ինչ-որ մեկի դրած տրաֆարետը, որի վրա գրված էր՝ «84 դավաճան՝ 84 փամփուշտ ծոծրակին»:
Ըստ Պապուաշվիլիի՝ այդ տեսանյութն, իբր, ապացուցում է, որ Եվրամիության կողմից ֆինանսավորվող պարբերականը կոչ է անում ուղղակի հաշվեհարդար տեսնել խորհրդարանի այն անդամների հետ, ովքեր կողմ են քվեարկել «օտարերկրյա գործակալների մասին» օրենքին։
JAMnews-ն իր հերթին բազմիցս պարզաբանել է, որ տրաֆարետի բովանդակությունը մեկնաբանել է այլ կերպ, այն է՝ թիկունքից դավաճանաբար 84 փամփուշտ է արձակվել երկրի վրա։ Սակայն տարբեր մեկնաբանությունները կանխելու համար առցանց պարբերականը հետագայում ջնջել է նյութը և հայտարարել, որ կտրականապես դեմ է ցանկացած տեսակի բռնությանը։
Սակայն իշխող «Վրացական երազանք» կուսակցության քարոզչամեքենան շարունակում է հարձակումները հասարակական կազմակերպությունների, ակտիվիստների և անկախ լրատվամիջոցների վրա։
Խորհրդարանի խոսնակի ֆեյսբուքյան գրառումից անմիջապես հետո ակտիվիստ Զուկա Բերձենիշվիլիի վրա հարձակումը մեզ ստիպում է մտածել, որ վտանգի մեջ կարող են հայտնվել նաև մեր գործընկերները։ JAMnews-ն այս հարցում ողջ պատասխանատվությունը դնում է իշխանությունների վրա։
Ծեծի ենթարկված Զուկի Բերձենիշվիլիի լուսանկարը հրապարակել է նրա ընկերուհին՝ Սալոմե Նիկոլեիշվիլին, ով հիշատակվում է նաև խոսնակ Պապուաշվիլիի գրառման մեջ։
«Նրանք [հարձակվողները] երեքն էին, նրանք սպասում էին մեքենայում, թիկունքում թաքնվեցին, ապա փախան», — գրել է Նիկոլեիշվիլին:
Մի քանի օր առաջ Զուկա Բերձենիշվիլին հայտնել էր գյուղերից մեկում դարանակալման մասին, սակայն այդ ժամանակ նրան հաջողվել էր փախչել։
Ավելի ուշ Բերձենիշվիլին ֆեյսբուքյան իր էջում գրել է, որ հարձակվողներից մեկը սպառնացել է կրակել իր գլխին։
«Երեքից մեկը, երբ պառկած վիճակում ծեծում էր ինձ, բղավեց. «Չկրակե՞նք գլխիդ»: Արածն իր համար քիչ էր, և նա ֆանտազիաների գիրկն էր ընկել։ Խեղճ են Ձեր ծնողները, տղաներ: Ես բոլորիդ հիշում եմ»,- նշել է Զուկա Բերձենիշվիլին։
Խորհրդարանի նախագահի գրառումն ունի հետևյալ բովանդակությունը.
«Ակնհայտ է, որ լրատվամիջոցների համար բեմադրված՝ «վրդովված քաղաքացիների» այս տեսարաններն իրականում կազմակերպված և քաղաքական դրդապատճառներ ունեցող ահաբեկչություն են, դա իրականացվում է հանուն Եվրոպայի»,- գրել է Պապուաշվիլին սոցցանցում։
Նրա խոսքով՝ դոնորները նորմայի են վերածում ահաբեկչությունը՝ խրախուսելով իրենց կողմից ֆինանսավորվող կազմակերպությունների քաղաքական ծայրահեղականությունը։
«Միայն վերջին մի քանի օրվա ընթացքում ԵՄ բյուջեից ֆինանսավորվող երեք հասարակական կազմակերպությունների աշխատակիցներ
- Խորհրդարանի անդամներին սպառնացել են «քունքին կրակոցով» (Լևան Դաթունաշվիլի, JAMnews),
- Խորհրդարանի անդամներին զանգահարել են՝ հղելով սպառնալիքներ և վիրավորանքներ (Սալոմե Նիկոլաիշվիլի, Զուկա Բերձենիշվիլի, «Սիრცხვილია» [«Shame»] շարժում),
- Հանրային վայրում հարձակվել են խորհրդարանի անդամի և նրա ընտանիքի վրա և վիրավորվել (Մարիամ Ցիցիկաշվիլի, «Վրաստանի բարեփոխումների ասոցիացիայի» (GRASS) ներկայացուցիչ):
Այս գրառմամբ Պապուաշվիլին արձագանքել է հունիսի 10-ին Թբիլիսիի օդանավակայանում տեղի ունեցած միջադեպին։ Օդանավակայանում պատահաբար հանդիպելով պատգամավոր Վիկտոր Ջափարիձեին՝ Մարիամ Ցիցիկաշվիլին հրապարակայնորեն նրան մեղադրել էր դավաճանության մեջ, քանի որ պատգամավորը պաշտպանել է «օտարերկրյա գործակալների մասին» օրենքը։ Ցիցիկաշվիլին տեսանյութ էր նկարահանել, որն այնուհետև տեղադրվել էր սոցիալական ցանցերում։ Ցիցիկաշվիլին պատգամավորին մեղադրել էր երկրին դավաճանելու մեջ։
Արդյունքում Ցիցիկաշվիլին և նրան ուղեկցող անձին հեռացրել էին չվերթից և ձերբակալել մանր խուլիգանության համար։ Ավելի ուշ ձերբակալվածներն ազատ էին արձակվել։ Սակայն սա առաջին դեպքը չէ, երբ «օտարերկրյա գործակալների մասին» օրենքի ընդունումից հետո քաղաքացիները օրենքին սատարող պատգամավորներին հրապարակավ անվանում են «դավաճաններ» և «ստրուկներ»։
Արդեն երկու ամսից ավելի է, ինչ փողոցներում շարունակվում է մարդկանց ծեծի ու սպառնալիքների ալիքը, վիրավորական գրություններ են հայտնվում աղմկահարույց օրենքի հակառակորդների տների և գրասենյակների պատերին։
Վերջին դեպքերից մեկը տեղի էր ունեցել հունիսի 7-ին, երբ Թբիլիսիի պետական համալսարանի մոտ մի քանի հոգի հարձակվել և ծեծի էին ենթարկել ակտիվիստ և ուսանողական շարժման առաջնորդներից Նիկո Մանագաձեին։
Ավելի վաղ ավտոբուսի կանգառում հարձակման էր ենթարկվել «Գիրչի» կուսակցության անդամ Ցոտնե Կոբերիձեն։
Մինչ այժմ հետաքննությունը չի հայտնաբերել ակտիվիստների վրա հարձակված որևէ անձի։ Սակայն տեսանյութերում հստակ երևում են հարձակվողների դեմքերը։
«Երիտասարդ իրավաբանների ասոցիացիան» հատուկ զեկույց է հրապարակել «օտարերկրյա գործակալների մասին» օրենքի հակառակորդների նկատմամբ բռնության թեմայով։
Ի թիվս այլ բաների՝ զեկույցում նշվում է, որ «քաղաքացիների վրա հարձակումներին աջակցել են պետական բարձրաստիճան պաշտոնյաները»։ Զեկույցի համաձայն՝ այդ մասին է վկայում նաև խորհրդարանական մեծամասնության անդամ Դմիտրի Սամխարաձեի գրառումը Facebook-ում, որը պատգամավորը հրապարակել է 2024 թվականի մայիսի 31-ին։
«Վրացական երազանքի» պատգամավոր Սամխարաձեն մայիսի 31-ին Facebook-ում տեսանյութ էր հրապարակել, որտեղ երևում է, որ ձվեր են նետվում շենքի վրա, որտեղ տեղակայված են Մեծ Բրիտանիայի հյուպատոսության վիզաների կենտրոնը, TV BMG-ն, New Party-ն և այլ միջազգային ընկերություններ: Սամխարաձեն մեկնաբանության մեջ գրել էր, որ դա կառավարության անդամներին ծաղրանքի ենթարկելու պատասխանն է։
