Երևանում թափառող շների մշտական կացարան կկառուցվի
Թափառող շների կացարան Երևանում
Այս տարի Երևանում կկառուցվի թափառող շների խնամքի մշտական կացարան։ Համայնքի նախաձեռնությունն է։ Հաղորդվում է, որ կացարանը նախատեսված է լինելու մինչև 300 շան համար։
«Նախագծման աշխատանքները առաջիկա մի քանի օրվա ընթացքում կավարտվեն, որից հետո կանցնենք շինարարության մրցույթին։ Մրցույթի կայացումից հետո էլ կտանք շինաշխատանքների մեկնարկը»,- հայտնել է «Կենդանիների խնամքի կենտրոն» ՀՈԱԿ-ի տնօրեն Հարություն Առաքելյանը։
2023 թ․-ին կենտրոնի կլինիկա է բերվել 3436 շուն, ստերջացվել և կատաղության դեմ պատվաստվել է 2045 շուն, իսկ կատաղության դեմ վերապատվաստվել է 753 շուն: Որդեգրման է հանձնվել 104 շուն:
«Շները վանդակներում չեն պահվելու»
«Արմենպրեսին» տված հարցազրույցում վստահեցրել է Առաքելյանը։ Շեշտել է՝ կացարանը չի ենթադրում տարածք, որտեղ կենդանիներն ուղղակի «բանտարկված» են լինելու․
«Խոսում ենք կառույցի մասին, որտեղ նրանք ապահովված են լինելու կերով, ջրով, բժշկական ծառայություններով, ինչպես նաև ազատ տեղաշարժի հնարավորությամբ»։
Ներկա պահին կենտրոնը թափառող կենդանիներին ցուցաբերում է որոշակի բուժօգնություն․ ունի վիրահատական և կարանտինային բլոկ։ Կառուցվելիք նոր կացարանում կենդանիները կանցնեն բժշկական ստուգում, կստերջացվեն, կպատվաստվեն և կլինեն բժիշկների մշտական հսկողության ներքո։
Հիմնական՝ ամենամեծ կացարանի կառուցումից հետո համայնքը նախատեսում է նմանատիպ կացարաններ ունենալ նաև մի քանի վարչական շրջաններում։
«Խնդիրները շատ են, ոլորտը կարգավորման կարիք ունի»
Երևանի քաղաքապետարանի «Կենդանիների խնամքի կենտրոն» ՀՈԱԿ-ի տնօրենի խոսքով՝ շների հանդեպ անպատասխանատու վարքագիծ դրսևորողները շատ են։ Ասում է՝ մի քանի ամիս կենդանուն պահելուց հետո հրաժարվում են նրանից՝ թողնելով փողոցում։ 2024 թ․-ին կենտրոնի ուշադրությունը սևեռված է լինելու շների որդեգրման, նրանց խնամակալության հանձնելու գործընթացի վրա․
«Նպատակ ունենք ավելի մեծ արշավներ իրականացնել, որ մարդիկ, ովքեր ցանկություն ունեն կենդանիներ պահելու, նախապատվություն տան մեր կենտրոնից կենդանի որդեգրելուն, այլ ոչ գնելուն»։
Առաքելյանի գնահատմամբ՝ օրենսդրական կարգավորումների բացը լրացնելու կարիք կա։
Նկատում է՝ բազմաթիվ հանդիպումներ են ունենում, ԱԺ-ում նախագիծ է շրջանառվում։ Ոլորտի կանոնակարգման առաջարկներով հանդես է գալիս նաև քաղաքապետարանը։
«Երևան համայնքը ևս նախաձեռնում է փոփոխություն, որով կհստակեցվի կենդանի պահելու կարգը, տերերի պարտականությունները։ Մեծ հույս ունենք, որ կսահմանենք նաև տույժեր, տուգանքներ նրանց նկատմամբ անպատասխանատու վերաբերմունքի համար»,- ամփոփել է կենտրոնի տնօրենը։
Հետևեք մեզ — Facebook | Youtube | Telegram
Թափառող շների կացարան Երևանում
