Ընտրությունների նախաշեմին․ ՀՀ նախկին նախագահ Ռոբերտ Քոչարյանը կգլխավորի «Հայաստան» դաշինքը
Հայաստանի նախկին նախագահ Ռոբերտ Քոչարյանը պաշտոնապես հիմնել և գլխավորել է «Հայաստան» նոր քաղաքական դաշինքը։ Դրան անդամակցում են հնագույն քաղաքական կուսակցություններից մեկը՝ ՀՅ «Դաշնակցությունը» և վերջերս ստեղծված «Վերածնվող Հայաստանը»։ Նոր դաշինքի ստեղծման հռչակագրի ստորագրման հանդիսավոր արարողությունը կայացել է մայիսի 9-ին։
«Հայաստան» դաշինքը մասնակցելու է կայանալիք արտահերթ խորհրդարանական ընտրություններին, որոնք նախանշված են հունիսի 20-ին։
Հանդիսավոր արարողության ժամանակ Ռոբերտ Քոչարյանը հայտարարել է, որ հենց ինքը կարող է Հայաստանը դուրս բերել ճգնաժամից և կայուն զարգացում ապահովել, քանի որ ինքը «մեծ փորձ և լավ գիտելիքներ» ունի։ Քոչարյանը նաև ճանապարհային քարտեզ է ներկայացրել, որը պատրաստվում է իրականացնել, եթե իր դաշինքը հաղթի ընտրություններում։
Այնուհետև, նախկին նախագահը դաշինքին անդամակցած կուսակցությունների առաջնորդների հետ քայլել է դեպի Երևանի Ազատության հրապարակ։ Այնտեղ նրան արդեն հազարավոր կողմնակիցներ էին սպասում, որոնք փաստաթղթի ստորագրմանն ու Քոչարյանի ելույթին հետևում էին հրապարակում տեղադրված մեծ էկրանին։
Հրապարակում նախկին նախագահը կրկին ծրագրային ելույթ է ունեցել և հայտարարել, որ մտադիր է վերածնել խորը քաղաքական և տնտեսական ճգնաժամի մեջ հայտնված Հայաստանը։
- Ի՞նչ է թաքնված Ռուսաստանի արտգործնախարարի Կովկաս կատարած այցի հետևում։ Մեկնաբանություններ Երևանից և Բաքվից
- Հեռանալ՝ վերադառնալու համա՞ր։ Ի՞նչ է նշանակում Հայաստանի վարչապետի հրաժարականը․ կարծիքներ
Ինչո՞ւ է վերադառնում քաղաքականություն
Քոչարյանը հայտարարել է, որ մտադիր չէր քաղաքականություն վերադառնալ, սակայն երկիրն այնպիսի վիճակում է հայտնվել, որ ինքն «ընտրություն չունի»։ Նրա խոսքով՝ երկիրը լուրջ մարտահրավերների առջև է, և դրանցից լրջագույնը անվտանգության սպառնալիքն է․
«Այս իշխանության հետ մենք ձախողակ ժողովուրդ ենք դառնալու։ Երկրում կառավարման և տնտեսական ճգնաժամ է։ Երկրում ակնհայտ է նաև ինքնության ճգնաժամը, ու մարդիկ և ուժեր են անհրաժեշտ, որոնք նման մարտահրավերների հաղթահարման բավականաչափ փորձ ունեն»։
Ինչո՞ւ հենց նա
Նախկին նախագահը կարծում է, որ ինքը ճգնաժամային իրավիճակներում կառավարման մեծ փորձ ունի․
«Երկրում ակնհայտ է նաև ինքնության ճգնաժամը: Պետք են ուժեր, մարդիկ, որոնք բավարար փորձ ունեն այսպիսի մարտահրավերներ հաղթահարելու համար: Ինչո՞ւ ես. ունեմ մեծ կառավարման փորձ ճգնաժամային իրավիճակներում, ունեմ կուտակած փորձ ու գիտելիքներ անվտանգության, պաշտպանության համակարգում: Ունեմ փորձ տնտեսական ճգնաժամ հաղթահարելու հարցում»։
Գործընկերների մասին
Քոչարյանը ՀՅԴ-ին բնութագրել է որպես կուսակցության, որը ողջ աշխարհում պայքարում է հայկական ինքնության պահպանման համար։ Եվ, ինչպես նշել է նախկին նախագահը, ինքն այդ քաղաքական ուժի հետ համագործակցության փորձ ունի։
Նախկին նախագահի խոսքով՝ «Վերածնվող Հայաստան» կուսակցության ստեղծումը թելադրված է Հայաստանի Սյունիքի մարզի ապագայի համար անհանգստությամբ։
2020 թ-ի աշնանն Արցախյան երկրորդ պատերազմի ավարտից հետո Սյունիքի շատ գյուղեր սահմանամերձ են դարձել, ինչպես ԽՍՀՄ տարիներին, քանի որ Ադրբեջանի վերահսկողության տակ են անցել Արցախի հարակից տարածքները։ Որոշ գյուղեր նույնիսկ երկու մասի են բաժանվել՝ հայկական և ադրբեջանական։ Մարզը Երևանին կապող մայրուղու որոշ հատվածներ պաշտոնապես ադրբեջանական տարածք են հայտարարվել, և այդտեղ ադրբեջանական ԶՈւ դիրքեր են տեղակայվել։
Կուսակցության առաջնորդը Սյունիքի նախկին մարզպետ Վահե Հակոբյանն է, դրա կառավարման կազմում են նաև մարզի վարչական միավորների գործող ղեկավարները՝ Գորիսի, Սիսիանի, Քաջարանի քաղաքապետները, Մեղրիի և Տեղի համայնքապետները։
«Սյունիքն այսօր ներկա սպառնալիքների էպիկենտրոն է Հայաստանի համար: Սյունիքից է կախված՝ մնալո՞ւ ենք գործոն այս տարածաշրջանում, թե՞ դառնալու ենք կցորդ: Այստեղ վտանգները լուրջ են, և կարծում եմ՝ Սյունիքն այսօր մեր այս պահի պայքարի սիմվոլն է հանդիսանում», — հայտարարել է Ռոբերտ Քոչարյանը։
Ճանապարհային քարտեզ
Նախկին նախագահը նաև ներկայացրել է իր գործունեության առաջնահերթությունները, կետերը, որոնք պատրաստվում է իրագործել, եթե իր դաշինքը հաղթի ընտրություններում․
- գնահատել երկրին հասցված վնասի չափն՝ ըստ ոլորտների, քանի որ դա կարևոր է հետագա քայլերի պլանավորման համար,
- կասեցնել տնտեսական անկումը,
- վերականգնել երկրի հեղինակությունն ու կանխատեսելիությունը, վերադարձնել հուսալի գործընկերոջ անունը,
- վերանայել բիզնեսի նկատմամբ վերաբերմունքը, համատեղ աշխատել փոքր ու միջին բիզնեսի զարգացման համար,
- ստեղծել գիտելիքահեն տնտեսություն և զարգացնել գյուղատնտեսությունը,
- պետական հատվածի մաքրման համար պայքարել ոչ թե կարգախոսներով, այլ հստակ քայլերով։
