Գործադուլ, փակ ճանապարհներ, հրաժարականներ․ ընդդիմության փորձը՝ պաշտոնանկ անել Հայաստանի վարչապետին

Հայաստանում եռօրյա սգից հետո վերսկսվել են բողոքի ակցիաները։ Ընդդիմությունը շարունակում է պահանջել վարչապետի հրաժարականը։ Միաժամանակ, այն կիրառում է նույն մեթոդները, որոնք 2018 թ․ «թավշյա» հեղափոխության ժամանակ օգտագործել է դրա առաջնորդ Նիկոլ Փաշինյանը։ Վարչապետի հրաժարականը պահանջող ընդդիմադիրները նույնպես փորձում են փակել ճանապարհները, համազգային գործադուլ կազմակերպել։

Դեկտեմբերի 22-ը ընդդիմությունը «պայքարի վճռորոշ օր» է անվանել․ Երևանի գլխավոր հրապարակում հազարավոր մարդկանց մասնակցությամբ հանրահավաք անցկացվեց։ Ելույթ ունեցան միավորված ընդդիմադիր կուսակցությունների առաջնորդները, ինչպես նաև վարչապետի նրանց միասնական թեկնածու Վազգեն Մանուկյանը։ Նա բանակին և ոստիկանությանը կոչ արեց միանալ ընդդիմադիր շարժմանն ու միասին հասնել Նիկոլ Փաշինյանի պաշտոնանկությանը։

Ընդդիմության ակցիայի բոլոր մանրամասները, նաև՝ թե ինչ ճանապարհներ են փակ Հայաստանում, զինվորականներից ովքեր են հրաժարական տվել, ինչ է այս ամենի մասին մտածում վարչապետ Նիկոլ Փաշինյանը։

• Հայաստանի հարավի բնակիչները վարչապետին մարզ չեն թողել․ ինչո՞ւ է ապստամբել Սյունիքը
• Լեռնային Ղարաբաղ․ ի՞նչ է սպասվում «նոր» և «հին» փախստականներին

Ինչպե՞ս անցավ հանրահավաքը

Ընդդիմությունը կրկին ներկայացրել է իր մեղադրանքները վարչապետին և պահանջել Նիկոլ Փաշինյանի հրաժարականը, քանի որ նա «դավաճանել է ազգային շահերին և Արցախի վերաբերյալ խայտառակ հայտարարություն ստորագրել»։

«Երկուսուկես տարում նա հասել է նրան, որ մարդկանց համար արդեն տհաճ է արտաբերել «Նիկոլ» անունը», — ասել է «Դաշնակցության» ներկայացուցիչ Գեղամ Մանուկյանը։

Նա նույնիսկ կոչ է արել ցուցարարներին՝ վանկարկել ոչ թե «Առանց Նիկոլ Հայաստանն», ինչպես նախորդ ակցիաների ժամանակ, այլ՝ «Առանց նրա Հայաստան»։

«Դաշնակցության» մյուս ներկայացուցիչ Իշխան Սաղաթելյանը պատմել է սահմանադրական և իրավական չորս մեխանիզմների մասին, որոնք թույլ կտան հասնել վարչապետ Նիկոլ Փաշինյանի հրաժարականին․

«Առաջին տարբերակ․ վարչապետն ինքն է հայտարարում իր հրաժարականի մասին։ Երկրորդ ճանապարհ․ խորհրդարանն արտահերթ նիստ է գումարում և քննարկում Փաշինյանի հրաժարականի հարցը։ Երրորդ եղանակ․ գլխավոր դատախազությունը քրեական գործ է հարուցում պետական դավաճանության նախանշաններով։ Չորրորդ․ կառավարությունը նախարարների 2/3-ի պահանջով արտահերթ նիստ է հրավիրում և քննարկում վարչապետի հրաժարականը»։

Ընդդիմությունը, Սաղաթելյանի խոսքով, աշխատելու է այս բոլոր չորս ուղղություններով։

Վարչապետի՝ ընդդիմության թեկնածու Վազգեն Մանուկյանը հայտարարել է, որ «ինքը մինչ օրս ամաչում էր ժողովրդի, պետության փոխարեն»․

«Ամոթ է, որ մենք մինչ օրս պաշտոնանկ չենք արել այդ մարդուն [խոսում է Փաշինյանի մասին]։ Ես այս պետության հիմնադիրներից մեկն եմ եղել [անկախ Հայաստանի Հանրապետության առաջին վարչապետը] և անձնական պատասխանատվություն եմ զգացել այդ խայտառակ պարտության համար։ Բայց այսօր ես նայում եմ ձեր աչքերին և հպարտանում եմ։ Ես այստեղ տեսնում եմ այն ժողովրդին, որը հպարտությամբ է ապագային նայում։ Մենք կկառուցենք պետություն, որի մասին երազել ենք»։

«Բարգավաճ Հայաստան» կուսակցության ներկայացուցիչ Նաիրա Զոհրաբյանը հայտարարել է, որ այսուհետ ընդդիմությունն ամեն օր անհնազանդության ակցիաներ է անցկացնելու, «մինչև որ Փաշինյանը հրաժարական տա»։

Բոլոր ելույթներից հետո ընդդիմադիր գործիչները ցուցարարներին կոչ արեցին շրջապատել կառավարության շենքը՝ փակելով բոլոր մուտքերը։

Ո՞ր ճանապարհներ են փակ

Մինչ Երևանում հանրահավաք էր, Փաշինյանի հակառակորդները փակել էին Երևան-Վանաձոր ճանապարհը։

Բողոքի շարժման ակտիվիստներից Գեղամ Մանուկյանը ցուցարարներին հաղորդել է, որ փակ են նաև Իջևան-Երևան և Վանաձոր-Դիլիջան ճանապարհները։

«Մարդիկ Փաշինյանի հրաժարականն են պահանջում», — հայտարարել է ընդդիմադիր գործիչը։

Ո՞վ է հրաժարական տվել

Որպես գործող իշխանության դեմ բողոքի նշան՝ իր պաշտոնը լքել է ոստիկանության ՊՊԾ գնդի հատուկ գումարտակի հրամանատարի տեղակալ Խաչատուր Թովմասյանը։ Այս գումարտակին ժողովուրդը «կարմիր բերետներ» է անվանում։

Ընդդիմադիր առաջնորդներն այս մասին հաղորդել են հանրահավաքի ժամանակ և կարդացել սպայի ուղերձը։ Դրանում Խաչատուր Թովմասյանն ասում է, որ իր համար կարևոր են մարդկային և հոգևոր արժեքները, և ինքը «չի հանդուրժում կազմաքանդ և անպատասխանատու մարդկանց»։

Ի՞նչ է մտածում Նիկոլ Փաշինյանը

Վարչապետն այս ընդդիմադիր շարժումն անվանել է նախորդ իշխանության «էլիտայի» ապստամբություն։

«2018 թվականի հեղափոխության արդյունքում Հայաստանում իշխանությունից զրկված «էլիտան» փորձում է հասնել ռևանշի», — գրել է Նիկոլ Փաշինյանը Facebook-ի իր էջում։

Նրա խոսքով՝ իրական դիմակայությունը տեղի է ունենում ոչ թե կառավարության և ընդդիմության, այլ՝ արտոնություններից զրկված «էլիտայի» և ժողովրդի միջև․

«Բայց բոլոր դեպքերում վճռորոշ խոսքը ասելու է ժողովուրդը, որովհետև եթե ժողովուրդը իր խոսքն ասի՝ «էլիտաները» ոչինչ անել չեն կարող: Ես, իհարկե, ամեն ինչ անելու եմ, որ ժողովուրդը իր խոսքն ասելու հնարավորությունը չկորցնի: Բայց այս պահին մեզ համար առաջնահերթությունը Հայաստանի և Արցախի արտաքին անվտանգության ապահովումն է, և նշված գործողություններում արտաքին անվտանգությունը որևէ կերպ չպետք է հարցականի տակ դրվի»։