Երևանի քաղաքապետը պաշտոնանկ արվեց

Երևանի քաղաքապետ Հայկ Մարությանն ազատվեց զբաղեցրած պաշտոնից։ Ավագանու 65 անդամներից 44–ը կողմ քվեարկեցին Մարությանին անվստահություն հայտնելու նախագծին։

Արտահերթ նիստին նախորդող օրերին ավագանու անդամներից մի քանիսը խոսել էին իշխող ուժի կողմից իրենց նկատմամբ կիրառվող ճնշումների՝ շանտաժի և սպառնալիքների մասին։ «Իմ քայլը» հերքել էր լրատվամիջոցներում տեղ գտած այդ տեղեկությունները։

Հիմք ընդունելով ճնշումների վերաբերյալ ավագանու անդամների հայտարարությունները՝ «Իրազեկ քաղաքացիների միավորում» ՀԿ-ն հանցագործության մասին հաղորդում է ներկայացրել Գլխավոր դատախազություն։

• Անվստահություն Երևանի քաղաքապետին․ իշխող ուժի և ընդդիմության դիրքորոշումները
• Երևանի քաղաքապետարանի օգնությունը Լեռնային Ղարաբաղի մայրաքաղաքին

Դեկտեմբերի 22-ին քաղաքապետարանում  ավագանու արտահերթ  նիստ էր հրավիրվել։ Օրակարգում մեկ հարց էր՝ «Երևանի քաղաքապետ Հայկ Մարությանին անվստահություն հայտնելու մասին» որոշման նախագիծը։

Քաղաքապետի և ավագանու անդամների ելույթներից հետո նախագիծը դրվեց գաղտնի քվեարկության։ Արդյունքում որոշվեց, որ գործող քաղաքապետը պաշտոնանկ կարվի։

Նախաձեռնող խումբը քաղաքապետի պաշտոնում առաջադրել է առաջին տեղակալ Հրաչյա Սարգսյանի թեկնածությունը։ Օրենքի համաձայն՝ նորընտիր քաղաքապետն իր լիազորությունները պետք է ստանձնի մեկշաբաթյա ժամկետում։

Նախքան գաղտնի քվեարկության անցկացումը քաղաքապետ Մարությանը հանդես էր եկել ելույթով՝ խախտելով վերջին մեկ տարվա լռությունը։

Հայկ Մարությանը հայտարարարել էր, որ ապօրինի կառույցները, որոնց դեմ քաղաքապետարանը պայքար էր մղում, ի վերջո օրինականացվում էին կառավարության որոշումներով։

Իր և «Քաղաքացիական պայմանագիր» [ՔՊ] կուսակցության միջև, ըստ նախկին քաղաքապետի,  խզում է առաջացել այն ժամանակ, երբ սկսել է զանգեր ստանալ տարբեր խնդրանքներով` այս կամ այն շինությունը կառուցելու, այս կամ այն վայրում առևտրի կետ տեղադրելու թույլտվությունների մասին։

Ասում է՝ մերժել է նման խնդրանքները՝ տեղեկացնելով, որ ամեն բան արվելու է օրենքի շրջանակում․

«Հիմա այս մարդիկ ասում են` Հայկը հեղափոխությունից շեղվել է։ Սա ասում են մարդիկ, ովքեր երկրի համար այս նեղ պահին 200 000 դոլարանոց մեքենա են գնում ու ամբողջ քաղաքական թիմով 1 ամիս շարունակ լծվում են արդարացնելու այդ որոշումը, որ ցույց տան, թե ինչքան անհրաժեշտ գնում էր սա պետության համար։ Պատկերացնո՞ւմ եք՝ մի երկիր, որ 30 տոկոս աղքատություն ունի, որ միջազգային գործընկերներից փող է խնդրում իր մանկապարտեզները վերանորոգելու համար»։

Անդրադառնալով պնդումներին, թե՝ շեղվել է հեղափոխական արժեքներից, քաղաքապետն ընդգծել է, որ, ի տարբերություն իրենց աշխատավարձերը կտրուկ բարձրացրած հեղափոխականների, ինքն իր աշխատավարձը չի բարձրացրել, պարգևավճար չի ստացել։ Վստահ է՝ դա պետք է լինի «հեղափոխական մանդատ ստացած ցանկացած պաշտոնյայի համոզմունքը»։ Մարությանի խոսքով՝ հարցը կուսակցությունում բազմիցս բարձրացրել է, բայց ոչ մի արձագանք չի ստացել։

Քաղաքապետի պաշտոնը ստանձնելուց հետո Մարությանը վաճառքի է հանել ծառայողական «Մերսեդես» ավտոմեքենան և վարում է էկոնոմ դասի «Նիսան»` առանց վարորդի։

«Հեղափոխականների նպատակը պետք է լիներ բարելավել այլոց կյանքը, մինչդեռ իրականում նրանք եկան ու սկսեցին բարելավել իրենց կյանքը», — ընդգծել է Երևանի նախկին քաղաքապետը։

Մարությանն ասել է, որ Երևանի ավագանու ընտրություններում ժողովուրդն իր ձայնը տվել է ոչ թե իշխող «Քաղաքացիական պայմանագիր» կուսակցությանը, այլ «Իմ քայլը» դաշինքին՝ ընդգծելով, որ դաշինքի 57 անդամներից միայն 27-ն էին կուսակցական։

Ըստ նրա՝ իշխող կուսակցության անունը շահարկելով փորձում են սեփականաշնորհել հեղափոխությունը․

«Սա անընդունելի է ինձ ու ինձ նման հազարավոր մարդկանց համար, որոնք ՔՊ անդամ չեն, բայց հեղափոխություն են արել ուղղակի ավելի լավ Հայաստանի երազանքով»։

Ելույթի ավարտին Մարությանը շնորհակալություն է հայտնել համաքաղաքացիներին վստահության համար․

«Կներեք, եթե ինչ-որ բան չհասցրեցի անել», — ասել է նա։