«Ո՞ր ուժի հաղթանակն է հավանական»․ Երևանում նախընտրական քարոզարշավ է մեկնարկել
Երևանի ավագանու ընտրությունների քարոզարշավ
Երևանում մեկնարկել է ավագանու ընտրությունների քարոզարշավը, որը կշարունակվի մինչև սեպտեմբերի 15-ը։ Ընտրությունները կկայանան սեպտեմբերի 17-ին։ Օրերս Կենտրոնական ընտրական հանձնաժողովը հայտնեց, որ գրանցել է առաջադրված բոլոր 14 քաղաքական ուժերին՝ 13 կուսակցություն և 1 դաշինք։
Այս ընտրությունները կարևոր են, որովհետև դրանց արդյունքում փաստացի կպարզվի, թե որ քաղաքական ուժին են նախապատվություն տալիս երևանցիները։ Իսկ մայրաքաղաքում ապրում է Հայաստանի բանկիչների գրեթե կեսը։ Այս ընտրությունների արդյունքների հիման վրա կորոշվի նաև, թե ով է զբաղեցնելու Երևանի քաղաքապետի պաշտոնը:
Քաղաքապետ կարող է դառնալ ընտրություններին մասնակցող այն քաղաքական ուժի՝ դաշինքի կամ կուսակցության ընտրացուցակի առաջին համարը, որը կստանա ավագանու մանդատների 50 տոկոսը և ավելին: Եթե ընտրությունների մասնակիցներից ոչ ոք չկարողանա այդպիսի արդյունք ստանալ, ավագանիում հայտնված կուսակցությունները կարող են կոալիցիա ստեղծել և որոշել, թե ում ընտրել որպես քաղաքապետ:
GALLUP-ի վերջին հարցման արդյունքների համաձայն՝ առաջատար չկա, բայց ամենաշատ պոտենցիալ ձայներ՝ 9,3 % է հավաքել «Քաղաքացիական պայմանագրի» կողմից քաղաքապետի պաշտոնին առաջադրված Տիգրան Ավինյանը։ Նա Հայաստանի նախկին փոխվարչապետն է և ներկա պահին զբաղեցնում է Երևանի փոխքաղաքապետի պաշտոնը։
Ովքե՞ր են մասնակցելու ավագանու ընտրություններին, երևանցիների կարծիքը նրանց մասին, մեկնաբանություն
Ովքե՞ր են առաջադրվել
Օգոստոսի 18-ին Հայաստանի Կենտրոնական ընտրական հանձնաժողովը հաղորդեց, որ գրանցել է 13 կուսակցություն․ Հայաստանի եվրոպական կուսակցություն, «Ժողովրդավարական hամախմբում», «Քաղաքացիական պայմանագիր», «Հանուն սոցիալական արդարության», «Ուժը հայրենյաց», «Հանրային ձայն», «Ազգային առաջընթաց», «Հաղթանակ», «Ապրելու երկիր», «Հանրապետություն», «Միացյալ Հայաստան», «Լուսավոր Հայաստան» և «Արդար Հայաստան»։ Գրանցվել նաև 1 դաշինք՝ «Մայր Հայաստան», որը կազմված է «Երկիր ծիրանի» և «Ինտելեկտուալ Հայաստան» կուսակցություններից։
Քաղաքապետի թեկնածուների մեծ մասը լայն հանրությանը ծանոթ չեն, սակայն նրանց շարքում կան նաև նախկին բարձրաստիճան պաշտոնյաներ․
- իշխող «Քաղաքացիական պայմանագիր» կուսակցության անդամ, փոխքաղաքապետ Տիգրան Ավինյանը,
- «Ազգային առաջընթաց» կուսակցության ցուցակը գլխավորող, Երևանի նախկին քաղաքապետ Հայկ Մարությանը,
- «Ապրելու երկիր» կուսակցության թեկնածու, Հայաստանում և Արցախում սոցիալական ոլորտը ղեկավարած, նախկին նախարար Մանե Թանդիլյանը։
Ընտրություններին մասնակցելու համար գրանցված քաղաքական ուժերի մեծ մասը քարոզարշավի հենց առաջին օրը հանդիպել է Երևանի բնակիչների հետ, ներկայացրել իր ծրագրերը։ Նաև քայլերթեր և հավաքներ են կազմակերպվել։
«Շուրջ 52-55%-ը չի վստահում արդար ընտրությունների անցկացմանը»
Լրագրողների հետ զրույցում նման հայտարարություն էր արել «GALLUP International association»-ի հայաստանյան ներկայացուցչության տնօրեն Արամ Նավասարդյանը։ Նա նման եզրահանգման է եկել ՝ հաշվի առնելով հուլիսի 27-ից օգոստոսի 5-ը իրականացված հեռախոսային հարցումների արդյունքները․
«Հարցվածների միայն 16,1%-ն է միանշանակ հավատում ընտրությունների արդար անցկացմանը, «ավելի շուտ այո» է պատասխանել 28,9%-ը, «ավելի շուտ ոչ»` 19,9%-ը, «միանշանակ ոչ»` 32,1%-ը, հարցին դժվարացել է պատասխանել 3,3%-ը»։
Քաղաքացիների մեծամասնությունը` 33, 4%-ը, դժվարացել է պատասխանել հարցին, թե ում օգտին է պատրաստվում քվեարկել առաջիկա ընտրությունների ժամանակ։ 11%-ը նշել է, որ ոչ մեկի օգտին չի պատրաստվում քվեարկել, 19,2%-ն էլ որոշել է չմասնակցել քվեարկությանը, 5,7%-ը հրաժարվել է մասնակցել հարցմանը։
«Քաղաքացիական պայմանագրի» կողմից առաջադրված Տիգրան Ավինյանի օգտին քվեարկելու պատրաստակամություն է հայտնել հարցվածների 9,3%-ը, նախկին քաղաքապետ Հայկ Մարությանի օգտին` 3,7%-ը։
«Հայաստան» դաշինքի օգտին քվեարկելու պատրաստակամություն է հայտնել 2,8 %-ը, «Ապրելու երկիր» կուսակցության օգտին` 2,2 %-ը, «Լուսավոր Հայաստան» կուսակցության օգտին` 2%-ը։
Այս հարցումն անց էր կացվել թեկնածուների՝ ԿԸՀ-ում գրանցվելուց առաջ, ուստի ներառում էր միայն այն անձանց մասին տվյալներ, որոնք նախապես հայտնել էին առաջադրման մտադրության մասին։ Նախապես նման ցանկություն էին հայտնել նաև ՀՀԿ-ն և «Բարգավաճ Հայաստանը», սակայն հետագայում հայտարարել էին, որ չեն մասնակցի ավագանու ընտրություններին։
GALLUP-ը փորձել է նաև հասկանալ՝ որոնք են մայրաքաղաքի հիմնական խնդիրները։ Ըստ երևանցիների՝ դրանք են՝
- աղբահանության հարցը` 33,4%,
- հասարակական տրանսպորտի խնդիրը` 29%,
- ճանապարհների վատ վիճակն ու խցանումները` 10,5%,
- բնապահպանական խնդիրները` 7%։
Փորձագիտական կարծիք
Քաղտեխնոլոգ Վիգեն Հակոբյանն ասում է՝ իշխանությունները հասկանում են՝ երկրի քաղաքական կենտրոնը, ամենաընդդիմադիր կետը, ազդեցության ու վարկանիշի առումով ամենասուր տեղը Երևանն է: Ըստ այդմ՝ ամեն ինչ անելու են ավագանու ընտրություններում հաղթելու համար։
168.am-ի հետ զրույցում նա նշել է, որ այդ հաղթանակն օրվա իշխանության համար ունի կենսական նշանակություն։
«Այդ հաղթանակով կփորձեն վերադարձնել փաստացի կորցրած լեգիտիմությունը, որովհետև նախորդ ընտրություններում նրանք եկել էին այլ կարգախոսներով, մասնավորապես՝ Արցախի հարցի շուրջ, բայց վերընտրվելուց հետո, ըստ էության, Արցախը հանձնում են»,- նշել է նա։
Քաղտեխնոլոգի գնահատմամբ՝ ներկայիս վարկանիշի պայմաններում Երևանում հաղթելը հեշտ չի լինելու է այսօրվա իշխանության համար։ Նկատել է՝ Տիգրան Ավինյանի՝ փոխքաղաքապետ նշանակվելուց հետո սկսվել է նաև վարչական ռեսուրսի օգտագործումը։
Ինչ վերաբերում է առաջադրված մյուս ուժերին, ըստ նրա, ամեն մեկն իր խնդիրն ու նպատակն ունի։ Ասում է՝ կան ուժեր, որոնք քաղաքական դաշտ մտնելու հայտ են ներկայացնում, կան ուժեր, որոնք հաղթելու նպատակ ունեն, կան նաև «սփոյլեր կուսակցություններ»․
«Նրանց նպատակն է այս կամ այն մայր կուսակցության համար աշխատել և ոչ միայն փորձել փոշիացնել մրցակիցների ձայները, այլև քարոզչական ասպարեզում անել այն, ինչ մայր կուսակցությունն իր պատվից ցածր է համարում՝ սև քարոզչություն կոնկրետ մրցակցի նկատմամբ»։
Քաղտեխնոլոգի գնահատմամբ՝ այս ընտրություններն իրենց բնույթով չեն կարող լինել զուտ համայնքային ընտրություններ, որովհետև «Երևանը Հայաստանի քաղաքական ուղեղն ու սիրտն է, քաղաքական թրենդներն այստեղ են ձևավորվում»։
Կարծում է՝ հաջողության կարող են հասնել այն ուժերը, որոնք կներկայանան «քաղաքական և քաղաքային ծրագրերի հիբրիդով»։ Նրա խոսքով՝ հետագայում որևէ կոալիցիայի մաս կազմելու շանսեր ունեն նախկին քաղաքապետ Հայկ Մարությանի գլխավորած «Ազգային առաջընթացն» ու «Ապրելու երկիր»-ը, որի քաղաքապետի թեկնածուն Արցախի Աշխատանքի, սոցիալական և միգրացիոն հարցերի նախկին նախարար Մանե Թանդիլյանն է։
«Ապրելու երկրի» պարագայում, ըստ իս, պրոցեսի վրա ազդեցություն կունենա հանգամանքը, թե արդյո՞ք այդ կուսակցության դե ֆակտո առաջնորդը՝ Ռուբեն Վարդանյանը [Արցախի նախկին պետնախարար], ով այսօր Արցախում, ըստ էության, ընդդիմությունն է ղեկավարում, որքանով ուղղակիորեն կդիրքավորվի որպես այդ կուսակցության առաջնորդ։ Դիրքավորման դեպքում կուժեղացնի կուսակցության դիրքերը»,- արձանագրել է նա։
Հետևեք մեզ — Facebook | Youtube | Telegram
Երևանի ավագանու ընտրությունների քարոզարշավ
