Փակ միջոցառումներ ամենուր, մասշտաբային շքերթ Բելառուսում․ աշխարհը նշում է Երկրորդ աշխարհամարտի ավարտի 75–ամյակը։ Լուսանկարներ
Մայիսի 8–ին աշխարհը նշում է Երկրորդ աշխարհամարտի՝ մարդկության պատմության ամենաարյունալի պատերազմի ավարտի 75-ամյակը, որն ավելի քան 50 մլն մարդու կյանք է խլել։
Ինչո՞ւ երկու ամսաթիվ
1945 թ–ի մայիսի 8–ին հակահիտլերյան կոալիցիայի միութենական երկրները՝ Մեծ Բրիտանիան, Խորհրդային Միությունն, ԱՄՆ–ն ընդունեցին նացիստական Գերմանիայի անվերապահ կապիտուլյացիան։
Ֆորմալ առումով Երկրորդ աշխարհամարտը տևել է մինչև 1945 թ–ի սեպտեմբերի 2–ը, երբ կապիտուլյացիա է ստորագրել Գերմանիայի դաշնակից Ճապոնական կայսրությունը։
- Ռուսաստան, կորոնավիրուս․ տարօրինակ ցածր մահացություն՝ վարակման հսկայական աճի պայմաններում, ինչպես նաև մահացած բուժաշխատողների շատ մեծ թիվ։ Ինչո՞ւ
- Կարծիք․ ի՞նչ պետք է անեն Ուկրաինան, Վրաստանն ու Մոլդովան համաշխարհային ճգնաժամի պայմաններում արևմտյան ինտեգրացիան շարունակելու համար
- Կորոնավիրուս չինական Ուհանի լաբորատորիայի՞ց, թե՞ տեղեկությունների գաղտնիություն։ Ինչի՞ համար է Արևմուտքը մեղադրում Չինաստանին
- Կորոնավիրուս, վիճակագրությունը Կովկասում և աշխարհում
Ռուսաստանը, Ուկրաինան և Բելառուսն այդ իրադարձությունը տոնում են մայիսի 9–ին։ 1945 թ–ին այդպես է որոշել Ստալինը։ Նա ուզում էր խորհրդային ժողովրդի հիշողությունից ջնջել Երկրորդ աշխարհամարտը, որում ներգրավված էր ողջ աշխարհն, իսկ Խորհրդային Միությունն առաջին երկու տարվա ընթացքում Գերմանիայի դաշնակիցն էր։
Այդ պատճառով էլ ԽՍՀՄ–ում տոնը նշվում էր մայիսի 9–ին, և պատերազմը կոչվում էր ոչ թե Երկրորդ աշխարհամարտ, այլ Հայրենական Մեծ պատերազմ։
Տոն՝ մեկուսացման պայմաններում
1945 թ–ից ի վեր առաջին անգամ է մայիսի 8–ը նշվում Եվրոպայով մեկ զանգվածային հավաքների արգելքի պայմաններում։
Մայիսի 8–ի դրությամբ աշխարհում կորոնավիրուսով է վարակվել գրեթե 4 միլիոն մարդ։ Ավելի քան 270 հազարը մահացել է։
Ֆրանսիայում նախագահ Մակրոնը ծաղիկներ է դրել Անհայտ զինվորի շիրիմին՝ սակավաթիվ պաշտոնյաների ուղեկցությամբ։
Հանրությունից մեկուսացված նույնպիսի միջոցառում է իրականացրել Գերմանիայի կանցլեր Մերկելը Բեռլինի Կենտրոնական ռազմական հուշահամալիրում։
Մեծ Բրիտանիան սահմանափակվել է թագուհու շնորհավորական ուղերձով և համազգային լռության րոպեով։
Մոսկվայում նույնպես չեղարկվել է Կարմիր հրապարկում ավանդական մասշտաբային ռազմական շքերթը։ Իշխանությունները սահմանափակվել են Կրեմլի երկնքում ռազմական ինքնթիռների և ուղղաթիռների թռիչքով։
Միակ շքերթը Մինսկում է
Բացառություն է Բելառուսը, որը չի հրաժարվել մայիսի 9–ին կայանալիք ռազմական շքերթից։
«Պետք է հիշել, որ [Երկրորդ աշխարհամարտի ժամանակ] մարդիկ են զոհվել հանուն մեզ, հնարավոր է նաև՝ վարակներից, ուրիշ հիվանդություններից։ Սակայն նրանք այդ մասին չեն մտածել։ Մտածե՛ք, թե ինչ կասեն մարդիկ։ Միգուցե ոչ միանգամից, հաջորդ օրը, կամ երկու օրից, կասեն՝ մենք վախեցանք», — հայտարարել է Բելառուսի նախագահ Ալեքսանդր Լուկաշենկոն։
Ըստ պաշտոնական վիճակագրության՝ Բելառուսում ավելի քան 20 հազար վարակված կա, 116 մարդ է մահացել։ Շատ փորձագետներ և ակտիվիստներ կարծում են, որ այդ թվերը մեծապես նվազեցված են։
Լուկաշենկոն Մինսկ է հրավիրել բոլոր եվրոպական և հետխորհրդային առաջնորդներին՝ շքերթին մասնակցելու, սակայն ոչ ոք չի համաձայնել։
Առողջապահության համաշխարհային կազմակերպությունը մտահոգություն է հայտնել մայիսի 9–ին զանգվածային միջոցառումներ անցկացնելու Բելառուսի իշխանությունների որոշման առնչությամբ։
Իսկ Եվրամիությունը Covid-19–ի համաճարակի հետևանքների հաղթահարման համար ֆինանսական օգնության տրամարդումը կապել է նրա հետ, որ Մինսկն անվերապահորեն հետևի սոցիալական հեռավորության պահպանման կանոններին։ Բելառուսին խոստացվել է 60 մլն եվրոյի օգնություն։
Եվ դիվանագիտական, և ֆինանսական կորուստները և, հավանաբար, մարդկային կորուստները համավարակի տարածումից ակնհայտ են, սակայն Մինսկը պնդում է, որ շքերթն անցկացվի։
