Հայաստանի սահմանը հատած երկրորդ ադրբեջանցին հայտնաբերվել է
Երկրորդ ադրբեջանցին հայտնաբերվել է
«Հայաստանի տարածքում հայտնաբերվել և ձերբակալվել է ադրբեջանցի երկրորդ զինծառայողը»,- այսօր հայտնել է երկրի պաշտպանական գերատեսչությունը՝ առանց մանրամասներ հաղորդելու։
Նա իր ծառայակցի հետ Հայաստանի սահմանը հատել էր, ենթադրաբար, ապրիլի 9-ին։ Հաջորդ օրը ծառայակիցը հայտնաբերվել էր Սյունիքի մարզի Աշոտավան համայնքում՝ շուրջ 20 կմ սահմանից հեռու։
Թե ինչու են հատել սահմանը՝ պարզ չէ։ Ադրբեջանը պնդում է, որ նրանք մոլորվել են։ Մինչ Հայաստանի իրավապահ մարմինները լռություն էին պահպանում, վարչապետ Նիկոլ Փաշինյանը նախօրեին հայտարարեց՝ «քննչական գործողությունների արդյունքում» պարզվել է, որ նրանք լքել են իրենց դիրքերը ճնշումների ենթարկվելու պատճառով։ Փաշինյանը, սակայն, չպարզաբանեց՝ ինչպե՞ս է ստացվել, որ ադրբեջանցիներին հաջողվել է շուրջ 20 կմ խորանալ Հայաստանի ինքնիշխան տարածքում։ Ասաց՝ քննություն պետք է տարվի։
Ապրիլի 10-ին հաղորդվեց, որ Հայաստանի սահմանը հատել են երկու ադրբեջանցիներ, որոնցից մեկին բնակիչները նկատել են Սյունիքի Բնունիս համայնքում, այնուհետև հայտնաբերել Աշոտավանի փողոցներից մեկում։ Աշոտավան համայնքի ղեկավարը պատմել էր, որ հանդիպել է նրան։ 19-ամյա ադրբեջանցի զինծառայողը պատմել է, թե Նախիջևանի դիրքերից փախել են, քանի որ իրենց այնտեղ շատ են նվաստացրել։
Մինչ Երևանն ու Բաքուն խոոսում են Հայաստանի սահմանը հատած երկու ադրբեջանցիների մասին, Բնունիս համայնքի բնակիչները պնդում են՝ երեքն են եղել, նրանց ֆիքսել են այն տան տեսախցիկները, որի դուռը թակել է ադրբեջանցիներից մեկը։
Կապանում են գտել․ կապ ունի՞ սպանության հետ
Կապան քաղաքում հայտնաբերված ադրբեջանցի զինծառայողն այս պահին ոստիկանության բաժանմունքում է։ Երեկ՝ ապրիլի 12-ին Կապանում սպանվել էր Զանգեզուրի պղնձամոլիբդենային կոմբինատի պահնորդ Հայրապետ Մելիքսեթյանը։ Հայաստանյան լրատվամիջոցներում շրջանառվում էր նաև ադրբեջանցիների կողմից սպանության վարկածը։ Քննչական կոմիտեի խոսնակը նշել էր, որ «հանցագործությունն ադրբեջանցիների կողմից կատարված լինելու վերաբերյալ քննությամբ որևէ տվյալ չի ստացվել»։
Տելեգրամյան ալիքները, սակայն, գրում են, որ ադրբեջանցի զինծառայողը հայտնաբերվել է հանցագործության վայրից քիչ հեռու, նրա մոտ գտել են նաև սպանված պահնորդի բջջային հեռախոսը։
Երեկ Հայաստանի վարչապետը հայտարարել էր, որ կան տեղեկություններ այն մասին, թե փնտրվող զինվորն իբր «սահմանը հատելուց շատ չանցած՝ հենց սահմանամերձ գյուղում ասել է, որ փոշմանել է և ուզում է վերադառնալ»։
Դիվերսանտնե՞ր են
Ադրբեջանի ՊՆ փոխանցմամբ՝ ադրբեջանական բանակի երկու զինծառայողները մոլորվել են «անբարենպաստ եղանակային և սահմանափակ տեսանելիության պայմաններում»։ Հայաստանում նույնպես շրջանառվում էր այդ վարկածը։ Խորհրդարանական ընդդիմությունը, սակայն, նշում է, որ կարող էր լինել Հայաստանի սահմանը հատելու երկու պատճառ․
«Առաջինը՝ հաշվի առնելով, որ սահմանի նախիջևանյան հատվածում լեռնաանտառային պայմաններ են, հնարավոր է ձյան հալվելու հետ մեկտեղ ինչ-որ արահետ է բացվել, և ադրբեջանցի զինծառայողները մոլորվել են։ Եվ երկրորդ՝ իրենք հատուկ գործողությունների համար են ներթափանցել ՀՀ տարածք»,- ասել է «Հայաստան» խմբակցության ղեկավար Սեյրան Օհանյանը։
Լրագրողները հետաքրքրվել են՝ արդյո՞ք երկու հոգով կարող էին գալ «հատուկ գործողություն» իրականացնելու։ Ի պատասխան նախկին պաշտպանության նախարարը նշել է՝ ամեն ինչ էլ սպասելի է։
Կփոխանակվե՞ն հայ գերիների հետ
Այն պահից, երբ հայտնի դարձավ, որ Հայաստանի տարածք ադրբեջանցիներ են մտել, հասարակությունը սկսեց ակտիվորեն քննարկել թեման և կառավարությունից պահանջել, որ նրանց ձերբակալեն ու անմիջապես փոխանակեն Բաքվում պահվող հայ գերիների հետ։
Իշխող ուժը պնդում է՝ գերիների հարցը երբեք չի դարձրել բանակցությունների հիմք։
«2020 թ․-ին նոյեմբերի 9-ի հայտարարությունը հստակ է, բոլոր գերիները և այլ պահվող անձինք պետք է անմիջապես վերադարձվեն, և այս պահանջը Ադրբեջանը երկու տարուց ավելի է, ինչ չի կատարում»,- այսպես է արձագանքել «Քաղաքացիական պայմանագիր» խմբակցության պատգամավոր Սարգիս Խանդանյանը։
«Բռնի ձևերով չենք կարող վերադարձնել»
Նախօրեին խորհրդարանում թեմային անդրադարձել էր Հայաստանի վարչապետը։ Այդ ժամանակ դեռևս մեկ ադրբեջանցու ձերբակալության մասին էր հայտնի։ Փաշինյանը հայտարարել էր, որ ամենևին փաստ չէ, որ նա ուզում է վերադառնալ Ադրբեջան։
«Մեր միջազգայնորեն ստանձնած պարտավորություններով, եթե նման իրավիճակում հայտնված մարդը չի ցանկանում վերադառնալ, մենք բռնի ձևերով չենք կարող նրան ուղղակի վերադարձնել, գոնե այս պահին այդպիսի ցանկություն զինվորը չի հայտնել։ Եթե հայտնի, այդ դեպքում արդեն մնացած հարցերը [վերադարձը կամ փոխանակումը հայ գերիների հետ — JAMnews] գուցե քննարկելի կլինեն»,- ընդգծել էր նա։
Հայաստանի վարչապետը պնդել էր՝ ադրբեջանցի զինծառայողներն իրենց դիրքերից փախուստի են դիմել «համածառայակիցների կողմից ճնշումների և նվաստացումների ենթարկվելու պատճառով»։
«Եվ այս համատեքստում կան շատ քննարկումներ՝ բա էդ ո՞նց է, որ զինվորները տենց անարգել հատել են սահմանը, եկել, անցել են, հասել են ինչ-որ տեղեր։ Իհարկե, այդ հանգամանքը պետք է առանձին քննվի, և պետք է հետևություններ արվեն սահմանային անվտանգությունն ապահովելու առումով»,- ասել էր նա։
Հետևեք մեզ — Facebook | Youtube | Telegram
Երկրորդ ադրբեջանցին հայտնաբերվել է
