Եվրաքվեի նախաձեռնողները ԿԸՀ հանձնեցին շուրջ 60 հազար ստորագրություն
Եվրաքվեն ավարտեց․ ի՞նչ սպասել
Սեպտեմբերի 16-ին Հայաստանում մեկնարկած Եվրաքվեն մոտենում է ավարտին։ Նախաձեռնող խմբի՝ «Ժողովրդավարական ուժերի հարթակ»-ի ներկայացուցիչ, փաստաբան Արտակ Զեյնալյանի փոխանցմամբ՝ հաջողվել է հավաքել 59․742 ստորագրություն։ Քանի որ ի սկզբանե ստորագրահավաքի վերջնաժամկետ էր սահմանվել նոյեմբերի 14-ը, էլեկտրոնային եղանակով ստորագրահավաքը դեռ կշարունակվի։
Այսօր նախաձեռնող խմբի ներկայացուցիչները Կենտրոնական ընտրական հանձնաժողով են ներկայացրել շուրջ 60 հազար ստորագրություն՝ պահանջվող 50 հազարի փոխարեն։
Եթե հանձնաժողովը հաստատի դրանց վավերականությունը, Հայաստանի՝ ԵՄ անդամակցության հարցով հանրաքվե անցկացնելու մասին նախագիծը կքննարկվի խորհրդարանում։
Ընթացակարգի համաձայն՝ Ազգային ժողովում հավանության չարժանանալու դեպքում օրենքի ուժով հանրաքվե կարող է անցկացվել միայն այն պարագայում, եթե նախաձեռնող խումբը ևս մեկ ստորագրահավաք անցկացնի և հավաքի 300 հազար ստորագրություն։ Այդ պարագայում, սակայն, արդեն իսկ ստորագրած շուրջ 60 հազար քաղաքացիները չեն կարող միանալ Եվրաքվեին։
«Ժողովրդավարական ուժերի հարթակի» մաս են կազմում արտախորհրդարանական 4 ուժեր՝ «Հանուն հանրապետության» կուսակցությունը, «Հայաստանի եվրոպական կուսակցությունը», «Հանրապետություն» կուսակցությունը, «Ազատ քաղաքացի» ՀԿ–ն։ Հունիս ամսին հարթակը Հայաստանի՝ ԵՄ անդամակցության հարցով հանրաքվե անցկացնելու թեմայով խորհրդարանական լսումներ էր հրավիրել։ Ավելի ուշ՝ սեպտեմբերին մեկնարկեցին ստորագրահավաք՝ նախագիծը խորհրդարանի օրակարգ բերելու նպատակով։
ԿԸՀ-ն անցնում է ստորագրությունների վավերականության ստուգման
Կենտրոնական ընտրական հանձնաժողովը պետք է հաստատի ներկայացված ստորագրությունների վավերականությունը։ ԿԸՀ նախագահի տեղակալ Նունե Հովհաննիսյանի փոխանցմամբ՝ այդ նպատակով քաղաքացիների տվյալները համադրելու են Բնակչության պետական ռեգիստրում առկա տվյալների հետ․
«Բնակչության պետական ռեգիստրը մեզ հնարավորություն է տալիս տվյալ քաղաքացու անուն-ազգանունը և անձնագրի տվյալները մուտքագրելուց հետո հավաստիանալ, որ վերջինս այդ պահին ուներ ստորագրահավաքին միանալու իրավունք»։
Լրագրողների հետ զրույցում Հովհաննիսյանը նաև նշել է, թե որ դեպքում ստորագրությունը կարող է չհաշվարկվել․
«Հանրաքվեի մասին օրենքի, ինչպես նաև ԿԸՀ կարգի համաձայն՝ ստորագրությունը հանվում է ցանկից, եթե թերի է լրացված, այսինքն՝ ինչ-որ տվյալներ պակաս են, և եթե առկա է կրկնություն։ Այդ դեպքում հաշվարկվում է տվյալ քաղաքացու միայն մեկ ստորագրություն»։
ԿԸՀ նախագահի տեղակալի խոսքով՝ եթե հանձնաժողովը հաստատի անհրաժեշտ քանակի՝ առնվազն 50 հազար ստորագրությունների վավերականությունը, կհրավիրվի նիստ, կհրապարակվի այդ մասին որոշում։ Ասում է՝ որոշումը ստանալուց հետո նախաձեռնող խումբը կարող է իր հեղինակած նախագիծը ներկայացնել Ազգային ժողով։
«Օրենքի նախագիծը չի սահմանափակելու ՀՀ իշխանությունների ճկունությունը»
Նախաձեռնող խմբի անդամ Արտակ Զեյնալյանը հայտնել է, որ շուրջ 60 հազար ստորագրությունները հավաքել են ընդամենը 60 կետերից, քանի որ ոչ բոլոր համայնքներում են եղել աշխատակիցներ, ովքեր շուրջ երկու ամիս պետք է համակարգեին բացառապես ստորագրահավաքի աշխատանքները։
Նրա դիտարկմամբ՝ հատկապես ակտիվ են եղել Երևանի, Գյումրու և Վանաձորի բնակիչները, բայց «շատ մեծ էնտուզիազմ» է նկատվել ամեն տեղ․
«Հասարակությունը շատ բարձր գիտակցական մակարդակ ունի, գիտի՝ ինչի համար է գնում ստորագրելու»։
Զեյնալյանն անդրադարձել է նաև ԿԸՀ հնարավոր հաստատումից հետո նախագծի շրջանառությանը։ Ասում է՝ նախ այն պետք է քննարկվի ԱԺ գլխադասային հանձնաժողովում, արժանանա դրական եզրակացության, որից հետո միայն մտնի լիագումար նիստերի օրակարգ, քննարկվի առաջին և երկրորդ ընթերցմամբ․
«Ինչպե՞ս սրան կվերաբերվի քաղաքական մեծամասնությունը։ Մենք օրենքի նախագիծը ձևակերպել ենք այնպես, որ այն հնարավորինս օգնի ՀՀ-ին իր նպատակներին հասնելու համար։ Այն որևէ կերպ խոչընդոտ չի ստեղծելու և չի սահմանափակելու Հայաստանի իշխանության ճկունությունը»։
Զեյնալյանը, սակայն, չի հստակեցրել՝ արդյոք կգնան երկրորդ փուլի և կփորձեն հավաքել 300 հազար ստորագրություն, եթե այս փորձը ձախողվի։ Նշել է, որ այդ քաղաքական որոշումը պետք է կայացնի նախաձեռնող խումբը։
«Պետք է նկատի ունենալ, որ սկսված գործընթացը տևելու է 2-3- ամիս՝ մոտ մեկ ամիս ԿԸՀ-ում, հետո՝ խորհրդարանում։ Արդեն քթներիս տակ 2026 թ․ ընտրություններն են։ Պետք է այս ամբողջը իրար հետ համադրել»,- մանրամասնել է նա։
ԵՄ-ն պատրա՞ստ է․ իշխանության կարծիքը
Խորհրդարանի իշխող «Քաղաքացիական պայմանագիր» խմբակցության ներկայացուցիչները պարբերաբար հայտարարում են, որ հանրաքվեն պետք է լինի ՀՀ եվրաինտեգրման վերջին, ոչ թե առաջին քայլը։
Նախաձեռնող խմբի անդամները հակադարձում են՝ պնդելով, որ «այս հանրաքվեն ԵՄ-ին ՀՀ անդամակցության գործընթացի մեկնարկն ազդարարելու համար է, չի փոխարինում այն հանրաքվեին, որը պետք իրականացվի ավելի ուշ՝ միջազգային պայմանագիր ստորագրելիս»։
«Բնականաբար, պետք է լինի անդամակցության հայտ, համապատասխանեցում, մոտարկում [ԵՄ ստանդարտներին], այնուհետև անդամության թեկնածուի կարգավիճակի ստացում։ Դրանից հետո, երբ ստորագրվի միջազգային պայմանագիրը, այն պարտադիր կերպով պետք է դրվի հանրաքվեի հետևյալ հարցով՝ «Համաձա՞յն եք արդյոք անդամակցել ԵՄ-ին»,- մեկ ամիս առաջ ասել էր փաստաբան Արտակ Զեյնալյանը։
Արտախորհրդարանական ուժերի նախաձեռնությանն ավելի վաղ անդրադարձել էր նաև վարչապետ Նիկոլ Փաշինյանը։ Նա ասել է, որ նման հանրաքվեի համար քարոզարշավ է պետք։ Նշել է, որ քաղաքացիներն այդ քարոզարշավի ժամանակ հարցեր են հնչելու՝ ինչպե՞ս, ե՞րբ, ինչքա՞ն ժամանակում, ի՞նչ քայլերով, Եվրամիությունն ուզում է դա, թե՞ չի ուզում, Եվրամիությունը պատրա՞ստ է։
«Ասելու են՝ Դուք հայտարարեցիք, որ Հայաստանը պատրաստ է լինել այնքան մոտիկ, ինչքան Եվրամիությունն է պատրաստ։ Հիմա հարց՝ Եվրամիությունն ինչքանո՞վ է պատրաստ։ Այդ հարցի պատասխանը ես կարո՞ղ եմ տալ այսօր, ո՛չ, չեմ կարող տալ»,— հայտարարել էր վարչապետը։
Հետևեք մեզ — Facebook | Youtube | Telegram
Եվրաքվեն ավարտեց․ ի՞նչ սպասել
