«Եթե հնարավոր լինի, կաթողիկոսի դեմ փաստերը կգաղտնազերծվեն»․ ՀՀ արդարադատության նախարար
Գարեգին Բ-ի դեմ փաստեր կան
Հայաստանի արդարադատության նախարար Սրբուհի Գալյանի խոսքով՝ վարչապետին ենթակա մարմինները տիրապետում են Ամենայն հայոց կաթողիկոսի վերաբերյալ փաստերի։ Գալյանը Factor TV-ի եթերում հայտարարել է, որ հասարակական պահանջի և հանրայնացնելու հնարավորության պարագայում «կառավարությունը վաղ, թե ուշ կգնա դրանք գաղտնազերծելու ճանապարհով»։
«Ինձ պետք չէ կաթողիկոս, որ ենթարկվի ինձ, ինձ պետք է կաթողիկոս, որ չենթարկվի օտարերկրյա հատուկ ծառայության ավագ լեյտենանտի և ամենօրյա ռեժիմով չզեկուցի օտարերկրյա հատուկ ծառայության լեյտենանտներին»,- օրեր առաջ ԱԺ ամբիոնից հայտարարել էր վարչապետ Նիկոլ Փաշինյանը։
Արդարադատության նախարար Սրբուհի Գալյանը վստահում է հնչեցված մտքին, թեև նման ինֆորմացիայի չի տիրապետում։ Գալյանը նշել է, որ չի տիրապետում նաև տեղեկատվության, որ Փաշինյանը ԱԱԾ աշխատակիցների միջոցով հոգևորականներին խնդրում է իր մասնակցությամբ պատարագների ժամանակ զեղչել Գարեգին Բ-ի անունը։ Ինքը՝ Փաշինյանն, այդ մասին խոստովանել էր ուղիղ եթերում՝ լրագրողների հետ ճեպազրույցում։
«Եթե տեսնում եք այդտեղ խնդիր, ինչո՞ւ հաղորդում չի ներկայացվում, օրինակ՝ Գլխավոր դատախազություն»,- առաջարկել է նախարարն ու հավելել՝ վարչապետի խնդրանքի մեջ խնդիր չի տեսնում։
Հարցազրույցում նախարարն անդրադարձել է նաև եկեղեցու շուրջ զարգացումների վերաբերյալ քաղհասարակության ներկայացուցիչների հայտարարությանը։ Այդ հայտարարությունը, ըստ նրա, դժվար է համարել խնդրի բարձրաձայնում: Գալյանը չի կիսում ՀԿ-ների տեսակետը, թե պետությունը միջամտում է եկեղեցու ներքին գործերին:
- «Ամենայն հայոց կաթողիկոսը չի գնա դասալքության»․ Մայր Աթոռի դիվանապետ
- «Կաթողիկոսը պարտվեց վստահության հանրաքվեն Էջմիածնում»․ կարծիք ՏԻՄ ընտրությունների մասին
- «Մայր Աթոռի ազատագրման մեկնարկ». Փաշինյանի մասնակցությամբ պատարագն առանց միջադեպերի չանցավ
ՀԿ-ներ․ «Ականատես ենք լինում եկեղեցու ինքնավարության իրավունքի կոպիտ խախտման»
Եկեղեցի-իշխանություն հակասությունների ֆոնին նախօրեին հայտարարություն են տարածել ՀՀ քաղհասարակության ներկայացուցիչները։ 12 ՀԿ-ներ, ինչպես նաև անհատ իրավապաշտպաններ և փորձագետներ ահազանգել են «եկեղեցու ինքնավարության իրավունքի կոպիտ խախտման» մասին։
«Հայաստանի գործադիր և օրենսդիր մարմինների ներկայացուցիչները շարունակում են միջամտել եկեղեցու գործունեության ինքնավարությանը և ազատությանը»,- ասված է հայտարարության մեջ:
Քաղհասարակության դիտարկմամբ՝ այդպիսով խախտվել են Սահմանադրությունը, ինչպես նաև «Խղճի ազատության և կրոնական կազմակերպությունների մասին» ՀՀ օրենքը, Կրոնի կամ համոզմունքի ազատության միջազգային նորմերը․
«Ապօրինի և դատապարտելի են իշխանության փորձերը միջամտելու եկեղեցական կառավարման մարմինների ձևավորմանը և ներքին որոշումների կայացմանը»։
ՀԿ ներկայացուցիչներն անընդունելի և դատապարտելի են համարել նաև՝
- եկեղեցու ավանդույթի, ծեսերի, խորհուրդների, նվիրապետական կարգի կամայական խմբագրման կամ փոփոխության ենթարկելու փորձերը,
- ուժային կառույցների, ներառյալ ԱԱԾ կողմից եկեղեցու սպասավորների նկատմամբ ճնշման գործադրումը,
- եկեղեցու սպասավորների նկատմամբ ատելություն ու վիրավորանք պարունակող խոսույթի ձևավորումը, անձնական կյանքի վերաբերյալ տեղեկությունների ապօրինի տարածումը՝ գործի դնելով ինչպես հանրային, այնպես էլ մասնավոր տեղեկատվական խողովակները։
Հայտարարությամբ իրավապաշտպանները վարչապետ Նիկոլ Փաշինյանից պահանջել են ձեռնպահ մնալ եկեղեցու գործունեության ազատությունն ու ինքնավարությունը խախտող գործողություններից, ինչպես նաև դատական իշխանության մարմինների և իրավապահ համակարգերի վրա ոչ իրավաչափ ազդեցություն ունենալուց։
Իրավապահ համակարգի և ուժային կառույցների ներկայացուցիչներին էլ հորդորել են իրենց գործառույթներն իրականացնել անկախ, ՀՀ Սահմանադրության և օրենքների պահանջների համաձայն։
«Չենք խառնվում եկեղեցու գործերին»․ նախարարը հակադարձում է
Արդարադատության նախարար Սրբուհի Գալյանն ընդգծել է՝ կարգալույծ լինելու ենթակա անձը չի կարող «զբաղեցնել այն պաշտոնը, որը զբաղեցնում է»։ Կաթողիկոսի՝ կարգալույծ լինելու հիմքերի մասին, սակայն, ոչինչ չի ասել։
Միայն նշել է, որ հանրությունն ունի կասկածներ, որոնք չեն փարատվում։ Ամենայն հավանականությամբ, Գալյանը նկատի ունի Գարեգին Բ-ի՝ կուսակրոնության ուխտը խախտելու և դուստր ունենալու մասին տեղեկությունները։ Factor TV-ի եթերում նախարարից հետաքրքրվել են՝ ի՞նչ անառարկելի փաստեր ունի իշխող թիմը։
«Ես ԴՆԹ թեստ անձամբ չեմ արել, բայց վստահաբար շոշափում եմ հանրային ընկալումները, և առնվազն ինձ համար այդ ընկալումները միանշանակ են»,- հայտարարել է նա։
Գալյանի խոսքով՝ բազմիցս բարձրաձայնված խնդիրները կապված են ոչ թե եկեղեցու, այլ որոշ եկեղեցականների հետ, որոնք խախտել են հենց եկեղեցական կանոնները․
«Այն ամենն, ինչ տեսնում ենք այսօր, միտված է հենց այդ խնդիրների հաղթահարմանը։ Կառավարությունը կարող է առաջնորդել քաղաքացիներին, բայց այս ամենի հիմքում քաղաքացին և իր ցանկությունն է»։
Նախարարը չի կիսում քաղհասարակության այն կարծիքը, թե պետությունը խառնվում է եկեղեցու գործերին։
«Ոչ թե պետությունը, այլ որոշ պետական պաշտոն զբաղեցնող անձինք բարձրաձայնում են այն խնդիրները, որոնք կապված են որոշ եկեղեցականների հետ։ Խնդիրների մասին բարձրաձայնել կարող է ցանկացածը, այդ թվում՝ պաշտոնատար անձը»,- նկատել է նա։
Սրբուհի Գալյանն ուշադրություն է հրավիրել այն հանգամանքի վրա, որ որոշ հոգևորականներ զբաղված են ոչ թե եկեղեցական, այլ քաղաքական գործունեությամբ։
«Տեսել ենք, թե ինչպես է «օրհնություն» տրվում ընդդիմադիր քաղաքական գործիչներին, ինչպես է մի եկեղեցական առաջնորդում քաղաքական գաղափարների իրացման ճանապարհը [նկատի ունի «Սրբազան շարժման» առաջնորդ Բագրատ արքեպիսկոպոս Գալստանյանին]։ Եկեղեցին չպետք է և չի կարող մասնակցել նախընտրական քարոզարշավին։ Մենք ունենք նմանատիպ արգելք։ Ենթադրվում է, որ եկեղեցին պետք է լինի ապաքաղաքական»,- արձանագրել է պաշտոնյան։
Հետևեք մեզ — Facebook | Youtube
Գարեգին Բ-ի դեմ փաստեր կան
