Բուքմեքերների բողոքը․ Հայաստանում հազարավոր մարդիկ կարող են առանց աշխատանքի մնալ

Հայաստանում բուքմեքերական կազմակերպությունների աշխատակիցները մայիսի 29-ի առավոտյան բողոքի ցույց էին կազմակերպել։ Ակտվիստները փակել էին Բաղրամյան պողոտան, որում է գտնվում Ազգային ժողովը՝ Երևանի հենց կենտրոնում։ Հարյուրավոր ցուցարարներ բողոքում էին խորհրդարանի օրակարգում գտնվող՝ բուքմեքերական ընկերությունների գործունեության սահմանափակման մասին օրինագծի դեմ։ Նրանք պահանջում էին չեղարկել կամ հետաձգել օրենքի ընդունումը, քանի որ հազարավոր մարդիկ կարող են առանց աշխատանքի մնալ։

• 100 փաստ վարչապետից՝ նոր Հայաստանի մասին

• Կարմիր գիծ․ որտե՞ղ է այն անցնում Ադրբեջանի լրագրողների համար

Ինչի՞ց ամեն ինչ սկսվեց

Ամեն ինչ սկսվեց «Վիճակախաղերի մասին» օրենքում փոփոխություններ մտցնելու մասին նախաձեռնությունից։ Նախագիծը մշակվել էր մոլախաղերի դեմ պայքարի շրջանակում։ Այդ օրինագծի համաձայն՝ 2020թ-ի նոյեմբերից բուքմեքերական գրասենյակների գործունեությունը պլանավորվում է արգելել։ Օրենքը չի շրջանցել բազմաթիվ խաղային ապարատները, որոնք տեղադրված են, մասնավորապես, ավտոմոբիլային գազալցակայաններում։ Այն ենթադրում է այդ ապարատների ապամոնտաժում այն պահից,  երբ օրենքն ուժի մեջ կմտնի։

Սա բողոքի առաջին ցույցը չէ, որ անցկացնում են բուքմեքերները։ Ավելի վաղ ցուցարարնրը բողոք էին հայտնել կառավարության շենքի մոտ։ Այն ժամանակ «Գուդվին բեթ» ընկերության ներկայացուցիչը հայտարարել էր, որ ընկերությունում 400 մարդ է աշխատում, և եթե օրենքն ուժի մեջ մտնի, բոլորն առանց աշխատանքի կմնան։

«Աշխատատեղեր չեն առաջարկում, եղածներն էլ փակում են», — բողոքում էին բուքմեքերական ընկերությունների աշխատակիցները։

Այն ժամանակ ցուցարարներին էր հանդիպել Հայաստանի վարչապետ Նիկոլ Փաշինյանը։ Նա պատմել էր նրանց, որ խորհրդարանական ընտրություններին նախաշեմին ընտրողների հետ հանդիպումների ժամանակ մարդիկ իրենից պահանջում էին արգելել բուքմեքերական ընկերությունների գործունեությունը։

«Մարդիկ աշխատավարձ են ստանում, սակայն տուն չեն հասցնում, խաղում են։ Դրանք [բուքմեքերական գրասենյակներն] ամեն քայլափոխին են։ Ես այդպիսի բողոքներ ստացել եմ յուրաքանչյուր քաղաքում և գյուղում, Երևանում», — ցուցարարներին ասել էր Փաշինյանը։

Նրանք հակադարձել էին․

«Մարդիկ խաղալու հնարավորություն ունեն նաև առցանց տիրույթում։ Բուքմեքերական կենտրոնների գործունեությունը չի կարող փոխել խաղացողի գիտակցությունը»։

Ինչո՞վ ավարտվեց խորհրդարանի մոտ ցույցը

Ցուցարարները հանդիպում պահանջեցին խորհրդարանի խոսնակ Արարատ Միրզոյանի հետ, սակայն նա չկարողացավ ընդունել նրանց։ Ազգային ժողովի շենքի մոտ պողոտան մի քանի ժամ փակելուց հետո մի խումբ ակտիվիստներ բանակցություններ անցկացրին  տնտեսական հարցերով խորհրդարանական հանձնաժողովի ղեկավար Բաբկեն Թունյանի հետ։

«Միրզոյանը զբաղված էր, և մենք զիջումների գնացինք, հանդիպեցինք տնտեսական հարցերով հանձնաժողովի նախագահի հետ։ Թունյանն ու հանդիպմանը ներկա մյուս պատգամավորները խոստացան լրացուցիչ լսումներ կազմակերպել և հաշվի առնել մեր առաջարկները», — պատմել է «Գուդվին բեթ» ընկերության տնօրեն Սարգիս Միքայելյանը հանդիպումից հետո։

Ազգային ժողովի տնտեսական հարցերով հանձնաժողովի ղեկավարը խոստացավ ցույցի ակտիվիստներին, որ բուքմեքերական ընկերությունները չեն փակվի մոտակա մեկուկես տարում։

«Մենք որոշեցինք հետաձգել բուքմեքերական կենտրոնների արգելքը, սակայն խաղային ապարատների արգելն ուժի մեջ է մտնելու օրինագծի ընդունումից անմիջապես հետո։ Այժմ նրանք ուզում են, որ մենք թույլ տանք նրանց մի որոշ ժամանակ էր օգտագործել ապարատները։ Մենք խոստացել ենք, որ հանձնաժողովի նիստին նախագծի առաջին և երկրորդ ընթերցման միջև կքննարկենք այս առաջարկը։ Տեսնենք, թե ինչ կարելի է անել», — հայտարարել է Բաբկեն Թունյանը։

Այդ հանդիպումից հետո ցույցի մասնակիցներն ապաարգելափակեցին խորհրդարանին հարող պողոտան և տուն վերադարձան։