ԼՂ-ից բռնի տեղահանվածների գրավադրած ոսկիները կվերադարձվեն
Արցախցիների վարկերը կներվեն
Հայաստանի կառավարությունը որոշել է ներել Լեռնային Ղարաբաղից բռնի տեղահանված անձանց՝ գրավի դիմաց վերցրած վարկերը և վերադարձնել գրավի առարկա հանդիսացող ոսկյա զարդերը։ Խոսքը շուրջ 1800 քաղաքացիների մասին է և այն վարկերի, որոնք չեն գերազանցում 2.5 մլն դրամը:
Ֆինանսների նախարար Վահե Հովհաննիսյանի փոխանցմամբ՝ կան նաև ավելի մեծ պարտավորություններ ունեցող արցախցիներ, նրանց թիվը մեծ չէ՝ 20 անձ: Այս անձանց վերաբերյալ որոշում կկայացվի հավելյալ ուսումնասիրությունից հետո միայն: Վարչապետ Նիկոլ Փաշինյանի հանձնարարականն է:
Ֆինանսների նախարար Վահե Հովհաննիսյանը հիշեցրել է, որ Լեռնային Ղարաբաղի կառավարության և նրա ստեղծած հիմնադրամների, ինչպես նաև ֆիզիկական անձանց նկատմամբ ՀՀ առևտրային բանկերի, վարկային և ապահովագրական կազմակերպությունների դրամական պահանջները զիջվել են Հայաստանի կառավարությանը, որոնց դիմաց վերջիններիս օգտին թողարկվել են գանձապետական պարտատոմսեր։ Զիջված պահանջների շարքում են նաև ֆիզիկական անձանց՝ ոսկյա իրերի գրավադրմամբ վարկային պարտավորությունները։
2023 թ. դեկտեմբերի վերջի դրությամբ՝ Արցախի ընդհանուր վարկային պարտքերը կազմում են շուրջ 315 մլրդ դրամ։ Կառավարությունը որոշել է իր վրա վերցնել այդ պարտքերի 70 տոկոսը, բանկերը համաձայնել են իրենց հաշվեկշռից դուրս գրել մնացած 30 տոկոսը։ Սակայն չեն ներել դրանք, այլ փոխանցել են կառավարությանը դրանց պահանջի իրավունքը։
«Նախագծով առաջարկվում է ներել ոսկյա իրերի գրավադրմամբ տրամադրված սպառողական վարկերով առանձին ֆիզիկական անձանց մինչև 5 միլիոն դրամ գումարի չափով վարկային պարտավորությունները և հնարավորություն ստեղծել վերադարձնել գրավադրված ոսկյա իրերը»,- որոշման նախագիծը ներկայացնելիս ասել է Հովհաննիսյանը:
Վարչապետ Նիկոլ Փաշինյանը, սակայն, առաջարկել է որպես վերին շեմ դիտարկել 2.5 մլն դրամը, մյուսների հարցը քննարկել ավելի ուշ՝ հավելյալ ուսումնասիրություններ իրականացնելուց հետո:
Շուրջ 7800 ոսկյա իրեր կվերադարձվեն
Ֆինանսների նախարարության փոխանցմամբ՝ ի սկզբանե ոսկու գրավադրման արդյունքում վարկային պարտավորություններ են ունեցել շուրջ 6000 արցախցիներ:
«ԼՂ-ից բռնի տեղահանման ժամանակ բանկերը արդեն տրամադրել էին վարկառուների մի մասին, և կար մի որոշ մաս, որ տեղափոխվել էին Հայաստան։ Խոսքը մոտ 1800 վարկի մասին է»,- մանրամասնել է նախարարը:
Վահե Հովհաննիսյանի խոսքով՝ ֆինանսական կազմակերպություններում շարունակում է պահվել գրավադրված մոտ 30 կգ քաշով շուրջ 7 800 ոսկյա իր։ Մոտ 2,3 միլիարդ դրամ ընդհանուր մնացորդով պարտավորությունների կազմը հետևյալն է՝
- մինչև 500 հազար դրամի չափով՝ 5241 հատ,
- 500 հազարից 1 միլիոն դրամի չափով՝ 718 հատ,
- 1 միլիոնից 2 միլիոն դրամի չափով՝ 221 հատ,
- 2 միլիոնից 2,5 միլիոն դրամի չափով՝ 25 հատ,
- 2,5 միլիոնից 5 միլիոն դրամից չափով՝ 15 հատ,
- 5 միլիոն դրամը գերազանցող վարկեր՝ 5 հատ:
Ո՞ւր դիմել պարտքի ներման համար
Լեռնային Ղարաբաից բռնի տեղահանված այն անձինք, որոնք հանդիսանում են ծրագրի շահառու, պետք է դիմում ներկայացնեն ֆինանսների նախարարություն: Գերատեսչությունում կկազմվի հատուկ՝ պարտքի ներման հանձնարարագիր:
«Դիմումի հիման վրա համաձայնագիր կկնքվի ամեն առանձին ֆիզիկական անձի հետ՝ գրավը վերադարձնելու և ներելու հետ կապված։ Այնուհետև կտեղեկացնենք, թե որտեղից և ինչպես կարող են այդ իրերը ստանալ»,- «Արմենպրես»-ի հետ զրույցում պարզաբանել է Վահե Հովհաննիսյանը:
Անդրադառնալով 2.5 միլիոն դրամից ավելի վարկ ունեցողներին՝ նկատել է՝ այդ անձանց ֆինանսական հնարավորությունները պետք է ճշտվեն, որպեսզի «չներվեն այն մարդկանց վարկերը, ովքեր ունեն մեծ ֆինանսական հնարավորություններ, այլ ներվեն միայն այն անձանց վարկերը, որոնք ծանր սոցիալական վիճակում են»:
Հետևեք մեզ — Facebook | Youtube | Telegram
Արցախցիների վարկերը կներվեն
