Ադրբեջանում ոստիկանությունը զանգվածաբար առգրավում է փիքափները․ որպես պատճառ նշվում է տեխզննումը

Սեպտեմբերի 21-ի առավոտից Ադրբեջանի տարբեր շրջաններում ճանապարհային ոստիկանության աշխատակիցներն առգրավում են քաղաքացիների բարձր անցանելիությամբ սեփական ավտոմեքենաները։ Դրանք տեղափոխվում են տուգանային հրապարակ։ Ներքին գործերի նախարարությունը կատարվածը բացատրում է անհրաժեշտ տեխզննմամբ։

Ֆեյսբուքի միանգամից մի քանի օգտատեր գրել է իր մեքենայի առգրավման մասին։ Դրանց թվում են Toyota, Gelandewagen, Niva և այլ ապրանքանիշների մեքենաներ։

• Ադրբեջանում մոբիլիզացիա է հայտարարվել, Հայաստանի հետ սահմանին զոհեր կան․ ինչո՞վ է դա սպառնում

• Կարծիք Ադրբեջանից․ «Երկու կողմերն էլ պատերազմի մասին են մտածում» 

Այս լուրերը մեկնաբանելիս տրանսպորտային հարցերի փորձագետ, իրավաբան Արշադ Հուսեյնովը նշել է, որ մոբիլիզացիայի ժամանակ ոստիկանությունը կարող է առգրավել որոշ մեքենաներ դրանց բարձր պահանջարկի պատճառով։

«Այս մանրամասներն արտացոլված են «Ռազմատրանսպորտային պարտավորության մասին դրույթում», որը հաստատվել է Ադրբեջանի 2005-ի մայիսի 17-ի № 916-IIQ օրենքով, և մի քանի այլ օրենսդրական ակտերում», — գրել է փորձագետը ֆեյսբուքյան իր էջում։

Նրա խոսքով՝ նախարարների կաբինետի 2006 թ-ի փետրվարի 16-ի հրամանով հաստատվել է տրանսպորտային միջոցների ցանկը, որոնք տարբեր պետական և մասնավոր կազմակերպություններում են գտնվում և անհրաժեշտության դեպքում կարող են մոբիլիզացվել Զինված ուժերի կարիքների համար։

Նշված ցանկում ներկայացված են բարձր անցանելիության մարդատար մեքենաներ, հատուկ բեռնատար մեքենաներ, զորքի ընդհանուր նշանակության, սանիտարական ավտոմեքենաներ, ուղևորատար ավտոբուսներ, ավտոքարշակներ, տարբեր տրակտորներ և այլն։

«Օրենսդրության համաձայն՝ կազմակերպությունների և քաղաքացիների սեփականություն հանդիսացող տրանսպորտային միջոցին հասցված վնասը փոխհատուցում է պետությունը։

Այսինքն՝ եթե տրանսպորտային միջոցը, որը ներգրավվել է մոբիլիզացիայի համար, շարքից դուրս է գալիս, դառնում անպետք, ավտոմեքենայի արժեքը քաղաքացուն փոխհատուցվում է լրիվ ծավալով», — եզրափակում է Արշադ Հուսեյնովը։

Ներքին գործերի մամուլի ծառայությունում հաղորդել են, որ ավտոմեքենաների առգրավման պատճառը ռազմական նպատակների համար անհրաժեշտ մեքենաների տեխնիկական զննում անցնելու անհրաժեշտությունն է։

Սոցցանցերի օգտատերերի մի քանի բնորոշ մեկնաբանություն․

«Հորս փիքափն առգարվել են, այնքան էի սիրում այդ մեքենան»։

«Շնորհակալ եղեք, որ դեռ չեն ներխուժում բնակարաններ և բանակի կարիքների համար լամպերը տանում»։

«Ադրբեջանի փիքափների 90 տոկոսն, առանց այդ էլ, բյուջեի հաշվին է գնվել, պարզապես բյուջեն դրանից տեղյակ չէ»։