Հայաստանը ևս 500 միլիոն դրամ կուղղի անպտղության հաղթահարմանը
Անպտղության հաղթահարման ծրագրի ընդլայնում
Հայաստանը լրացուցիչ 500 միլիոն դրամ կհատկացնի վերարտադրողական առողջության ծրագրի իրականացման համար։ Կառավարությունը նման որոշում է ընդունել օգոստոսի 11-ին կազմակերպված նիստի ընթացքում։ Առողջապահության նախարար Անահիտ Ավանեսյանը հավելյալ միջոցների ներգրավման անհրաժեշտությունը բացատրել է ծրագրի «չափազանց մեծ պահանջարկով»։
«Ծրագրի շրջանակներում ծնված երեխաների թիվը կազմել է 31,6 տոկոս, ինչը բավարարում է զարգացած երկրների միջին ցուցանիշներին»,- հայտարարել է նա։
Նախարարի փոխանցմամբ՝ 2023 թ․-ի հունվար-հուլիս ամիսներին ծրագրից օգտվել և բուժման տարբեր փուլերում է գտնվում 2876 շահառու։
Անպտղության հաղթահարման ծրագիրը Հայաստանում մեկնարկել է 2019 թ․-ին։ Պետական պատվերի շրջանակներում վերարտադրողական օժանդակ տեխնոլոգիաների կիրառմամբ թանկարժեք ծառայությունների հասանելիություն ունեն նաև 44-օրյա պատերազմում զոհված զինծառայողների ծնողները՝ առանց տարիքային սահմանափակման։
«Ծնվել է 57 երեխա, 9-ը՝ զոհված զինծառայողների ընտանիքներում»
Տարվա առաջին 7 ամիսների տվյալներն է ներկայացրել Առողջապահության նախարարն ու ընդգծել՝ արձանագրվել է 301 հղիություն։ Նա հիշեցրել է, որ ծրագրի շահառու կարող են դառնալ՝
- մինչև 36 տարեկան, երկու տարի և ավելի անպտղություն ունեցող բոլոր անզավակ կանայք,
- սահմանամերձ բնակավայրերում բնակվող 36-42 տարեկան կանայք, որոնք ունեն երկրորդ բալիկ ունենալու դժվարություններ:
Տեղեկացրել է, որ նախատեսում են մեծացնել ծրագրի հասանելիությունը՝ մարզային կենտրոններ բացել Գյումրիում, այնուհետև Վանաձորում և Գորիսում։
«Տարիքային շեմը պետք է վերացնել»
Վարչապետ Փաշինյանն այսպես է արձագանքել Ավանեսյանի խոսքին՝ նշելով, որ ծրագիրը պետք է հասանելի լինի բոլոր նրանց, ովքեր ունեն մայրանալու ցանկություն։ Ըստ նրա՝ արդյունքում ծրագրի ծավալները կարող են մեծանալ, բայց երկրի համար կարևոր է, թե քանի երեխա է ծնվում։
«Մենք քննարկել ենք նախկինում, ես նոր եմ ֆիքսում, որ տարիքային շեմ ենք սահմանել։ Չափահաս մարդ է, եթե ուզում է ծրագրից օգտվի, ինչո՞ւ ենք ասում՝ չէ, պիտի 36 տարեկան լինես»,- նկատել է նա։
Ի պատասխան՝ առողջապահության նախարարը նշել է, որ մասնագիտական քննարկման կարիք է տեսնում, կան «առողջական նրբություններ»։ Գործադիրի ղեկավարը շեշտել է՝ քաղաքական առումով ճիշտ որոշում կլինի, եթե, իհարկե, չկա «զուտ մասնագիտական անհաղթահարելի խոչընդոտ»։
«Ժողովրդագրական իրավիճակի բարելավմանն է միտված»
Պետական ծրագիրը վարչապետն այսպես է բնորոշել։ Նա նշել է, որ նախորդ տարվա նույն ժամանակահատվածի համեմատ հունվար-հուլիս ամիսներին 540-ով ավելի երեխա է ծնվել Հայաստանում։ Հղում անելով աշխատանքի և սոցիալական հարցերի նախարարության տրամադրած տվյալներին՝ ասել է, որ 2023 թ․-ի առաջին կիսամյակում գրանցվել է վերջին 20 տարվա նույն ժամանակահատվածում գրանցված մահերի ամենացածր ցուցանիշը։
«Գրանցվել է նաև 2015 թ․-ից սկսած բնական հավելաճի ամենաբարձր մակարդակը՝ կազմելով 4467 մարդ։ Այսինքն՝ մահացածների և ծնվածների տարբերությունը դրական է»,- շեշտել է նա։
«2000-ից ավելի շահառուներ են ներգրավված լինելու»
Որոշման նախագծից տեղեկանում ենք, որ 2023 թ․-ի հուլիսի 11-ի դրությամբ շուրջ 1500 զույգեր դիմել են անպտղության հաղթահարման ծրագրից օգտվելու համար:
2023 թվականի պետական բյուջեով նշված ծառայությունների համար նախատեսվել էր 917,9 մլն դրամ: Առողջապահական գերատեսչությունը հայտնում է, որ հունիսի 30-ի դրությամբ կատարված աշխատանքները շուրջ 150 մլն-ով ավելի են եղել նախատեսված ֆինանսավորման չափից։
Նախարարությունը կանխատեսում է մինչև տարեվերջ արտամարմնային բեղմնավորման ծառայություններ տրամադրել 750 նոր շահառուների․
«1 արտամարմնային բեղմնավորման հաշվով կատարվող ծախսի միջին ծավալը կազմում է 1,42 մլն դրամ»։
Լրացուցիչ գումարներ են անհրաժեշտ լինելու նաև սերմնավորման և պատճառագիտական ծառայություններ մատուցելու համար։
Հետևեք մեզ — Facebook | Youtube | Telegram
Անպտղության հաղթահարման ծրագրի ընդլայնում
