Ի՞նչ կստանա Վրաստանը ԱՄՆ-ից, եթե վերադառնա իր արևմտյան կուրսին
ԱՄՆ խոստումները Վրաստանին
Եթե Վրաստանի կառավարությունը հրաժարվի իր հակաժողովրդավարական կուրսից, ԱՄՆ-ը կքննարկի Վրաստանին ռազմական և առևտրային կարևոր փաթեթ տրամադրելու և վիզային ռեժիմի ազատականացման հարցը։ POLITICO-ն հայտնում է, որ այդ մասին ասված է ԱՄՆ կոնգրեսական Ջո Ուիլսոնի հեղինակած օրինագծում։
Ուիլսոնի առաջարկած «Հանուն հաշվետվողականության, ճկունության և անկախության Վրաստանի մոբիլիզացիայի և հնարավորությունների ընդլայնման մասին» (MEGOBARI Act) ակտը նախատեսում է, որ՝
▇ Վաշինգտոնը կարող է ստորագրել Վրաստանին տրամադրվող տնտեսական և անվտանգային աջակցության համապարփակ փաթեթ, եթե Թբիլիսին հրաժարվի իր՝ գնալով ավելի հակաարևմտյան դարձող հռետորաբանությունից և կանխի մարդու իրավունքների հետընթացը,
▇ ԱՄՆ-ը բանակցություններ կսկսի «արտոնյալ առևտրային ռեժիմ» սահմանելու համար, եթե երկիրը համապատասխանի հիմնական քաղաքական չափանիշներին,
▇ Վրաստանի քաղաքացիների համար կազատականացվի վիզային ռեժիմը,
▇ Պաշտոնյաներին կհանձնարարվի մշակել Վրաստանին տրամադրվելիք ռազմական օգնության փաթեթ, որը կներառի «անվտանգային և պաշտպանական սարքավորումների տրամադրում, որոնք իդեալական կերպով կհամապատասխանեն ռուսական ագրեսիայից երկրի տարածքը պաշտպանելուն, ինչպես նաև գործողությունների անցկացում համապատասխան ուսուցման, սպասարկման և աջակցության տարրերով»:
Այս ամբողջ ծրագիրը կակտիվանա միայն այն դեպքում, եթե ԱՄՆ-ը հաստատի, որ «Վրաստանը զգալի և կայուն առաջընթաց է ցույց տվել իր ժողովրդավարությունը վերակենդանացնելու գործում, ինչի մասին կվկայեն առնվազն արդար և ազատ ընտրությունները և հավասարակշռված նախընտրական միջավայրը»:
POLITICO-ն գրում է, որ սա Վրաստանին պետք է մոտիվացնի՝ անցկացնելու ազատ ընտրություններ այն բանից հետո, երբ կառավարությունը հետ կանչի մայիսի 14-ին ընդունված «օտարերկրյա գործակալների մասին» օրենքը։ Վրաստանում խորհրդարանական ընտրությունները են լինելու 2024 թվականի հոկտեմբերին։
- «Վրաստանի «ռուսականացումը» կբարդացնի ՀՀ՝ ՌԴ-ից պոկվելը»․ կարծիքներ Երևանից
- Վրաստանի նախագահն ունի երկու շաբաթ «ռուսական օրենքի» վրա վետո դնելու համար․ ինչի՞ սպասել
Մայիսի 20-ին POLITICO-ն հաղորդել էր, որ ԱՄՆ Կոնգրեսում կներկայացվի օրինագիծ, որը կսահմանի ակտիվների սառեցում և մուտքի արտոնագրերի արգելք Վրաստանի կառավարության այն պաշտոնյաների համար, ովքեր աջակցել են «օտարերկրյա գործակալների մասին» ռուսական ոճի օրենքին:
Մայիսի 14-15-ը Թբիլիսի էր այցելել ԱՄՆ պետքարտուղարի օգնական Ջեյմս Օ՛Բրայենը։ Վրաստանի վարչապետի, ընդդիմության և քաղհասարակության հետ հանդիպումներից հետո Օ’Բրայենը ճեպազրույց էր անցկացրել և հայտարարել, որ «օտարերկրյա գործակալների մասին» օրենքը անհամատեղելի է Եվրամիության չափանիշների հետ։ Նա նաև ակնարկել էր վրացի բարձրաստիճան պաշտոնյաների նկատմամբ հնարավոր պատժամիջոցների մասին։
