«Ալիևը ճի՞շտ էր». ԼՂ-ից Հայաստանի Զինված ուժերի դուրսբերման մասին
Հայաստանի ԶՈՒ դուրսբերում ԼՂ-ից
«Պատերազմի բերումով Հայաստանի Զինված ուժերի մի շարք ստորաբաժանումներ մուտք են գործել Լեռնային Ղարաբաղ: Նրանք վերադառնում են Հայաստան, գործընթացը սեպտեմբերին կավարտվի: Իսկ Պաշտպանության բանակը եղել և շարունակում է մնալ ԼՂ-ում»,- արձագանքելով Ադրբեջանի նախագահի հայտարարություններին ասել է Հայաստանի Անվտանգության խորհրդի քարտուղար Արմեն Գրիգորյանը:
Օրեր առաջ Իլհամ Ալիևը հայտարարել էր, թե Մոսկվան Բաքվին խոստացել է՝ մինչև 2022 թ.-ի հունիս ԼՂ-ում հայկական զորամիավորումներ չեն լինելու, հարցը, սակայն, դեռևս չի լուծվել:
Քաղաքագետ Տիգրան Գրիգորյանի գնահատմամբ՝ ԱԽ քարտուղարը «խիստ խնդրահարույց ու վտանգավոր» հայտարարություններ է արել, որոնցից մեկում «փաստացիորեն նշվում է, որ այսքան ժամանակ Ալիևը ճիշտ էր, մենք՝ սխալ»:
Հայաստանի ԱԽ քարտուղարի արձագանքը Ալիևի հայտարարություններին, ինչպես նաև փորձագիտական կարծիք
«Հայաստանի ԶՈՒ ստորաբաժանումները ԼՂ-ից կվերադառնան մինչև սեպտեմբեր»
Հայաստանի Անվտանգության խորհրդի քարտուղար Արմեն Գրիգորյանի խոսքով՝ ինչպես նախկինում, այնպես էլ հիմա ԼՂ-ի անվտանգության ապահովման գործառույթն իրականացնելու է Պաշտպանության բանակը: Արձանագրում է՝ պիտի անվտանգության երաշխիք լինի Լեռնային Ղարաբաղում ՌԴ խաղաղապահ ուժերի տեղակայումը:
«Խաղաղապահ ուժերի առկայությունն ինքնին վկայում է ԼՂ-ի բնակչության համար իրական գոյաբանական վտանգի առկայության հանգամանքի ընդունում Ռուսաստանի կողմից։ Եվ խաղաղապահ ուժերն առանցքային նշանակություն ունեն ԼՂ-ի հայության անվտանգության երաշխավորման գործում»,-«Արմենպրես»-ին տված հարցազրույցում ասել է Արմեն Գրիգորյանը:
ԱԽ քարտուղարն ընդգծել է՝ սեպտեմբերից ԼՂ-ում Հայաստանից զորակոչված զինծառայողներ չեն լինելու:
Նրա փոխանցմամբ՝ Պաշտպանության բանակ են զորակոչվելու ժամկետայիններ Լեռնային Ղարաբաղից: Ինչպես նախկինում, այնպես էլ հիմա ՊԲ-ում կծառայեն նաեւ պայմանագրայիններ:
Հրադադարի հաստատումից և ԼՂ-ում ռուսական խաղաղապահ զորակազմի տեղակայումից հետո Հայաստանի ԶՈՒ ստորաբաժանումների դուրսբերումը Գրիգորյանը տրամաբանական է համարել․
«Պատերազմի բերումով Հայաստանի ԶՈւ մի շարք ստորաբաժանումներ ՊԲ-ին օգնելու նպատակով մուտք են գործել ԼՂ: Հրադադարի հաստատումից հետո նրանք վերադառնում են Հայաստանի Հանրապետություն: Այս գործընթացը մոտ է ավարտին և սեպտեմբերին կավարտվի: Ինչ վերաբերում է Պաշտպանության բանակին, այն Լեռնային Ղարաբաղում է եղել և շարունակում է այնտեղ մնալ»:
Ալիևի հայտարարությունը «Մոսկվայի խոստումների» մասին
Հուլիսի 15-ին Ադրբեջանի նախագահ Իլհամ Ալիևը ելույթ էր ունեցել նախարարների կաբինետի նիստի ընթացքում և անդրադարձել նաև հայ-ադրբեջանական հարաբերությունների կարգավորմանը:
«Եթե Հայաստանը չի ուզում իր զինված կազմավորումները դուրս բերել Ադրբեջանի տարածքից, ապա թող մեզ բացահայտ ասի այդ մասին, որ իմանանք՝ ինչ անել։ Ինչպիսի՞ն է լինելու մեր պատասխանը։ Հիմա դա ասելը, հավանաբար, տեղին չի լինի»,- հայտարարել էր Ալիևը:
Ադրբեջանի նախագահը շեշտել էր՝ հարցը բարձրացրել են նաև Ռուսաստանի ռազմական ղեկավարության հետ հանդիպումների ժամանակ: Ալիևի փոխանցմամբ՝ ամիսներ առաջ ՌԴ ՊՆ բարձրաստիճան ներկայացուցիչը Ադրբեջանի ՊՆ-ին խոստացել է, որ մինչև հունիս հայկական զինված կազմավորումները դուրս կբերվեն Ղարաբաղից։ Հարցը, սակայն, դեռևս լուծում չի ստացել:
Մեկնաբանություն
Քաղաքագետ Տիգրան Գրիգորյանի խոսքով՝ Անվտանգության խորհրդի քարտուղարի հարցազրույցի նպատակը Բաքվից հնչող սպառնալիքները մեղմելն է: Ասում է՝ այն, որ Հայաստանից դեպի Լեռնային Ղարաբաղ զորակոչ այլևս չի լինելու, որևէ մեկի համար նորություն չէ:
Քաղաքագետի գնահատմամբ՝ ԱԽ քարտուղարի հայտարարությունները ի չիք են դարձնում հայկական կողմի պնդումները, թե 44-օրյա պատերազմի ավարտից հետո ԼՂ-ում ՀՀ Զինված ուժերի ստորաբաժանումներ չկան:
«Ի դեպ, հայկական կողմի այս պնդումները հաստատվել էին նաև հեղինակավոր միջազգային կազմակերպությունների զեկույցներում»,- ընդգծել է նա:
Գրիգորյանի պնդմամբ՝ Արցախում Հայաստանի ԶՈՒ ստորաբաժանումներ, իրոք, չկան, իսկ Հայաստանից զորակոչված ժամկետայինները շուտով կզորացրվեն:
Կարծում է՝ «խիստ խնդրահարույց ու վտանգավոր» է հայ պաշտոնյայի հայտարարությունն այն մասին, թե այդ ստորաբաժանումները «վերադառնում են Հայաստան, գործընթացը կավարտվի սեպտեմբերին»: Շեշտում է՝ Արմեն Գրիգորյանի այդ հայտարարությունը «փաստացիորեն լեգիտիմացնում է Ադրբեջանի ողջ ապակառուցողական պահվածքը վերջին շրջանում»:
«Այն իսկական նվեր է Ադրբեջանի համար, որի քարոզչամեքենան արդեն իսկ ակտիվորեն տարածում է հարցազրույցը: Այդ հայտարարությունը ոչ միայն չի նվազեցնում պատերազմի վտանգը, այլև, ինչպես Նիկոլ Փաշինյանն էր ասում, պատերազմի համար լեգիտիմություն է ստեղծում: Այդ հայտարարությամբ փաստացիորեն նշվում է, որ այսքան ժամանակ Ալիևը ճիշտ էր, մենք` սխալ»:
Հայաստանի ԶՈՒ դուրսբերում ԼՂ-ից
