«Եթե ՀՀ-ն համաձայնի, եռակողմ հանդիպումներ կսկսենք Վրաստանում»․ Ալիևը Թբիլիսիում
Ալիևը Թբիլիսիում
Հոկտեմբերի 8-ին Ադրբեջանի նախագահ Իլհամ Ալիևը կառավարական պատվիրակության հետ աշխատանքային այցով ժամանել է Վրաստան, որը շատերի համար անսպասելի էր, այն նախապես հայտարարված չէր։
Վարչապետ Իրակլի Ղարիբաշվիլիի հետ հանդիպումից հետո Ադրբեջանի նախագահը հայտարարել է, որ «Հարավային Կովկասում խաղաղությունը դեռ հաստատված չէ», և սա Ղարիբաշվիլիի հետ զրույցի թեմաներից մեկն էր։
Նրա առաջարկով, եթե Հայաստանը համաձայնի, ապա եռակողմ հանդիպումներ կարող են տեղի ունենալ Վրաստանում։
Համատեղ մամուլի ասուլիսում Իրակլի Ղարիբաշվիլին կենտրոնացել է Վրաստանի և Ադրբեջանի միջև «ռազմավարական գործընկերության» վրա և հայտարարել, որ երկու երկրների միջև համագործակցությունը հաջողված է բոլոր ոլորտներում։
Իլհամ Ալիևի հայտարարությունը
«Մարտահրավերները դեռ մնում են, դեռ չլուծված խնդիրներ կան, Հարավային Կովկասում խաղաղությունը դեռ հաստատված չէ։ Հարավային Կովկասին խաղաղություն է պետք։ Հիմա ժամանակն է աջակցելու Վրաստանի ամբողջականությանը, ինչպես Վրաստանն է աջակցում Ադրբեջանի ինքնիշխանությանը և տարածքային ամբողջականությանը։
Այսօր մենք խոսեցինք Հայաստանի և Ադրբեջանի միջև հարաբերությունների կարգավորման մասին։ Անցյալ ամիս Լեռնային Ղարաբաղում տեղի ունեցած երկրորդ պատերազմը հանգեցրեց մեր տարածքային ամբողջականության վերականգնմանը։
Եվ այսօր մենք պետք է ակտիվորեն աշխատենք Հայաստանի հետ խաղաղության համաձայնագրի վրա։ Հուսով եմ, որ մենք կհասնենք դրան և դրանով իսկ կստեղծենք քաղաքական մի միջավայր և իրավիճակ Հարավային Կովկասում, որը հնարավորություն կստեղծի եռակողմ համագործակցության համար՝ Վրաստանի, Հայաստանի և Ադրբեջանի մասնակցությամբ։
Սա հաջող համագործակցություն կլինի էներգետիկայի, առևտրի, ներդրումների և շատ այլ ոլորտներում։ Մենք բաց թողեցինք այս հնարավորությունը, քանի որ Ադրբեջանը երկար տարիներ օկուպացված էր, և դա թույլ չտվեց մեզ քայլեր ձեռնարկել կարգավորման ուղղությամբ։ Բայց եկել է ժամանակը՝ բաց չթողնելու այս հնարավորությունը։
Այս իրավիճակում մեզ անհրաժեշտ է Վրաստանի մասնակցությունը, և ես շնորհակալ եմ պարոն վարչապետին, որ պատրաստ է մեզ օգնել և առաջարկել միջնորդ հանդիսանալ, և մենք նույնն ենք ակնկալում Հայաստանից։ Եթե Հայաստանը տա իր համաձայնությունը, մենք անմիջապես կսկսենք երկկողմ և եռակողմ հանդիպումներն այստեղ՝ Վրաստանում՝ համապատասխան գերատեսչությունների օգնությամբ»։
- Բաքուն հաղթեց, հայերը լքում են ԼՂ. էլ ի՞նչ սպասել, հակամարտության կողմերի կարծիքները
- «Գրանադայում ի չիք դարձվեց 2020-ի եռակողմ հայտարարությունը»․ հայ քաղաքագետ
- «Չափազանց մտահոգիչ է». ԵՄ դեսպանը՝ Աբխազիայում ռուսական բազայի մասին
Իրակլի Ղարիբաշվիլիի հայտարարությունը
«Մենք խոսեցինք առևտրի և տնտեսության մասին, քննարկեցինք էներգետիկայի, տրանսպորտի, լոգիստիկայի ոլորտներում համագործակցության հարցեր։ Ադրբեջանը Վրաստանի հիմնական առևտրային գործընկերներից մեկն է, անցած տարի մտել է առաջին հնգյակ։
Այս տարի ապրանքաշրջանառությունն աճել է 15 տոկոսով, ավելացել է նաեւ բեռնափոխադրումների ծավալը։ Ընդհանուր առմամբ, նշեմ, որ բոլոր հարցերում մենք շատ հաջող համագործակցում ենք։
Մենք ուսումնասիրեցինք Միջին միջանցքի զարգացման հեռանկարները։ Մենք համագործակցում ենք Ադրբեջանի և Ղազախստանի հետ՝ շատ արագ զարգացնելու այս միջանցքը, որը ներառում է երկաթուղիների արդիականացում, նավահանգիստների ընդլայնում և կառուցում, ճանապարհների արդիականացում և զարգացում։
Մենք արդեն սկսել ենք աշխատանքները և կավարտվենք դրան 2024 թվականի վերջին։
Մենք շուտով կսկսենք նաև Անակլիայում նոր նավահանգստի կառուցումը։ Վերջին փուլի ավարտից հետո նավահանգստի հզորությունը կկազմի 100 մլն տոննա։
Շուտով կավարտվի նաև Արևելք-Արևմուտք մայրուղու շինարարությունը։
Այս բոլոր նախագծերում մենք համագործակցում ենք Ադրբեջանի հետ։
Նաև մի քանի ամսից կավարտվի ևս մեկ ռազմավարական նշանակություն ունեցող նախագիծ՝ Բաքու-Թբիլիսի-Կարս։
Մենք ունենք շատ հստակ հեռանկար, երկարաժամկետ աշխատանքների տեսլական։ Մենք ցանկանում ենք երկարաժամկետ ռազմավարական գործընկերություն և բարեկամություն ունենալ Ադրբեջանի հետ։
Հարավային Կովկասում խաղաղության պայմանագիրը կօգնի հաստատել երկարաժամկետ խաղաղություն, որը բարգավաճում կբերի մեր ժողովուրդներին՝ Հայաստանին, Ադրբեջանին և Վրաստանին:
Վրաստանը միշտ ունեցել է չեզոք, անաչառ դիրքորոշում։ Մենք պատրաստ ենք վերցնել մեզ վրա միջնորդի դերը, նպաստել Ադրբեջանի և Հայաստանի միջև հարաբերությունների կարգավորման գործընթացին, դա կարող է լինել անմիջական օգնություն կամ բարեկամական ձևաչափի ստեղծում։
Թբիլիսին միշտ պատրաստ է մասնակցել այս գործընթացին։
Մեր ապագան պետք է լինի կայուն, խաղաղ, և Հարավային Կովկասի երեք երկրներն էլ պետք է կարողանան ինքնուրույն լուծել տարածաշրջանի և մեր հետագա զարգացման խնդիրները»։
