Ադրբեջանում հատուկ կարանտինային ռեժիմ է սահմանվել, տարեցներին արգելվել է փողոց դուրս գալ

Կորոնավիրուսի տարածման դեմ պայքարի համար Ադրբեջանում հատուկ կարանտինային ռեժիմ է սահմանվում, որը կտևի մարտի 24–ից մինչև ապրիլի 20–ը։ Այսպիսի որոշում է ընդունել նախարարների կաբինետը։

Ըստ պաշտոնական տվյալների՝ մարտի 23–ին Ադրբեջանում գրանցվել է կորոնավիրուսով վարակման 72 դեպք։ Մեկ մարդ մահացել է, տասն՝ ապաքինվել։

Հտուկ ռեժիմի շրջանակում

65 տարեկանից բարձր անձանց արգելվում է փողոց դուրս գալ։ Եթե մարդը մենակ է ապրում, նրան սոցիալական ծառայություններ կմատուցվեն։
Կասեցվում է միջքաղաքային և միջշրջանային տրանսպորտային հաղորդակցությունը, սահմանափակվում է ելքն ու մուտքը Բաքու, Սումգայիթ և Ապշերոնի թերակղզի (սահմանափակումները չեն վերաբերում շտապօգնության մեքենաներին, բեռնափոխադրումներին)։
Բաքվի բնակիչներին խորհուրդ է տրվում քիչ օգտվել մետրոյից, դրա փոխարեն օգտվել հատուկ էքսպրես–ավտոբուսներից, որոնք նույն երթուղով կերթևեկեն (մետրոյի կայարանների միջև)։
Արգելվում է հասարակական վայրերում ավելի քան տասը հոգով հավաքվելը։

Միաժամանակ սրճարանները, ռեստորաններն ու հասարակական սննդի այլ հաստատությունները կշարունակեն աշխատանքը կարճ գրաֆիկով՝ 12:00–ից մինչև 15:00–ն, և չկա ոչ մի ժամանակային սահմանափակում սննդի առաքման առնչությամբ։

Հատուկ ռեժիմի կատարումը վերահսկելու է ներքին գործերի նախարարությունը։