«Պատմական ռեկորդ է». Հայաստանի վարչապետը՝ վճարովի աշխատատեղերի մասին
Փաշինյանը՝ վճարովի աշխատատեղերի մասին
2018 թվականի «թավշյա» հեղափոխությունից հետո Հայաստանում ստեղծվել է ավելի քան 125.000 աշխատատեղ։ Սա, «հեղափոխական» վարչապետ Նիկոլ Փաշինյանի խոսքով՝ «պատմական ռեկորդ է»: Նա ասել է նաև, որ նույն ժամանակահատվածում աշխատավարձային ֆոնդն ավելացել է 65%-ով:
Նախօրեին թեմային անդրադարձել էր նաև էկոնոմիկայի նախարար Վահան Քերոբյանը: Նախարարն ասել էր, որ գրանցված աշխատողների թիվը 2022 թ.-ի մայիսին հասել է 673.224-ի, ինչը «հերթական ռեկորդն» է:
Վիճակագրական տվյալներ աշխատատեղերի, աշխատավարձային ֆոնդի մասին, ինչպես նաև փորձագիտական կարծիք
Այս տարվա մայիսին արձանագրված վճարովի աշխատատեղերի «ռեկորդային» աճի մասին վարչապետը հայտարարել էր կառավարության նիստի ընթացքում: Նա շեշտել էր, որ հաշվառվել են միայն այն աշխատատեղերը, որոնց համար վճարվել է աշխատավարձ և եկամտային հարկ․
«2022 թվականի մայիսին 2021 թ.-ի մայիսից մեր աշխատատեղերն ավելի են 38.273-ով կամ 6%-ով և 2019 թ.-ի մայիսի նկատմամբ ավելի են 72.359-ով կամ 12%-ով, իսկ 2018 թ.-ի մայիսի նկատմամբ 125.235 աշխատատեղով։ Այսինքն՝ 2018 թ.-ի մայիսից ի վեր Հայաստանում ստեղծվել է ավելի քան 125 հազար աշխատատեղ»:
Աշխատանքի և սոցիալական հարցերի նախարարության Միասնական սոցիալական ծառայությունն ունի աշխատանքի որոնման «Գտի՛ր աշխատանք» կոչվող հարթակ: Գերատեսչության փոխանցմամբ՝ այս պահի դրությամբ հարթակում ներկայացված է ավելի քան 3.300 թափուր աշխատատեղ ինչպես Երևանում, այնպես էլ մարզերում:
Վարչապետն անդրադարձել է նաև աշխատավարձային ֆոնդին։ Բոլոր գրանցված աշխատողներին վճարված աշխատավարձերի հանրագումարը մայիսին կազմել է 160 մլրդ 56 մլն դրամ։
Փաշինյանի խոսքով՝ այս ցուցանիշը կրկին ռեկորդային է՝ առնվազն նախորդ տարիների մայիսների համեմատ.
«2021 թ.-ի մայիսի համեմատ ավելի է 4 մլրդ 531 մլն դրամով, իսկ 2018 թ.-ի մայիսի համեմատ՝ 63 մլրդ 369 մլն դրամով կամ 65%-ով»:
Կառավարության ղեկավարը խոսել է նաև եկամտային հարկի ընդհանուր գումարի մասին՝ նշելով, որ մայիս ամսին այն կազմել է 32 միլիարդ 741 միլիոն դրամ: Այս ցուցանիշը նախորդ տարվանից ավելի է 3 միլիարդ 811 միլիոն դրամով, իսկ 2018 թ.-ի մայիսից՝ 8 միլիարդ 578 միլիոն դրամով:
Փաշինյանն ընդգծել է, որ շատերը շահարկում են թեման՝ ասելով, որ իշխանության հրապարած թվերը ներառում են նաև վերադարձի ենթակա գումարները, ինչն այդպես չէ:
Եկամտային հարկի վերադարձի օրենքով միայն հիփոթեքի գծով փոխհատուցում է ստանում 20 հազար ընտանիք:
Ըստ վարչապետի՝ ընտանիքներից յուրաքանչյուրին պետությունը վերադարձնում է տարեկան ամենաքիչը 1 մլն դրամ:
Նիկոլ Փաշինյանը հույս է հայտնել, որ կառավարությունը կկարողանա պահպանել աշխատատեղերի աճի այս տեմպը.
«Դրա համար կան նախադրյալներ: Մնում է՝ մենք հետևողական լինենք մեր ծրագրերի իրականացման գործում և ավելի որակյալ դարձնենք դրանք»,- հայտարարել է նա:
Փորձագիտական կարծիք
Տնտեսագետ Արմեն Քթոյանի խոսքով՝ իրականությունն այն է, որ նախկինում երբեք նման թվով գրանցված աշխատողներ չենք ունեցել, ցուցանիշն իսկապես աննախադեպ է:
«Իհարկե դրա մեջ կա ստվերի կրճատման նշանակալի բաղադրիչ, բայց նաև զգալի թվով նոր տնտեսվարող սուբյեկտներ են հիմնվում, ԱՁ-ներ բացվում: Որոշակի դերակատարում ունեն նաև ՌԴ-ից Հայաստան եկածների կողմից գրանցված ԱՁ-ներն ու ՍՊԸ-ները»,- JAMnews-ի հետ զրույցում ընդգծել է Քթոյանը:
Տնտեսագետի գնահատմամբ՝ նոր աշխատեղերի գրանցումը, նոր հարկատուների ի հայտ գալը նշանակում է, որ օրինակ՝ կա կենսաթոշակային համակարգի վրա ճնշումը որոշակիորեն թուլացնելու հնարավորություն:
Ասում է՝ տարիներ շարունակ կրճատվել է աշխատող-թոշակառու հարաբերակցությունը: Եվրոպական երկրներում խնդրահարույց է համարվում, եթե երկու-երեք աշխատողին բաժին է ընկնում մեկ թոշակառու: Այնինչ Հայաստանում մեկ թոշակառու է բաժին ընկնում մեկ աշխատողին: Քթոյանի խոսքով՝ կենսաթոշակային համակարգի կայունության խնդիրն այն խնդիրների շարքում է, որոնք հնարավոր կլինի լուծել նոր հարկատուների ի հայտ գալու արդյունքում:
«Ընդհանուր առմամբ՝ գրանցված աշխատողների թվի աճը դրական ցուցանիշ է, բայց դա որևէ կերպ չի նշանակում, որ տնտեսությունը խնդիրներ չունի կամ ռիսկային ուղղություններ չկան»,- նկատում է փորձագետը:
Փաշինյանը՝ վճարովի աշխատատեղերի մասին
