«ՄԻԵԴ-ի համար Բաքվի փաստարկները վստահելի չեն»․ հայ փաստաբան
ՄԻԵԴ-ը մերժել է Ադրբեջանի դիմումը
Մարդու իրավունքների եվրոպական դատարանը հրատապ ծանուցում է ուղարկել Եվրոպայի խորհրդի Նախարարների կոմիտեին իր ընդունած որոշման կատարումը վերահսկելու նպատակով: Խոսքը գնում է Լաչինի միջանցքը ապաշրջափակելու հարցով Հայաստանի դիմումի հիման վրա ընդունած որոշման մասին։ Նախօրեին այս մասին հաղորդեց միջազգային իրավական հարցերով Հայաստանի ներկայացուցիչը։
Միջազգային իրավունքի մասնագետ, փաստաբան Արա Ղազարյանի գնահատմամբ՝ այս փաստը նշանակում է, որ «դատարանի համար վստահելի չեն Ադրբեջանի ներկայացրած փաստարկները»։
Դեկտեմբերի 14-ին Հայաստանը դիմել էր Մարդու իրավունքների եվրոպական դատարան՝պահանջելով միջանկյալ միջոցներ կիրառել Ադրբեջանի նկատմամբ և պարտավորեցնել վերջինիս՝ ապաշրջափակել Լաչինի միջանցքը: Դեկտեմբերի 21-ին ՄԻԵԴ-ը մասնակի բավարարել էր Հայաստանի դիմումը։ Այն Բաքվին պարտավորեցրել էր ապահովել «Լաչինի միջանցքով Հայաստանում բժշկական օգնություն ստանալու կարիք ունեցող ծանր հիվանդ անձանց տեղաշարժը, ինչպես նաև ճանապարհին անապաստան մնացած կամ ապրուստի միջոցների կարիք ունեցող անձանց անվտանգ տեղաշարժը»։
Հաջորդ օրը Ադրբեջանն էր դիմել Եվրոպական դատարան՝ պահանջելով վերացնել միջանկյալ միջոց կիրառելու որոշումը, ինչպես նաև միջանկյալ միջոցներ կիրառել Հայաստանի նկատմամբ, այն է՝ «ձեռնարկել իր իրավասությունից բխող բոլոր միջոցները ուղղված ռուս խաղապահների ժամանակավոր տեղակայման վայրում գտնվող Ադրբեջանի տարածքում բժշկական անհետաձգելի օգնության կարիք ունեցող մարդկանց համարժեք բուժմանը և խուսափել այս ուղղությամբ որևէ խոչընդոտ ստեղծելուց»։
Փաստաբան Արա Ղազարյանի խոսքով՝ Բաքվում փորձել են հայելանման պահանջ ձևակերպել, բայց չեն մասնավորեցրել, թե ում նկատի ունեն՝ ԼՂ-ի հայերի՞ն, թե՞ ադրբեջանցի բնապահպան ակտիվիստներին։
Միջազգային իրավական հարցերով Հայաստանի ներկայացուցչի գրասենյակից տեղեկանում ենք, որ Լեռնային Ղարաբաղում տիրող հումանիտար ծանր վիճակի մասին հայկական կողմը պարբերաբար Եվրոպական դատարան է ուղարկել «թարմացվող տեղեկություն»։
Հիշեցնում են՝ գրասենյակը Եվրոպական դատարանից պահանջել էր նաև անհապաղ ծանուցում ուղարկել Եվրոպայի խորհրդի Նախարարների կոմիտեին՝ Ադրբեջանի կողմից Եվրոպական դատարանի որոշումը չկատարելու վերաբերյալ:
«Եվրոպական դատարանը, հաշվի առնելով կողմերի ներկայացրած փաստարկները, այսօր մերժել է Ադրբեջանի պահանջներն ամբողջությամբ՝ 2022 թվականի դեկտեմբերի 21-ի որոշումը թողնելով ուժի մեջ»,— հայտնում է գրասենյակը։
Ըստ այդմ՝ մերժվել է ինչպես նախորդ որոշման վերացման, այնպես էլ Հայաստանի դեմ միջանկյալ միջոց կիրառելու մասին Բաքվի պահանջը։
Մեկնաբանություն
Միջազգային իրավունքի մասնագետ, փաստաբան Արա Ղազարյանի խոսքով՝ ՄԻԵԴ-ի կողմից ԵԽ նախարարների կոմիտե ծանուցման ուղարկումը նշանակում է, որ դատարանը Բաքվի ներկայացրած փաստարկները վստահելի չի համարել։
Փաստաբանի խոսքով՝ այս ծանուցմանը կհաջորդեն Նախարարների կոմիտեի կողմից վարույթի նախաձեռնումն ու քաղաքական փաստաթղթի՝ միջանկյալ բանաձևի ընդունումը․
«Նախարարների կոմիտեն Ադրբեջանին կհրավիրի բացատրություն ներկայացնելու։ Եթե կոմիտեին բացատրությունը չբավարարեց, կընդունվի բանաձև՝ որպես վերջանական փաստաթուղթ, որ տվյալ գործով Ադրբեջանը չի կատարում Եվրոպական դատարանի վճիռը»,- պարզաբանել է Ղազարյանը։
Հետևեք մեզ — Facebook | Youtube
ՄԻԵԴ-ը մերժել է Ադրբեջանի դիմումը
