Ղարաբաղի շփման գծում լարվածությունը չի թուլանում
Տեղեկատվություն Հայաստանից
Հայաստանի լրատվամիջոցները, վկայակոչելով Ղարաբաղի պաշտպանության նախարարության մամուլի ծառայությունը, հաղորդում են. այսօր առավոտից Ադրբեջանի զինված ուժերը շփման գծում խախտում են հրադադարի պահպանման ռեժիմը՝ օգտագործելով ինչպես հրաձային զինատեսակներ, այնպես էլ Դ-30 և Դ-44 տիպի հրանոթներ, տարբեր տրամաչափի ականանետեր ու նռնականետեր:
ԶԼՄ-ները հաղորդում են նաև, որ արկակոծության արդյունքում՝ տարբեր աստիճանի բեկորային վիրավորումներ է ստացել ՊԲ երեք զինծառայող, ադրբեջանական կողմի ակտիվությունը ճնշելու համար իրականացվում են պատասխան գործողություններ:
Ղարաբաղի պաշտպանության նախարարությունը հաղորդագրություն է տարածել այն մասին, որ «առաջնային գծում իրավիճակի ապակայունացմանն ուղղված գործողությունների ողջ պատասխանատվությունը կրում է Ադրբեջանի ռազմաքաղաքական ղեկավարությունը»:
Տեղեկատվություն Ադրբեջանից
Ադրբեջանի պաշտպանության նախարարությունը հուլիսի 7-ին արտակարգ հայտարարություն է տարածել և հաղորդել ղարաբաղյան հակամարտության գոտու ճակատային գծում հայկական դիրքերին կենտրոնացված հարված հասցնելու մասին:
Պաշտպանության նախարարության հայտարարությունում ասված է. «Հայկական կողմից կրկին պլանավորված և նպատակաուղղված դիվերսիայի կանխման և Ալխանլի գյուղի խաղաղ բնակիչների համար հատուցում իրականացնելու համար հուլիսի 7-ին ադրբեջանական բանակը ճշգրիտ կրակային հարվածներ է հասցրել մարտական պատրաստության բերված ուժերին և հատկապես՝ հայկական բանակի գումարտակի պաշտպանական հատվածում նախանշված թիրախներին:
Ըստ նախնական տվյալների՝ մեր զորքերի կողմից ռազմաճակատի Ֆիզուլի-Խոջավենդ ուղղությամբ իրականացրած գործողությունների արդյունքում ոչնչացվել է հակառակորդի գումարտակի պաշտպանական հատվածում ներառված ստորաբաժանումների զգալի կենդանի ուժ, շարքից հանվել է մարտական տեխնիկայի մի քանի միավոր, ավերվել են ռազմական ենթակառուցվածքների այլ օբյեկտներ ևս, որոնք վերականգնման ենթակա չեն»:
Նախարարությունը հաղորդել է նաև, որ արժանահավատ տեղեկատվություն է ստացվել ռազմաճակատում հայկական զորամասերն ամբողջությամբ մարտական պատրաստության բերելու մասին: Ադրբեջանական զորքերը նույնպես մարտական պատրաստության են բերված:
