Հայաստանում կորոնավիրուսով վարակվածների թիվը շարունակում է աճել՝ 452 նոր դեպք, Սևան քաղաքը փակվում է 10 օրով

Մայիսի 25-ի դրությամբ Հայաստանում  կորոնավիրուսով վարակվածների թիվն ավելացել է 452-ով և հասել 7 հազար 113-ի։ Բուժվել է 209 պացինետ, ապաքինվածների ընդհանուր թիվը կազմում է 3 145: Շարունակում են բուժում ստանալ 3 842 մարդ:

Կորոնավիրուսից մահվան ևս 6 դեպք է արձանագրվել։

Առողջապահության նախարարությունից մահվան դեպքերի վերաբերյալ հայտնում են, որ պացիենտները եղել են 85 (կին), 61 (տղամարդ), 58 (տղամարդ), 69 (տղամարդ), 86 (կին), 67 (տղամարդ) տարեկան և ունեցել ուղեկցող քրոնիկական հիվանդություններ:

Մահացածների ընդհանուր թիվը հասավ 87-ի։

Համավարակի սկբից ի վեր կատարվել է 51 594 թեստավորում:

• Հայաստանում կորոնավիրուսի հետ կապված մահացության վիճակագրությունը սկսել են այլ կերպ մատուցել
• Ինչ տեսք ունի Երևանը տեղաշարժի սահմանափակման չեղարկումից հետո։ Տեսանյութ

Հատուկ ռեժիմ Սևանում

Պարետ Տիգրան Ավինյանի որոշմամբ․ Սևան քաղաքը փակվում է կարանտինի մայիսի 25-ի 06:00-ից մինչև հունիսի 3-ը՝ ժամը 23։59-ը։

Արգելվել է անձանց և տրանսպորտային միջոցների մուտքն ու ելքը՝ բացառությամբ առաջին անհրաժեշտության ապրանքների, սննդամթերքի, դեղորայքի, վառելիքի մատակարարման նպատակով տեղաշարժի:

Հայաստանում արտակարգ դրությունը երկարաձգվել է մինչև հունիսի 13-ը, սակայն արդեն վերադարձել է աշխատանքի տնտեսվարողների մեծ մասը։ Մայիսի 18-ից աշխատում է հանրային տրանսպորտն ու մետրոն։ Կառավարությունը որոշել է գնալ ոչ թե սահմանափակումների, այլ նոր վարքականոնների ներդրման ճանապարհով։ Դա բացատրվում է նրանով, որ կորոնավիրուսի դեմ պայքարը կարող է տարիներ տևել։

Նոր վարքականնոների ցանկում է պաշտպանիչ դիմակների օգտագործումը։