Հայաստանում կնվազեցվեն կոմունալ ծառայությունների սակագներն անապահով ընտանիքների համար
Հայաստանի բնակիչները, որոնք ամսական 600 կուբամետրից պակաս գազ են օգտագործում, ամսական 100 դրամի փոխարեն յուրաքանչյուր կուբամետրի դիմաց կվճարեն 80 դրամ (4 ցենտից պակաս): Այս մասին այսօր հաղորդել է «Գազպրոմ-Արմենիա» ընկերությունը, որն էլ գազամատակարարմամբ է զբաղվում հանրապետության տարածքում:
Կառույցը չի բացատրում, թե ինչով է պայմանավորված այս որոշումը: Սակայն ակնհայտ է, որ այն տեղավորվում է նոր կառավարության քաղաքականության շրջանակում: Նախարարների կաբինետն ավելի վաղ արդեն մեկ քառորդով նվազեցրել էր էլեկտրաէներգիայի սակագինն անապահով ընտանիքների համար: Որոշումն ուժի մեջ կմտնի հուլիսի 1-ին:
Սակավ եկամուտ ունեցող ընտանիքները քիչ կվճարեն նաև ջրի համար: Էներգետիկ ենթակառուցվածքների և բնական ռեսուրսների նախարար Արթուր Գրիգորյանը հաղորդել է, որ բանակցություններ են ընթանում խմելու ջրի սակագների նվազեցման ուղղությամբ:
Այսպիսով, մոտ 120 հազար ընտանիք գազի, ջրի և էլեկտրաէներգիայի դիմաց ավելի քիչ կվճարի:
Հայաստանի վարչապետ Նիկոլ Փաշինյանը կոչ է արել պարզել, թե արդյոք հնարավոր է սակագների էլ ավելի իջեցում.
«Դա լավ է [էլեկտրաէներգիայի սակագնի նվազեցումը – JAMnews], սակայն անհրաժեշտ են լրացուցիչ քնարկումներ: Մասնավորապես, պետք է հասկանալ, թե արդյոք կոռուպցիոն ռիսկեր կան «Էլեկտրական ցանցերում» և «Գազպրոմ Արմենիա» ընկերությունում:
Ավելի վաղ Փաշինյանն անդրադարձել էր գազի սակագնի նվազեցման հարցին: Նա նշել է, որ Ռուսաստանը Հայաստանին գազ է վաճառում բավականին ցածր գներով, սակայն հասարակ սպառողները դա չեն զգում: Փաշինյանը դա «ներհայկական» հարց է անվանել, և պատրաստվում է զբաղվել դրանով.
«Սահմանին Հայաստանը Ռուսաստանից էժան գազ է ստանում, բայց սահմանից մինչև սպառողների տուն հասնելը գազի սակագինը կրկնակի աճում է։ Մենք պետք է Հայաստանի ներսում քննարկենք այս խնդիրը և հասկանանք։ Սա չի վերաբերում Ռուսաստանի հետ ունեցած մեր հարաբերություններին… Հարցը կարող է կապված լինել ոչ այնքան արդյունավետ մենեջմենթի կամ նույնիսկ կոռուպցիոյի հետ»:
Ընդ որում, ըստ Փաշինյանի, Հայաստանը մտադիր է Ռուսաստանից գազի սակագնի համար ավելի զգալի զեղչ ստանալ:
«Իհարկե, մենք հույս ունենք ավելի էժան գազ ստանալ։ Հասկանում ենք, որ Հայաստանի համար սա բացառիկ գին է, բայց մենք կուզեինք, որ ավելի բացառիկ գին լինի։ Քննարկելու ենք այդ հարցերը, և հուսով եմ` հաջողություն կարձանագրենք», — ասել է վարչապետը:
