«Ժողովրդավարության գրավչությունը բարձրացնելու համար պետք է մեկտեղենք ուժերը»․ ՀՀ վարչապետ

Վերջին 3 տարում հայերը ավտորիտարիզմի փոխարեն ժողովրդավարությունն են ընտրել երկու անգամ։ Այս մասին հայտարարել է ՀՀ վարչապետը «Հանուն ժողովրդավարության» համաժողովի ընթացքում։

Առցանց ելույթում Նիկոլ Փաշինյանը խոսել է Հայաստանի ժողովրդավարացման ու առկա մարտահրավերների մասին։

---

• «Շատ օգտակար հանդիպում»․ Պուտին-Փաշինյան-Ալիև բանակցությունների բոլոր մասնակիցների կարծիքը

• Փաշինյանն ու Ալիևը Բրյուսելից առաջ Սոչիում կհանդիպեն։ Ինչի՞ հետ է դա կապված։ Մեկնաբանություն

• «Հայաստանը չի տրվելու շանտաժային քաղաքականությանը»․ Փաշինյան

---

Վարչապետ Փաշինյանի խոսքով՝ ժողովրդավարության համար Հայաստանը պայքարել է իր ժամանակակից պատմության ողջ ընթացքում, իսկ վերջին 3 տարում հայերը ավտորիտարիզմի փոխարեն ժողովրդավարությունն են ընտրել երկու անգամ։

«Առաջինը տեղի է ունեցել 2018 թ․-ին՝ ոչ բռնի, թավշյա հեղափոխությունը և դրան հաջորդած ազատ ու արդար արտահերթ ընտրությունները։ Երկրորդը տեղի ունեցավ 2021 թվականին՝ ավերիչ պատերազմից հետո։ Հայերը կրկին գնացին ընտրության, որպեսզի մենք չվերադառնանք անցյալի ճանապարհներին»,- ընդգծել է Նիկոլ Փաշիյանը։

Հայաստանի վարչապետի համոզմամբ՝ ժողովրդավարության ամրապնդումը մշտական աշխատանք է, որն ընթացքի մեջ է ՀՀ-ում։

Նիկոլ Փաշինյանը վստահեցրել է, որ իր ղեկավարած կառավարությունը ծրագրում է այնպիսի բարեփոխումներ, որոնք հավատ կձևավորեն նաև ՀՀ-ից դուրս՝ արտերկրի գործընկերների շրջանում․

«Մինչև 2026 թվականը մենք նպատակ ունենք հասնել համեմատական ցուցանիշների շարունակական բարելավումների, մասնավորապես՝ Համաշխարհային բանկի Կառավարման համաշխարհային ցուցիչի 50 միավորից հասնել 60-ի, և «Թրանսփարենսի Ինթերնեշնլի» կոռուպցիայի ընկալման ինդեքսի 49 միավորից՝ 60-ի»։

Փաշինյանն ընդգծել է, որ ժողովրդավարությունն ամրապնդելու ջանքերում կան բազմաթիվ մարտահրավերներ, որոնցից ամենամեծը՝ անվտանգությանը սպառնացող ռազմական բնույթի սպառնալիքներն են։

«Մեկ այլ մարտահրավեր է երկրի ներսում ժողովրդավարության համար պայքարը: Այդ մարտահրավերը բարդանում է, երբ սպառնալիքներ են ի հայտ գալիս մեր սահմաններից այն կողմ: Եթե մենք ուզում ենք վերականգնել ժողովրդավարության գրավչությունն ամբողջ աշխարհում, մենք պետք է մեկտեղենք ուժերը՝ միասին դիմակայելու այս մարտահրավերներին: Հայաստանը հանձնառու է նպաստելու ժողովրդավարության ամրապնդման համաշխարհային առաքելությանը, և մենք հույս ունենք, որ մենք միայնակ չենք», — ընդգծել է ՀՀ ղեկավարը։