Զանգվածային ցույցերի երկրորդ օրը․ քաղաքական ճգնաժամը Հայաստանում շարունակվում է
Հայաստանում քաղաքական ճգնաժամը խորանում է։ Այն առաջացել է 2020 թ-ի աշնանն Արցախում ռազմական գործողությունները դադարեցնելու մասին եռակողմ հայտարարության ստորագրումից հետո։ Ընդդիմությունն ու հազարավոր մարդիկ սկսել են պահանջել վարչապետի հրաժարականը, որը հայկական կողմի համար անբարենպաստ փաստաթուղթ է ստորագրել։
Փետրվարի 25-ին լարվածությունն էլ ավելի է մեծացել․ Նիկոլ Փաշինյանի հրաժարականն է պահանջել Հայաստանի ԶՈւ Գլխավոր շտաբի ղեկավարությունը։
Վարչապետը Գլխավոր շտաբի հայտարարությունը ռազմական հեղաշրջման փորձ է անվանել և դրա պետի պաշտոնանկության ընթացակարգ է սկսել։
Զինվորականների հայտարարությունից հետո Երևանում միաժամանակ երկու բազմամարդ հանրահավաք է անցկացվել՝ միավորված ընդիմադիր կուսակցությունների և վարչապետի կողմնակիցների։
Սակայն իրավիճակը ոչ մի կերպ չի փոխվել, ճգնաժամից դուրս գալու իշխանության և ընդդիմության մոտեցումները տարբեր են, հատման կետեր դեռ չկան։
Ստեղծված իրավիճակից ելք գտնելու նպատակով խորհրդարանական ընդդիմությունն առաջարկում էր փետրվարի 26-ին Ազգային ժողովի խորհրդի նիստ անցկացնել։ Սակայն այն չի կայացել քվորումի բացակայության պատճառով․ իշխող «Իմ քայլը» դաշինքի ներկայացուցիչները չէին եկել։
Նախագահ Արմեն Սարգսյանը հանդիպել է ԳՇ պետի հետ, խորհրդակցություններ սկսել խորհրդարանական խմբակցությունների ղեկավարների և «Հայրենիքի փրկության շարժման» մեջ միավորված ընդդիմության ներկայացուցիչների հետ։
Բոլոր մանրամասներն այն մասին, թե ինչ է կատարվում Երևանում․ նախագահի և ընդդիմության գործողությունները։
![Հայաստանում զանգվածային հանրահավաքներ են](https://jam-news.net/app/uploads/2021/02/155157741_3818705158210209_5285449700816274646_n.jpg)
- Քաղաքացիական պատերազմի եզրի՞ն։ Երևանում հանրահավաք են անում և ընդդիմությունը, և իշխանությունները։ Ֆոտոռեպորտաժ և վերլուծություն
- «Առանց Նիկոլ Հայաստան»․ տեսանյութ Երևանից, որտեղ վերսկսվել են ընդդիմության բողոքի ակցիաները
Վրաններ՝ խորհրդարանի շենքի մոտ
Ընդդիմադիր «Հայրենիքի փրկության շարժման» ներկայացուցիչները գիշերն անցկացրել են Բաղրամյան պողոտայում, որտեղ գտնվում են խորհրդարանի շենքն ու նախագահականը։ Հենց Ազգային ժողովի դիմաց ընդդիմադիրները վրաններ և վառարաններ են տեղադրել։
Փետրվարի 26-ի առավոտյան շարժման առաջնորդ ու ընդդիմության վարչապետի թեկնածու Վազգեն Մանուկյանը հաղորդել է, որ գիշերը հանգիստ է անցել։ Նա կոչ է արել որքան հնարավոր է շատ մարդկանց միանալ իրենց պայքարին, որպեսզի շարժումը համազգային բնույթ կրի։ Միայն այդ դեպքում, ըստ ընդդիմադիրների, կարելի է հասնել վարչապետի հրաժարականին։
Իշխող դաշինքը ձախողել է խորհրդարանական քննարկումը
Ընդդիմադիր խմբակցություններն առաջարկում էին խորհրդարանի խորհրդի նիստին քննարկել ստեղծված իրավիճակն ու արտահերթ լիագումար նիստ հրավիրել Հայաստանում ռազմական դրության չեղարկման հարցով։ Այն հայտարարվել է 2020 թ․ սեպտեմբերին՝ Արցախյան երկրորդ պատերազմի առաջին օրվանից։
Նիստը չի կայացել քվորումի բացակայության պատճառով։ Իշխող մեծամասնությունը բավականաչափ մանդատներ ունի ցանկացած որոշում կայացնելու կամ տապալելու համար։ Եվ Երևանում կրկին սկսել են քննարկել խորհրդարանական ընդդիմության անկարողությունը։
Իշխող դաշինքի բոյկոտի առնչությամբ «Լուսավոր Հայաստան» ընդդիմադիր կուսակցության առաջնորդ Էդմոն Մարուքյանը հայտարարել է, որ խորհրդարանի ղեկավարությունն՝ ի դեմս Արարատ Միրզոյանի, ոչինչ չի անում քաղաքական ճգնաժամից դուրս գալու համար և հրաժարվում է երկխոսության գնալ․
«Սա անհարգալից վերաբերմունք է բոլորի նկատմամբ։ Նման վարքն ինձ թույլ է տալիս ասել, որ Ազգային ժողովը նախագահ չունի։ Իրավիճակը երկրում ծայրահեղ լարված է, նյարդային, ես կասեի։ Չի կարելի սա այսպես թողնել։ Մեզ քաղաքական քննակումներ են պետք»։
Ընդդիմադիրները երթ են անցկացրել
Խորհրդարանում ձախողումից հետո ընդդիմադիրներն ու նրանց համախոհները շարժվել են դեպի նախագահի նստավայր՝ պահանջելով չստորագրել ԳՇ պետ Օնիկ Գասպարյանի հեռացման մասին հրամանը։
«Մենք պետք է նախագահից պահանջենք չտրվել Փաշինյանի շանտաժին, հստակ ձևակերպել առարկություններն ու Սահմանադրական դատարան դիմել [ԳՇ պետի պաշտոնանակության մասին] վարչապետի միջնորդության սահմանադրականության քննարկման համար», — ասել է շարժման համակարգող Իշխան Սաղաթելյանը։
![Հայաստանում զանգվածային հանրահավաքներ են](https://jam-news.net/app/uploads/2021/02/154751315_3818168341597224_2756298386881923581_o-1024x768.jpg)
Նախագահի հանդիպումները
Նախագահ Արմեն Սարգսյանը խորհրդակցություններ է անցկացրել խորհրդարանական խմբակցությունների, այդ թվում՝ իշխող «Իմ քայլի» ներկայացուցիչների հետ։ Նման հանդիպումներ նա սկսել է անցկացնել նախորդ տարվա աշնանից, երբ երկրում քաղաքական ճգնաժամ է առաջացել։ Նախագահն այդ կերպ փորձում է ելքեր գտնել։
Նա ընդունել է նաև «Հայրենիքի փրկության շարժման» առաջնորդներին։ Հանդիպման մանրամասներն է հայտնել դրա առաջնորդներից մեկը՝ Հայաստանի Ազգային անվտանգության ծառայության նախկին պետ Արթուր Վանեցյանը․
«Կոնսենսուս կա այն բանի շուրջ, որ իրավիճակը ծայրահեղ բարդ է, և ակներև է պետականության կորստի սպառնալիքը, իսկ ստեղծված իրավիճակից ելք գտնելու համար հստակ և օպերատիվ լուծումներ են պետք։ Հետևաբար, բոլոր ուժերը պետք է համախմբվեն այս իրավիճակից դուրս գալու համար»։