Ո՞վ կընտրվի Երևանի քաղաքապետ. 50% ձայն որևէ ուժ չի ստացել
Երևանի քաղաքապետի ընտրություն 2023
Երևանի ավագանու ընտրությունների նախնական արդյունքներն ամփոփվել են։ Անցողիկ շեմը հաղթահարել է 5 քաղաքական ուժ՝ իշխող «Քաղաքացիական պայմանագիր» կուսակցությունը, «Ազգային առաջընթաց», «Հանրային ձայն» և «Հանրապետություն» ընդդիմադիր կուսակցությունները, «Մայր Հայաստան» դաշինքը։ Սակայն նրանցից ոչ մեկը չի կարող միայնակ՝ առանց կոալիցիա կազմելու քաղաքապետ ընտրել, քանի որ չի հավաքել դրա համար անհրաժեշտ 50 տոկոսից ավելի ձայն։
Ո՞ր ուժերի հետ են պատրաստ կոալիցիա կազմել։ Ընտրություններին մասնակցող ուժերի մի մասն այս հարցին քարոզարշավի ընթացքում պատասխանել էր, որ այդ մասին կարելի է խոսել միայն արդյունքների ամփոփումից հետ։ Մինչ այդ «Մայր Հայաստան» դաշինքն էր հայտարարել, որ պատրաստ են համագործակցել նրանց հետ, ովքեր «ՔՊ-ի հետ չեն լինի»։ Նախկին իշխանությունների հետ չհամագործակցելու մասին հայտնել էր նաև «Ազգային առաջընթացը»։ Նախնական արդյունքների հրապարակումից հետո «Հանրային ձայնը» նշեց, որ պատրաստ է կոալիցիա ձևավորել «Ազգային առաջընթացի» և «Մայր Հայաստանի» հետ։ Նման սցենարի իրագործման պարագայում այս երեք ուժերը միասին կունենան քաղաքապետ ընտրելու համար անհրաժեշտ 33 մանդատ։
Ընտրություններն աչքի են ընկել նաև քաղաքացիների ցածր մասնակցությամբ։ Ընտրական իրավունք ունեցողների ընդամենը 28.46%-ն է իրացրել այն։ Կենտրոնական ընտրական հանձնաժողովի նախագահն ասում է՝ «սա Երևանի մասնակցության ամենացածր ցուցանիշն է»։
Ո՞ր ուժերն են հաղթահարել անցողիկ շեմը
Ավագանու ընտրություններին մասնակցում էր 14 քաղաքական ուժ՝ 13 կուսակցություն և 1 դաշինք։ Անցողիկ շեմը հաղթահարած ուժերն են՝
«Քաղաքացիական պայմանագիր» կուսակցությունը. քաղաքապետի թեկնածուն Տիգրան Ավինյանն է, ով Երևանի փոխքաղաքապետն է, նախկին փոխվարչապետ,
«Ազգային առաջընթաց» կուսակցությունը. քաղաքապետի թեկնածուն Երևանի նախկին քաղաքապետ Հայկ Մարությանն է, որը 44-օրյա պատերազմից հետո ՔՊ-ն լքելու դիմում էր ներկայացրել և մինչ օրս պնդում է՝ իշխող թիմը հեռացել է «հեղափոխական արժեքներից»,
«Մայր Հայաստան» դաշինքը. քաղաքապետի թեկնածուն Անդրանիկ Թևանյանն է: Նա վերջերս է վայր դրել պատգամավորական մանդատը: Թևանյանը Հայաստանի երկրորդ նախագահ Ռոբերտ Քոչարյանի հիմնադրած «Հայաստան» դաշինքի անդամ էր:
Օ«Հանրային ձայն» կուսակցությունը. քաղաքապետի թեկնածուն Արտակ Գալստյանն է, սակայն կուսակցության նախագահը Վարդան Ղուկասյանն է, որը հանրությանն առավել հայտնի է որպես բլոգեր և Դոգ մականունով, նա նախկին ոստիկան է, ՀՀ-ում չի բնակվում,
«Հանրապետություն» կուսակցությունը. քաղաքապետի թեկնածուն Արտակ Զեյնալյանն է, ով 2018-19 թթ․-ին զբաղեցրել է արդարադատության նախարարի պաշտոնը։
Ընտրական օրենսգրքի պահանջն է՝ ավագանիում պետք է լինի առնվազն 3 ուժ։ Օրենքի համաձայն՝ ավագանի մտնելու համար կուսակցությունները պետք է հավաքեն առնվազն 4, իսկ դաշինքները՝ 6 տոկոս քվե։
Ինչպե՞ս են բաշխվել ձայները
ԿԸՀ-ն ներկայացրել է նախնական արդյունքները՝ համաձայն Երևանի բոլոր տեղամասերից ստացված տեղեկատվության։ Արդյունքների համաձայն՝ ձայների գերակշիռ մասը՝ 32․57% «Քաղաքացիական պայմանագիր» կուսակցությունն է ստացել։
«Ազգային առաջընթաց» կուսակցությունը 18․89% է հավաքել, «Մայր Հայաստան» դաշինքը՝ 15.43%, «Հանրապետություն» կուսակցությունը՝ 11.32%, «Հանրային ձայն» կուսակցությունը՝ 9,68%։
«Որոշիչ է լինելու ընդամենը 1 ձայն»
Ընտրությունների նախնական արդյունքների համաձայն՝ ավագանու 65 մանդատները բաշխվել են հետևյալ կերպ՝
«Քաղաքացիական պայմանագիր»՝ 24 մանդատ,
«Հանրապետություն»՝ 8 մանդատ,
«Ազգային առաջընթաց»- 14 մանդատ,
«Մայր Հայաստան»-12 մանդատ,
«Հանրային ձայն»-7 մանդատ։
Քաղաքագետ Արեգ Քոչինյանը կարծում է՝ «Հանրապետություն» կուսակցությունը կաջակցի ՔՊ-ին և նրանք միասին կունենան 32 մանդատ։ Քիչ հավանական է համարում, որ մյուս երեք ուժերը միավորվեն, բայց այդ պարագայում նրանք 33 մանդատ կունենան, ինչն էլ պետք է քաղաքապետ ընտրելու համար։
«Եթե որևէ ընտրատեղամասում լինի վերահաշվարկ պատկերը կարող է փոխվել։ Ըստ էության, որոշիչ է լինելու ընդամենը մեկ ավագանու ձայնը [մանդատը]»,- գրել է Քոչինյանն իր ֆեյսբուքյան էջում։
«Ընտրողների որոշումն է»․ ցածր մասնակցության մասին
Երևանի ընտրողների ռեգիստրում հաշվառված է 824․250 քաղաքացի, քվեարկությանը մասնակցել է 234․553 քաղաքացի, կամ ընտրական իրավունք ունեցողների 28.46%-ը։
Կենտրոնական ընտրական հանձնաժողովի նախագահ Վահագն Հովակիմյանի խոսքով՝ վերջին ընտրությունների ընթացքում մասնկացության դինամիկան անընդհատ գնացել է դեպի նվազում։ Շեշտում է՝ ընտրողների որոշումն է․
«Ընդհանրապես ազատ և ժողովրդավարական ընտրությունները ողջ աշխարհում ունեն մասնակցության ցածր մակարդակ, որովհետև ընտրողին ինչպես կարող է հետաքրքրել մասնակցել, կարող է նաև չմասնակցել»։
Հովակիմյանն անդրադարձել է նաև քվեարկության վայրի վերաբերյալ ծանուցումներ չստանալու մասին ընտրողների բողոքներին։ Չի կարծում, թե դա կարող էր որևէ ազդեցություն ունենալ ընտրությունների արդյունքների վրա։ Ասում է՝ ընտրողները կարող էին իրենց տեղամասի մասին տեղեկանալ նաև ԿԸՀ կայքում տեղադրված ինտերակտիվ քարտեզի միջոցով։
Միաժամանակ նկատում է՝ մեկ ծանուցման համար պետությունը մոտ 330 դրամ է ծախսել, և կարիք կա, որ ծառայությունը մատուցող «Հայփոստ» ընկերությունը պարզաբանի՝ քանիսն է առաքվել։
«Պետք է ուղղակի պարզել, որպեսզի չմատուցված ծառայության համար պետությունը չվճարի։ Բայց որ նման դեպքեր եղել են, այո՛, մեր թեժ գծին էլ են ահազանգեր ստացվել»,— նշում է ԿԸՀ նախագահը։
Քաղաքական մեկնաբան Հակոբ Բադալյանի դիտարկմամբ՝ պասիվ քվեարկությունը վկայում է «նոր որակի և բովանդակության պահանջի» մասին։
«Բայց, դա նաև խորքային ճգնաժամի ահազանգ-ազդանշան է։ Այդ պահանջարկի հետ ռացիոնալ, գրագետ, հասուն աշխատանքի ունակ ուժ չգտնվելու պարագայում այն բերելու է քաղաքականության հանդեպ հանրային խորը ապատիայի և ճահճացման»,- կարծում է Բադալյանը։
Հետևեք մեզ — Facebook | Youtube | Telegram
Երևանի քաղաքապետի ընտրություն 2023
