«Երևանը կլինի հետիոտների և էլեկտրամոբիլների քաղաք». քաղաքապետարան
![](http://jam-news.net/app/uploads/2019/05/electric_car-1.jpg)
Երևանի քաղաքապետարանն աշխատում է բարենպաստ էկոլոգիական պայմաններ ստեղծել մայրաքաղաքում: Ավելի վաղ քաղաքապետը հայտարարել էր, որ Երևանը պետք է ավտոմեքենաների քաղաքից դառնա հետիոտների քաղաք: Իսկ հիմա դրվել են հաջորդ նպատակները. ստեղծել պայմաններ, որոնք կոգեշնչեն մարդկանց անցնել էլեկտրամոբիլների, ինչպես նաև ավելացնել էլեկտրականությամբ աշխատող քաղաքային տրանսպորտը:
Քաղաքապետարանը սկսում է իրենից
Երևանի քաղաքապետարանն անհրաժեշտ է համարում առաջին հերթին ավելացնել և թարմացնել էլեկտրականությամբ աշխատող տրանսպորտը: Մայրաքաղաքի քաղաքապետարանի մամուլի քարտուղարը հայտարարել է.
«Ինչպես գիտեք, աշխատանքներ են տարվում Երևանի տրասնպորտային նոր ցանցի ուղղությամբ: Նախատեսվում է հրաժարվել դիզելային շարժիչներից: Կլինեն գազային շարժիչներ, բայց նաև շարժակազմի շուրջ 10 տոկոսը կլինի էլեկտրական տրանսպորտ: Դա կլինի ներկա տրոլեյբուսային ցանցի վերազինման և համալրման կամ էլեկտրական ավտոբուսների տեսքով»:
Հակոբ Կարապետյանը հայտնել է, որ դրա համար կներգրավվեն դրամաշնորհային միջոցներ:
• Հայաստանում հեռախոսների օգտագործման պատճառով աճել է վթարների թիվը
• Հայ վարորդները կարող են աջ ղեկով մեքենաներ ներկրել
Խթաններ՝ էլեկտրամոբիլներ օգտագործելու համար
Էլեկտրամոբիլների օգտագործումը խթանելու համար կառավարությունը արտոնություններ է տալիս և պատրաստվում է զարգացնել դրա համար անհրաժեշտ ենթակառուցվածքները:
Արդեն գործում է ավտոմեքենաների արտանետումների համար բնապահպանական հարկից ազատում: Իսկ խորհրդարանն առաջին ընթերցմամբ արդեն ընդունել է օրինագիծ՝ էլեկտրամոբիլներ ներմուծելիս ԱԱՀ-ից ազատելու մասին:
Ընդ որում, կառավարությունում արդեն հաշվել են, որ այդ հանգամանքը զգալիորեն չի ազդի բյուջեի մուտքերի վրա, քանի որ մեկ տարում հնարավոր չէ ներմուծել էլեկտրական շարժիչով շատ մեծ թվով ավտոմեքենաներ:
Էլեկտրամոբիլների թիվը
Ըստ ոստիկանության՝ Հայաստանում այժմ գրանցված է ընդամենը 15 էլեկտրամոբիլ: Առաջին 7-ը ներմուծվել են 2017թ., ևս 7-ը՝ 2018թ., իսկ 2019թ. առաջին եռամսյակում՝ միայն մեկ մեքենա:
Էլեկտրամոբիլների և էլեկտրական քաղաքային տրանսպորտի օգտագործումը, ըստ քաղաքապետարանի փորձագետների, զգալիորեն կբարելավի բնապահպանական վիճակը քաղաքում՝ օդի աղտոտվաղության առումով:
Լիցքավորման կայաններ
Էլեկտրամոբիլների օգտագործումը խթանելու նպատակով նախատեսված է 2020թ. զգալիորեն բարելավել ենթակառուցվածքները, մասնավորապես, ավելացնել դրանց լիցքավորման կայանների թիվը:
Առայժմ հստակ չէ՝ քանիսը կլինեն, քանի որ հայտնի չէ՝ արդյոք այդ կոչին կհետևեն Հայաստանի քաղաքացիները, և որքան էլեկտրական շարժիչով ավտոմեքենա կհայտնվի երկրում առաջիկայում:
Առայժմ Հայաստանում գործում է ընդամենը 9 կայան, որից 4-ը՝ Երևանում: Դրանց մեծ մասը նախատեսված է «Տեսլա» մակնիշի էլեկտրամոբիլների համար: Բայց քաղաքապետարանն արդեն հոգացել է, որպեսզի ավելանան այնպիսի կայանների թիվը, որտեղ հնարավոր կլինի լիցքավորել այլ մակնիշի ավտոմեքենաներ: