Ադրբեջանի ֆուտբոլի հավաքականը նոր գլխավոր մարզիչ ունի
Ադրբեջանի ֆուտբոլի ֆեդերացիան (ԱՖՖ) վեցամյա պայմանագիր է կնքել «Ղարաբաղ» ակումբի գլխավոր մարզիչ Ղուրբան Ղուրբանովի հետ: 45-ամյա մասնագետը դեկտեմբերի սկզբից մարզելու է ազգային հավաքականը՝ միաժամանակ պահպանելով իր նախկին պաշտոնը «Ղարաբաղում»:
Գուրբանովն Ադրբեջանի հավաքականի գլխավոր մարզչի պաշտոնում կփոխարինի խորվաթ մասնագետ Ռոբերտ Պրոսինեչկիին: Վերջինիս գլխավորությամբ Ադրբեջանի հավաքականը 2018թ-ի աշխարհի առաջնության նախընտրական մրցաշարում հավաքել է իր համար ռեկորդային 10 միավոր: Այնուամենայնիվ ԱՖՖ-ն որոշել է չշարունակել խորվաթի հետ պայմանագիրը:
ԱՖՖ նախագահ Ռովնագ Աբդուլաևը (որը նաև պետական նավֆթային SOCAR ընկերության նախագահն է) ասել է, որ Գուրբանովը ընտրվել է միաձայն: Նա նշել է, որ Գուրբանովը կմնա «Ղարաբաղի» գլխավոր մարզչի պաշտոնում:
«Նախորդ գլխավոր մարզիչների հետ մենք, որպես կանոն, պայմանագիր էինք ստորագրում 2 տարով: Նոր գլխավոր մարզչի հետ 6-ամյա պայմանագիր է կնքվել, որը 3 փուլ է ներառում»:
Աբդուլաևը հրաժարվեց բացահայտել պայմանագրի մանրամասները. «Պայմանագրի պայմանը հայրենիքին ծառայելն է»:
Գուրբանովն իր հերթին շնորհակալություն է հայտնել ԱՖՖ-ին վստահության համար:
«Յուրաքանչյուր մարզչի երազանքն ազգային թիմի հետ աշխատելն է: Դա դժվար և պատասխանատու աշխատանք է: Երկրպագուների ողջ ուշադրությունը գամված է հավաքականին: Բոլորն ուզում են, որ առաջին թիմը հաջողության հասնի: Ուզում ենք հաջողության հասնել և բարելավել արդյունքները: Մենք երկարաժամկետ ծրագիր կունենանք, որը կիրականացնենք փուլ առ փուլ: Աշխատանքը շատ է, և ես ու ղեկավարությունը ցանկանում ենք կատարել այն», — Գուրբանովի խոսքերն է մեջբերում azerisport.com-ը:
«Ղարաբաղ» ֆուտբոլային ակումբի ղեկավարությունը ազգային հավաքականում իր մարզչի նշանակմանը հավանություն է տվել: «Չեմ կարծում, որ երկու թիմերում պաշտոնները համատեղելը բացասական ազդեցություն կունենա մեր ակումբի արդյունքների վրա: Պետք չէ մոռանալ, որ ազգային հավաքականի հիմքը «Ղարաբաղի» խաղացողներն են», — ասել է Աղդամի ակումբի տնօրեն Էմրախ Չելիքելը:
