Ադրբեջանը կկրկնապատկի Եվրոպա արտահանվող գազի ծավալը. հասարակության հակասական արձագանքը
Ադրբեջանը հուշագիր է ստորագրել Եվրամիության հետ
Ադրբեջանը և Եվրամիությունը հուշագիր են ստորագրել էներգետիկ ոլորտում։ Փաստաթղթի համաձայն՝ Բաքուն կկրկնապատկի Եվրոպա արտահանվող բնական գազի ծավալը, այն կհասնի տարեկան 20 միլիարդ խորանարդ մետրի։ «Ուկրաինայի դեմ ագրեսիայից հետո ռուսական գազն այլևս պահանջարկ չունի Եվրոպայում»,- Բաքվում հայտարարել է Եվրահանձնաժողովի նախագահ Ուրսուլա ֆոն դեր Լեյենը։ Եվրամիության հետ ստորագրված փաստաթուղթը հակասական կարծիքներ է առաջացրել քաղաքացիական հասարակության և Ադրբեջանի ակտիվիստների շրջանում։
2022 թվականի հուլիսի 18-ին Ադրբեջանի և Եվրամիության միջև ստորագրվել է «Փոխըմբռնման հուշագիր էներգետիկ ոլորտում ռազմավարական գործընկերության վերաբերյալ Եվրամիության՝ ի դեմս Եվրահանձնաժողովի, և Ադրբեջանի Հանրապետության միջև»:
Փաստաթուղթը ստորագրել են Ադրբեջանի նախագահ Իլհամ Ալիևը և Եվրահանձնաժողովի նախագահ Ուրսուլա ֆոն դեր Լեյենը։
«Սա Ադրբեջանի և Եվրամիության միջև էներգետիկ համագործակցության երրորդ փաստաթուղթն է, և այդ համաձայնագրերը փոխել են Եվրոպայի էներգետիկ քարտեզը», — ստորագրման արարողությունից հետո ասել է Ալիևը։
![](https://jam-news.net/app/uploads/2022/07/16581490773108632447_1000x669.jpg)
Նրա խոսքով՝ այսօր Ադրբեջանը կարևոր դեր է խաղում Եվրոպայի էներգետիկ անվտանգության ոլորտում, մասնավորապես՝ «Հարավային գազային միջանցք» նախագծի շրջանակներում.
«Այս տարի մենք նոր էներգետիկ երկխոսություն սկսեցինք և շարունակում ենք խորացնել այն։ Դա վերաբերում է վերականգնվող էներգետիկայի ոլորտում նախագծերին և գազի նոր հանքավայրերի զարգացմանը։ Խոսքը, մասնավորապես, ազատագրված տարածքներում և Կասպից ծովում իրականացվող նախագծերի մասին է»։
Եվրահանձնաժողովի նախագահն իր ելույթը սկսել է հայտարարությամբ. «Ուկրաինայի դեմ ագրեսիայից հետո ռուսական գազն այլևս պահանջարկ չունի Եվրոպայում»։
Ուրսուլա ֆոն դեր Լեյենն ընդգծել է Ադրբեջանի կարևոր դերը Եվրոպայի բնական գազի կարիքների բավարարման գործում.
«Այսօր ստորագրված հուշագիրը թույլ կտա կրկնապատկել Ադրբեջանից մատակարարվող գազի ծավալը՝ այն հասցնելով տարեկան 20 միլիարդ խորանարդ մետրի և զգալիորեն նվազեցնելով մատակարարումները Ռուսաստանից»։
Եվրահանձնաժողովի նախագահը հայտնել է նաև, որ Ադրբեջանի ղեկավարի հետ հանդիպման ընթացքում քննարկվել են երկկողմ հարաբերություններին առնչվող բազմաթիվ այլ հարցեր, այդ թվում՝ տնտեսական համագործակցության և առևտրի հետ կապված:
Նա նաև նշել է հումանիտար ոլորտում համագործակցության անհրաժեշտությունը և ԵՄ ներգրավվածությունը քաղաքացիական հասարակությանն ու անկախ լրատվամիջոցներին աջակցելու գործում։
«Այդ նպատակների համար մենք հատկացրել ենք 2,5 միլիոն եվրո»,- ընդգծել է Եվրահանձնաժողովի նախագահը։
Մեկնաբանություններ
Եվրամիության հետ ստորագրված փաստաթուղթը հակասական կարծիքներ է առաջացրել քաղաքացիական հասարակության և Ադրբեջանի ակտիվիստների շրջանում։ Նրանց կարծիքով՝ Եվրոպան «հերթական գործարքն է կնքել ադրբեջանական ռեժիմի հետ, որը կոպտորեն խախտում է մարդու իրավունքները»։
Ահա սոցցանցերի ադրբեջանական հատվածից մի քանի հատկանշական մեկնաբանություններ.
«Այսպիսով ադրբեջանական ընդդիմության «Եվրոպական գիրքը» կարելի է փակված համարել։
«Ես զարմացած եմ, որ գրեթե բոլոր ընդդիմադիրները կամ իրենց ընդդիմադիր կոչողները ողջունում են այսօրվա հուշագիրը։ Եվ ոչ ոք եվրոպացիներին չի հարցնում, թե ինչու են նրանք հերթական գործարքը կնքում Ալիևի ռեժիմի հետ։ Ի՞նչ է լինելու մարդու իրավունքների հետ այս երկրում»։
«Մի բան ակնհայտ է՝ Եվրոպային միայն Ադրբեջանի էներգետիկ ռեսուրսներն են պետք։ Նրանք թքած ունեն մարդկանց խնդիրների վրա։ Եվ մի կարևոր բան էլ՝ եթե Եվրոպան մեզ մոտ չի գալիս, մենք ինքներս պետք է գնանք Եվրոպա։ Այնպես որ, մոտ ապագայում պատրաստվում եմ հեռանալ երկրից»:
Ադրբեջանը հուշագիր է ստորագրել Եվրամիության հետ