Թեև «ավանդույթի համաձայն» էլեկտրաէներգիայի պակասությունը Աբխազիայում սկսվում է հոկտեմբերին, սակայն հանրապետությունը կսկսի էլեկտրաէներգիա գնել Ռուսաստանից արդեն օգոստոսից: Դա արվում է սակագնի վրա գումար տնտեսելու նպատակով։
«Սովորաբար հոկտեմբերի 1-ից են սկսվում էլեկտրաէներգիայի հետ կապված որոշակի բարդությունները, դրա համար հանձնարարականներ են տրվել՝ կազմել Ռուսաստանից էլեկտրաէներգիայի փոխանցման գրաֆիկ: Որպեսզի տարեվերջին չփնտրենք էլեկտրաէներգիա գնելու համար միջոցներ, օգոստոս ամսից կսկսենք ձեռք բերել ավելի ցածր սակագներով՝ շաբաթավերջի, գիշերային ժամերի սակագներով, ինչը երկու անգամ ավելի էժան է, քան նոյեմբերի ու դեկտեմբերի գները», – բացատրել է Աբխազիայի նախագահ Բադրա Գունբան:
Նրա խոսքով՝ կառավարությունը մի շարք միջոցառումներ է մշակում՝ կրճատելու համար էներգիայի սեզոնային պակասությունը, որը նկատվում է Աբխազիայում 2020 թվականից, երբ կրիպտոարժույթների մայնինգի պատճառով էլեկտրաէներգիայի սպառումը հանրապետությունում կտրուկ աճեց 2-ից 3 միլիարդ կվտ/ժ:
Այդ ժամանակվանից էլեկտրաէներգիայի պակասությունը տատանվում է 30 տոկոսի շրջակայքում: Վերջին ձմեռը հատկապես ծանր էր Աբխազիայի համար՝ շատ տներում օրվա մեծ մասը էլեկտրաէներգիա չկար:
Էներգիայի պակասության հիմնական պատճառը վերացնել դեռևս չի հաջողվում և դժվար թե հաջողվի։ Ակնհայտ է, որ ապօրինի մայնինգի դեմ պայքարը կառավարությունը տանուլ է տվել:
Իսկ էլեկտրաէներգիայի միակ սեփական աղբյուրը՝ Ինգուրի ՀԷԿ-ը, ի վիճակի չէ ամբողջությամբ ծածկել Աբխազիայի կարիքները:
Մինչ այս պակասության մի մասը ծածկվում էր Ռուսաստանից «հումանիտար օգնության» հաշվին՝ աշնան և ձմեռվա ամիսներին անվճար էլեկտրաէներգիայի փոխանցման շնորհիվ: Մնացյալ մասն էլ Աբխազիան գնում էր նույն ՌԴ-ից արտոնյալ գնով:
Սակայն բյուջեի քրոնիկ գումարային պակասության պատճառով նույնիսկ այս զեղչային գնումները Աբխազիան այլևս չի կարող իրեն թույլ տալ: Այդ իսկ պատճառով պակասության ժամանակահատվածում սկսվում են էլեկտրաէներգիայի հովհարային անջատումները։ Հոսանքն անջատվում է օրական 4-6 ժամով:
