როგორ შეხვდა საქართველო კორონავირუსის პირველ შემთხვევას? ხელისუფლების და მოქალაქეების რეაქცია
ახალი კორონავირუსის პირველი შემთხვევა საქარველოში 26 თებერვალს დადასტურდა.
გვიან საღამოს გამართულ სპეციალურ ბრიფინგზე ჯანდაცვის მინისტრმა ეკატერინე ტიკარაძემ განაცხადა, რომ ვირუსი დაუდგინდა საქართველოს მოქალაქეს, რომელიც 25 თებერვალს ირანიდან აზერბაიჯანის გავლით შემოვიდა.
იგი არის დაახლოებით 50 წლის მამაკაცი. როგორც მედიკოსები ამბობენ, ამ ეტაპზე ის თავს გრძნობს კარგად, აქვს დაბალი (37 გრადუსი) სიცხე და მკურნალობას გადის თბილისის ინფექციური საავადმყოფოს ბოქსირებულ პალატაში.
ეს ადამიანი ინფექციურ საავადმყოფოში პირდაპირ საქართველო-აზერბაიჯანის საზღვრიდან მოხვდა. საზღვარზე მას მებაჟეებმა დისტანციურად გაუზომეს სიცხე და რადგან ტემპერატურა მომატებული ჰქონდა და იგი ირანიდან მოდიოდა, მიიჩნიეს საეჭვოდ და გადაიყვანეს შესამოწმებლად.
მიუხედავად ამ გამოვლენილი შემთხვევისა, ჯანდაცვის მინისტრის განცხადებით, საქართველოში ეპიდემიის რისკი არ არსებობს. პრემიერ-მინისტრი კი, არწმუნებს მოქალაქეებს, რომ შესაბამისი უწყებები სიტუაციას სრულად აკონტროლებენ და ქვეყანაში პანიკის საფუძველი არ არსებობს.
• კორონავირუსი: იტალია ევროპასა და სხვა კონტინენტებზე დაავადების კერა ხდება. განახლება
რა ვიცით ინფიცირებულის მარშრუტზე და ადამიანებზე, რომლებთანაც მას კონტაქტი ჰქონდა
ინფიცირებული მოქალაქის მკურნალობის პარალელურად, მიმდინარეობს სხვა პროცესიც – სპეციალისტები ახლა სწავლობენ მის ეპიდანამნეზს, ანუ დეტალურად იკვლევენ ირანიდან დაწყებული, ვისთან ჰქონდა კონტაქტი ამ ადამიანს.
ვიცით ის, რომ მოქალაქე საქართველოში შემოვიდა სამარშრუტო ტაქსით.
დაავადებათა კონტროლის ეროვნული ცენტრის ხელმძღვანელმა ამირან გამყრელიძემ ბრიფინგზე განაცხადა, რომ გამოვლენილია რამდენიმე ადამიანი, ვისთან ერთადაც ინფიცირებული მგზავრობდა. გამყრელიძე არ აკონკრეტებს, არიან თუ არა ისინი საქართველოს მოქალაქეები.
მან მხოლოდ ის თქვა, რომ რამდენიმე მათგანი კარანტინში აზერბაიჯანშია მოთავსებული. ხოლო ინფიცირებული პირის უშუალო თანამგზავრი – პირი, ვისთან ერთადაც ის მოგზაურობდა, თბილისის ინფექციურ საავადმყოფოში გადის კარანტინს – მას უკვე აუღეს სინჯი და კორონავირუსი არ დაუდასტურდა.
ამასთან, უკვე კარანტინში არიან მოთავსებული ის მებაჟეებიც, რომლებსაც ჰქონდათ კონტაქტი ინფიცირებულ მოქალაქესთან საზღვრზე. მინისტრის თქმით, მებაჟეები სრულად ეკოპირებულები იყვნენ, რაც ამცირებს მათი დასნებოვნების რისკს.
არის თუ არა სხვა საეჭვო შემთხვევები?
ლუგარის ლაბორატორია დღეს დაადგენს, ხომ არ აქვთ კორონავირუსი COVID-19 საქართველოს კიდევ ორ მოქალაქეს, რომლებიც 26 თებერვალს, ღამით მოათავსეს თბილისის ინფექციურ საავადმყოფოში. ორივე მათგანი ირანში იმყოფებოდა და საქართველოში თებერვლის შუა რიცხვებში დაბრუნდა.
ჯანდაცვის მინისტრის ინფორმაციით, ინფექციურ საავადმყოფოში ამ დროისთვის სულ 10 პაციენტი რჩება, აქედან ხუთი იტალიიდან ჩამოვიდა (ერთი იტალიის მოქალაქეა, ოთხი კი საქართველოს), ხოლო ხუთი ირანიდან (ერთი საქართველოს მოქალაქეა, დანარჩენები აზერბაიჯანის მოქალაქეები არიან).
კორონავირუსი არ დაუდგინდათ, თუმცა საინკუბაციო 14-დღიან პერიოდს საკარანტინო სივრცეში გაატარებს ასევე 13 მოქალაქე. ისინი რეგიონში, სპეციალურად მომზადებულ სასტუმროებში არიან გადაყვანილი.
რამდენად მზად არის ჯანდაცვის სექტორი?
ვინაიდან საქართველოში უკვე დაფიქსირდა კორონავირუსის პირველი შემთხვევა, ქვეყანა გადავიდა დაბალი რისკის ზონიდან მაღალი რისკის ზონაში, რაც იმას ნიშნავს, რომ ამოქმედდა “გეგმა ბ” – მედპერსონალის და სამედიცინო სისტემის მზაობა პაციენტების მისაღებად.
კვლევებს კორონავირუსზე საქართველოში ატარებენ ლუგარის ქართულ-ამერიკულ ლაბორატორიაში. მომარაგებულია კორონავირუსის ორი ათასზე მეტი ტესტი. თითო კვლევას სჭირდება 4-5 საათი.
ქვეყნის მასშტაბნით კორონავირუსით ინფიცირებულთა მისაღებად მზად არის ოთხი ინფექციური საავადმყოფო (თბილისში, ქუთაისში, ბათუმსა და ზუგდიდში), სადაც 500 საწოლია. თუ ინფიცირებულთა რაოდენობა მეტი იქნება, შემდეგ უკვე მოხდება გადანაწილება მრავალპროფილურ კლინიკებში. სულ ქვეყანაში 14 ათასი საწოლია. მათ შორის არის 120 ბოქსირებული პალატა.
როგორც ამირან გამყრელიძე ამბობს, მზად არიან მედიკოსებიც, რომლებსაც აქვთ სხვა პანდემიური გრიპების დროს მუშაობის გამოცდილება. ასევე, ამ ეტაპისთვის საკმარისია მედიკოსებისთვის საჭირო ეკიპირების რაოდენობაც.
რაც შეეხება პრევენციულ ზომებს – საქართველოს უკვე შეჩერებული აქვს ავიამიმოსვლა ჩინეთთან და ირანთან. თუმცა, კორონავირუსის პირველი შემთხვევის დაფიქსირების შემდეგ, ირანთან მიმოსვლა კიდევ უფრო მკაცრდება – ორი კვირით სრულად შეიზღუდება ირანის მოქალაქეების მიმოსვლა საქართველოში, ისევე, როგორც საქართველოს მოქალაქეების – ირანში.
ჯანდაცვის მინისტრის თქმით, საქართველოში საგანგებო მდგომარეობის გამოცხადების აუცილებლობა ამ ეტაპისთვის არ არსებობს.
ასევე არ იგეგმება სასწავლო პროცესის შეწყვეტა.
„არ არსებობს არანაირი ეპიდემიოლოგიური საფრთხე“, – თქვა ეკატერინე ტიკარაძემ.
პრემიერ-მინისტრმა გახარიამ უწყებათაშორის საბჭოს ხელმძღვანელობას კორონავირუსთან დაკავშირებით საზოგადოების ყოველდღიური ინფორმირებულობა დაავალა.
“ჩვენი მთავრობის, ჯანდაცვის სისტემის ძირითადი ამოცანაა, დროული გამოვლენა, ხოლო, ჩვენი, როგორც მოქალაქეების ძირითადი ამოცანაა, პირადი ჰიგიენის ელემენტარული წესების დაცვა. რაც რთული არ არის. ვფიქრობ, ჩვენ ამ გამოწვასაც გავუმკლავდებით ყველანი ერთად წყნარად, მშვიდად,” – აღნიშნა გახარიამ.
რა რეაქცია ჰქონდათ მოქალაქეებს?
მიუხედავად ამ დამამშვიდებელი განცხადებებისა, კორონავირუსის პირველი შემთხვევის დაფიქსირებას საქართველოში ერთგვარი პანიკა მაინც მოჰყვა.
პირველ რიგში ეს გამოიხატა უზარმაზარი რიგებით აფთიქებში – მოქალაქეები პირბადეების და სხვა მედიკამენტების საყიდლად აფთიაქებში გაეშურნენ.
ასევე ამ ინფორმაციის გავრცელებიდან ორ საათში უკვე თითქმის დაცარიელდა დიდი სუპერმარკეტების დახლები. ადამაინებმა პროდუქტების, განსაკუთრებით არამალფუჭებადი საკვების – ზეთის, მაკარონის, ლობიოს, ბურღულის, ორცხობილების და ა.შ. მომარაგება დაიწყებს.
ამ ყველაფერს დიდი მხიარულება მოჰყვა ფეისბუკზე. პანიკური სტატუსების გვერდიგვერდ გაჩნდა ბევრი იუმორისტული პოსტი და მემი.
მაგალითად, ფეისბუკ-მომხმარებლები განსაკუთრებით გამხიარულდნენ ჟურნალისტების მიერ ინფექციურ საავადმყოფოში ჩაწერილ ამ ვიდეოზე.
აქ ირანის მოქალაქე, რომელიც კარანტინში იყო, უყვება ჟურნალისტებს, რომ ჯანმრთელია, ვირუსი არ დაუდგინდა და შეუძლია სახლში წავიდეს. ამ დროს გამოდიან მედიკოსები და ამ მოქალაქეს უკან საავადმყოფოში ექაჩებიან. ვიდეო ათი ათასამდე ადამიანმა გააზიარა:
