სომხეთში, კორონავირუსის გამო, ერთი თვით საგანგებო მდგომარეობა გამოცხადდა

სომხეთში, კორონავირუსის ეპიდემიის გამო, 16 მარტს საგანგებო მდგომარეობა გამოცხადდა, რომელიც 2020 წლის 14 აპრილამდე იმოქმედებს.

• კორონავირუსი: გამოცხადდა პანდემია. რას ნიშნავს ეს და რას უნდა ველოდოთ

• საქართველოს მთავრობა აქვეყნებს კონკრეტულ გეგმას ეკონომიკის გადასარჩენად. რა წერია გეგმაში

• როგორია კორონავირუსის ფაქტები და რიცხვები კავკასიის რეგიონში. განახლებადი

საკამათო გახდა ქვეყანაში უცხოელების შესვლაზე აკრძალვის დაწესება

საგარეო საქმეთა მინისტრი ზოგრაბ მნაცაკანიანი სომხეთში ნებისმიერი ქვეყნიდან ჩასული უცხო ქვეყნის მოქალაქის შეშვებაზე აკრძალვის დაწესების ინიციატივით გამოვიდა, იმის მიუხედავად, თუ საიდან ჩამოვიდა.

მის წინააღმდეგ გამოვიდა ჯანდაცვის მინისტრი არსენ ტოროსიანი, რომლის განცხადებითაც, ავიამიმოსვლის სრულად აკრძალვა ტვირთგადაზიდვის პარალიზებას გამოიწვევს, რაც ძალიან სახიფათოა ჯანდაცვისთვის.

„ვინ შემოიტანს ჩინეთიდან თუნდაც სპეციალურ ტესტებს? ზღვით და შემდეგ ავტომობილით? წინააღმდეგი არ ვართ, რომ სრულად ჩავიკეტოთ, მაგრამ ჩვენ ამის პოტენციალი არ გვაქვს“, – განაცხადა ტოროსიანმა.

ხანგრძლივი კამათის შემდეგ, მინისტრთა კაბინეტის წევრებმა ერთხმად დაუჭირეს მხარი გენპროკურორის, არტურ დავთიანის წინადადებას: სრულად აიკრძალოს შეშვება, მაგრამ გაითვალისწინონ გამონაკლისი. თითოეულ კონკრეტულ შემთხვევასთან დაკავშირებით გადაწყვეტილებას კომენდანტი მიიღებს, რომლის თანამდებობაზეც ვიცე-პრემიერი, ტიგრან ავინიანი დაინიშნა.

რა შეზღუდვები მიიღეს

• შეჩერებულია სწავლება ყველა საბავშვო ბაღსა და სასწავლო დაწესებულებაში.

• უნდა დაიხუროს ყველა კაფე, რესტორანი და სავაჭრო ცენტრი.

• აკრძალულია ყველანაირი შეკრება, რომელშიც 20-ზე მეტი ადამიანი მონაწილეობს, მათ შორის, რელიგიური რიტუალები. გამონაკლისის დაშვება მხოლოდ კომენდანტს შეუძლია.

• აკრძალულია ამანათების გადაცემა სამხედრო ნაწილებსა და ციხეებში.

• საქონლის ექსპორტისთვის საჭიროა დამატებითი თანხმობის მიღება ჯანდაცვისა და ეკონომიკის სამინისტროებისგან.

• კორონავირუსთან დაკავშირებული სახიფათო მდგომარეობის გამო, ქვეყანაში შესვლა აკრძალულია ყველასთვის, სომხეთის მოქალაქეებისა და მათი ოჯახის წევრების გარდა, მიუხედავად ამ უკანასკნელთა მოქალაქეობისა.

• სომხეთის მოქალაქეებს არ შეუძლიათ სახმელეთო გზით ქვეყნის დატოვება.

• საგანგებო მდგომარეობის უზრუნველსაყოფად, შესაძლოა დამონტაჟდეს გამშვები პუნქტები, სადაც ექიმები ადამიანებს შეამოწმებენ.

• ადგილობრივ მედიას უფლება ეძლევა გაავრცელოს მხოლოდ ოფიციალური ინფორმაცია – იკრძალება ახალი ამბების გამოქვეყნება, რომელთაც შესაძლოა პანიკის პროვოცირება მოახდინონ.

საეკლესიო მსახურება დაიხურება სამწყსოსთვის

16 მარტს, სომხეთის აპოსტოლურმა ეკლესიამ ასევე მიიღო გადაწყვეტილება კორონავირუსის გავრცელებასთან დაკავშირებით.

საგანგებო მდგომარეობის პირობებში, ყველა საეკლესიო რიტუალი ჩატარდება მორწმუნეების მონაწილეების გარეშე, ნათქვამია ეკლესიის განცხადებაში.

ავიამიმოსვლა სომხეთსა და რუსეთს შორის შეჩერებულია

ჯერ კიდევ საგანგებო მდგომარეობის გამოცხადებამდე მიიღეს გადაწყვეტილება, ორი კვირით შეჩერებულიყო მგზავრთა გადაადგილება სომხეთსა და რუსეთს შორის. ამის შესახებ ტელეფონით შეთანხმდნენ პრემიერ-მინისტრები, ნიკოლ ფაშინიანი და მიხაილ მიშუსტინი.

რუსეთისა და სომხეთის მოქალაქეებს სამშობლოში დაბრუნების საშუალება მიეცემათ.

აკრძალულია სამხედრო მოსამსახურეების შვებულებებში გაშვება და სამსახურიდან გათავისუფლება

ასეთი გადაწყვეტილება სომხეთის თავდაცვის სამინისტრომ მიიღო.

კორონავირუსის სტატისტიკა სომხეთში

16 მარტის მონაცემებით, სომხეთში კორონავირუსით ინფიცირების 52 შემთხვევაა დაფიქსირებული. გამოჯანმრთელდა ერთი ადამიანი.

ინფიცირების 19 შემთხვევა ერთ ქალს უკავშირდება, რომელიც ცოტა ხნის წინ დაბრუნდა იტალიიდან. მიუხედავად ტემპერატურისა და დაავადების სხვა სიმპტომებისა, ის რამდენიმე ხალხმრავალ ღონისძიებას დაესწრო, მათ შორის, ნიშნობას.

შედეგად, რამდენიმე ათეული ადამიანი კარანტინშია. ინფიცირებულთა შორის ერთი სკოლის მოსწავლეცაა.