Prezident İlham Əliyev bildirib ki, Azərbaycan “ənənəvi ölkə”dir və Avropaya inteqrasiya etməyəcək
Azərbaycan ənənəvi ölkə olaraq qalmalıdır və böhran keçirən, islamı sıxışdıran, kişi ilə qadın arasında fərq qoymayan Avropaya inteqrasiya edə bilməz. Bunu Bakı Dövlət Universitetinin 100 illiyi münasibətilə keçirilmiş təntənəli mərasimdə prezident İlham Əliyev bildirib. Onun bu və digər sözləri cəmiyyətdə bir çoxların şok vəziyyətinə salıb.
• Məzuniyyət əvəzinə toy: Azərbaycanda qadın təhsilinin problemləri haqqında
• «Heç vaxt bilmirsən ki, evə sağ qayıdacaqsan, ya yox» – transgenderlər Gürcüstanda necə yaşayır
Bakı Dövlət Universiteti 1919-cu ildə, Azərbaycan Xalq Cümhuriyyətinin (AXC) dövründə təsis olunub. Yubiley tədbiri noyabrın 26-da keçirilib. Prezident İlham Əliyev mərasimdə nitq söyləyib və nitqində ölkənin uğurları barədə, müstəqilliyin qorunmasının, ənənəvi dəyərlərin mühafizəsinin vacibliyi və Azərbaycana düşmən olan qüvvələrdən müdafiənin zəruriliyindən çox danışıb.
İlham Əliyev məhz nə deyib
Kənardan yardım və xarici kreditlər barədə:
«Bu gün bəzi hallarda bəzi xarici dairələrdən eşidirik ki, biz Azərbaycana kömək etmək istəyirik, biz Azərbaycanı belə inkişaf etmiş ölkə kimi görmək istəyirik. Hamısı yalandır.
Mən tam səmimiyyətlə deyirəm. Bizim ən ağır günlərimizdə xəzinə boş idi, Xalq Cəbhəsi-Müsavat cütlüyü talamışdı, ləl-cavahirat fondunu talamışdı. İnsanlar öz axırıncı qızıl əşyalarını aparırdılar ki, ordumuza kömək etsinlər. O vaxt prezident, dövlət katibi, baş nazir o ləl-cavahirat fondunu talan etmişlər.
İndi onun izi-tozu da qalmayıb. O vaxt xəzinə boş olanda, biz kreditlər üçün müraciət edəndə heç kim bizə kredit vermirdi. Yaxşı, əgər siz Azərbaycanı bu qədər sevirsinizsə, nə üçün o vaxt bizə kömək etməmisiniz? Nə üçün ağır vəziyyətdə olan ölkəyə kömək etməmisiniz?
İndi sıra ilə düzülüblər bizə kredit vermək istəyənlər. Biz almırıq. Biz özümüz kredit veririk. Bizim xarici dövlət borcumuz ümumi daxili məhsulun 17 faizini təşkil edir. Bu göstəriciyə görə biz dünyada doqquzuncu yerdəyik. İndi istənilən məbləğdə – bax, sabah 10 milyard dollar lazım olsa, alarıq. Almırıq, qoymuram. Borcu yenə də endirirəm.
Ona görə kimsə deyəndə ki, biz Azərbaycanın yaxşılığını istəyirik, inanmayın, gənclər də inanmasınlar. Bizdən çox bizi istəyən heç vaxt olmayıb və olmayacaq».
Ağır zamanlardan danışarkən 20-ci əsrin 90-cı illərinin əvvəlləri nəzərdə tutulur ki, o vaxt Azərbaycan SSRİ-nin süqutundan sonra “ayağa qalxırdı” və eyni zamanda Ermənistanla Dağlıq Qarabağ uğrunda döyüşürdü. Həmin dövrdə ölkədə hakimiyyət tez-tez dəyişirdi və elə həmin vaxt Heydər Əliyev – İlham Əliyevin atası prezident oldu.
Hakimiyyət və müxalifət barədə:
«Əhalinin mütləq əksəriyyəti bizim siyasətimizi dəstəkləyir. Əhalinin mütləq əksəriyyəti bizə alternativ görmür və kim ola bilər bu alternativ? Hətta havadarları artıq onlardan üz döndərmişlər. Biz bunu dəqiq bilirik. Mən indi bu auditoriyada bəzi operativ məlumatları da bölüşə bilərəm sizinlə, Azərbaycan xalqı ilə.
İndi anti-Azərbaycan dairələr, xaricdəki dairələr artıq açıq deyirlər ki, bizdə ənənəvi müxalifət yoxdur, ayrı-ayrı satqın dəstələr var ki, onların da kitabı bağlanıb, onlara ümid bəsləmək olmaz. Ona görə onlara pul təminatı da azalıbdır, ona görə çabalayırlar.
Əsas hədəf gənclər olmalıdır. Onlar gəncləri əsas hədəf seçiblər və gəncləri yoldan çıxarmaq istəyirlər, onların beyinlərini zəhərləmək istəyirlər, onları xalqa qarşı, Vətənə qarşı, ənənəvi dəyərlərə qarşı qaldırmaq istəyirlər. Alınmır və alınmayacaq. Çünki Azərbaycan gəncləri vətənpərvərdir, Vətəni sevəndirlər, Vətənə bağlıdırlar».
Avropaya inteqrasiya barədə
Avropaya inteqrasiya məsələsinə İlham Əliyev kadr dəyişiklikləri mövzusundan sonra keçdi.
Ölkədə bir çox aparıcı vəzifələri onilliklər boyu öz kreslolarında oturmuş çox yaşlı adamlar tutur və heç kim onları pensiyaya yollamağa tələsmir. Ən uzağı, başqa vəzifəyə keçirirlər. Bu səbəbdən media və cəmiyyətin bir hissəsi hökuməti tənqid edir. Prezident isə bütün bunları ənənələrlə izah edir.
«Biz ənənəvi dəyərlər üzərində dövlət qururuq, böyük-kiçik var. Bunu biz qorumalıyıq, gənclər də məni eşitsinlər, daim böyük-kiçik məsələsinə fikir versinlər.
İndi bəzi ölkələrdə buna fikir verilmir. Qadınlarla kişilər arasında artıq fərq qoyulmur. Amma biz ənənəvi cəmiyyətdə yaşayırıq və yaşamalıyıq. Qadınlara hörmət etməliyik, biz onları qorumalıyıq, onları müdafiə eləməliyik. Onlar bizi yox, biz onları. Gender bərabərliyi var, biz də bunu qəbul edirik. Amma biz ənənəvi düşüncədən kənarda yaşaya bilmərik və gənc nəsil də bunu bilsin. Yaşlılara hörmət olunmalıdır, yaşına görə. …
… Sonra da bizə deyirlər ki, gəlin bizə inteqrasiya edin. Mən bir dəfə demişəm, hələ Avropada o iqtisadi böhran baş alıb gedəndə dedim ki, biz haraya inteqrasiya etməliyik, böhrana?
Haraya inteqrasiya etməliyik, “Stop İslam!” deyənlərə?
Haraya inteqrasiya etməliyik, qadınla kişi arasında fərq görməyənə?
Mən artıq daha dərinə getmək istəmirəm. Biz qətiyyən oraya inteqrasiya etməyəcəyik».
İnqilablar barədə
«2003-cü ili xatırlayaq. Prezident seçkilərindən sonra Azərbaycanda çevriliş cəhdi. Heç kimə sirr deyil ki, mən prezident seçkilərində təmiz qələbə qazanmışdım.
Çünki insanlar Heydər Əliyev siyasətinə səs vermişdilər. İğtişaş törədildi. 2005-ci il. Azərbaycan artıq o inqilabların sırasında növbəti yer kimi göstərilirdi. Belə maykalar buraxılmışdı, üzərində yazılmışdı: “Gürcüstan, Ukrayna, Qırğızıstan, Azərbaycan”.
Yəni, dördüncü biz olmalı idik və bizdən sonra da başqaları olmalı idi. Biz dayandırdıq bu vəbanı, bu xəstəliyi, bu azarı. İndi bütün dünya görür ki, bu inqilablar o ölkələrə ancaq bədbəxtlik gətirib və indi öz problemləri ilə üz-üzədirlər, orada iğtişaşlar səngimir. Çünki oralara bu zəhərli inqilab toxumu səpilmişdi».
Cəmiyyətin reaksiyası
Cəmiyyətdə bir çoxlarını prezidentin mövqeyindən daha çox, onun bu mövqeyini necə səmimi şəkildə səsləndirdiyi şok vəziyyətinə salıb.
«Bu, indiyə kimi onun səsləndirdiyi ən absurd və xaotik nitq idi. Bu nitqdə bir növ acizlik açıq-aşkar hiss olunurdu».
«Xeyli sayda vicdan məhbusunun, dini baxışlarına görə həbsxanalara düşənlərin, o cümlədən “namaz məhbusları”nın olduğu bir ölkənin prezidentinin Avropanın “Stop İslam” deməsindən xoşu gəlmir. Yeri gəlmişkən, Avropada hicabda pasporta şəkil çəkdirmək mümkündür, Azərbaycanda isə mümkün deyil».
«Dəhşətdir. O, bizi 100 il geri aparır».
«Bəsdirin əşşi… Prezidentimizi tanımırsınız? Fikir verməyin».
Hərçənd, prezidentin səsləndirdiyi mövqeyin tərəfdarları da tapılıb. Onların şərhləri bu cür səslənir:
«Azərbaycanın hər bir vətəndaşı indiki hakimiyyəti qiymətləndirməlidir. Çünki ölkəmizdə sabitlik hökm sürür, terrorçuluq yoxdur, insanlar sakitcə hərə öz işini görür. Radikal şəxslər isə özlərinin yanlış, məkrli, böhtan dolu fikirləri və sözləri ilə anti-Azərbaycan qüvvələrini dəstəkləyirlər və bunların arasında erməni lobbisi xüsusi yer tutur. Lakin bu qüvvələrin yaydığı dezinformasiya xalqa təsir edə bilməz, çünki xalq öz liderini seçib».
Qərbin ünvanına bu həmlələrin fonunda bəziləri elə həmin gün, noyabrın 26-da İlham Əliyevin Rusiya prezidenti Vladimir Putin haqqında dediyi sözləri xatırlayıb.
Rusiya Federasiyasının Baş Qərargah rəisi Valeri Gerasimovun başçılıq etdiyi nümayəndə heyətini qəbul edərkən Əliyev Putini “Dünyanın aparıcı ölkəsinin prezidenti” və “Dünyanın siyasətçiləri arasında bir nömrəli prezident” adlandırıb.
