ყოფილი ქართველი სამხედრო პატიმრობაში რჩება

საქართველოს შინაგან საქმეთა სამინისტროს სპეცრაზმის ყოფილი ვიცე-პოლკოვნიკი გია ცერცვაძე კიევის სააპელაციო სასამართლომ 40 დღიან წინასწარ პატიმრობაში დატოვა.

სასამართლო კოლეგიამ გადაწყვეტილება იმ მოტივით ახსნა, რომ პირველმა ინსტანციამ შესაბამისი დოკუმენტია სააპელაციო სასამართლოში დაგვიანებით გადაგზავნა.

გია ცერცვაძის განაჩენს მისი მეუღლე და თანამებრძოლები სააპელაციო სასამართლოში ელოდებოდნენ. სასამართლოში იმყოფებოდნენ უკრაინელი სამხედროებიც.

კიევის სააპელაციო სასამართლოს მიერ გადაწყვეტილების მიღების შემდეგ პირველი კომენტარი გია ცერცვაძის ადვოკატმა ქსენია პროკონოვამ რუსთავი 2-თან გააკეთა.

იგი აცხადებს, რომ იმედგაცრუებულია, რადგან გია ცერცვაძის ჯანმრთელობის მდგომარეობისთვის მისი პატიმრობაში დატოვება საშიშია.

„მასალების გადმოცემის დაგვიანება ნიშნავს იმას, რომ გია პატიმრობაში რჩება. სამწუხაროდ, ეს მის ჯანმრთელობასა და მის პერსპექტივაზე ცუდად მოქმედებს, რადგან ამ დროის განმავლობაში ის არ იქნება თავისი ოჯახის წევრებთან ერთად და ვერც საკუთარი უფლებების დაცვას შეძლებს”, – განაცხადა ქსენია პროკონოვამ.

სასამართლო პროცესზე იმყოფებოდა საქართველოს ყოფილი პრეზიდენტი მიხეილ სააკაშვილიც. მან სასამართლოს გადაწყვეტილება  “სამარცხვინოდ” შეაფასა.

გია ცერცვაძის საქმეზე კომენტარი საქართველოს პრეზიდენტის ადმინისტრაციაში გააკეთეს. პრეზიდენტის საპარლამენტო მდივნის ანა დოლიძის თქმით,  საქართველოს პრეზიდენტი ამ თემასთან დაკავშირებით პირველივე დღიდან საქმის კურსში იყო.

“როგორც კი ჩაითვლება საჭიროდ, უმაღლესმა მთავარსარდალმა გააკეთოს განცხადება და დააფიქსიროს საკუთარი პოზიცია ცერცვაძის საქმესთან დაკავშირებით, გარწმუნებთ, ეს პოზიცია დროულად იქნება გამოხატული”,  – განაცხადა დოლიძემ.

ცერცვაძის საქმეზე შემდეგი სხდომა კიევის სააპელაციო სასამართლოში 3 თებერვალს გაიმართება.

საქართველოს შსს-ს სპეცრაზმის ყოფილი ვიცე-პოლკოვნიკი გიორგი ცერცვაძე 15 იანვარს კიევის ჟულიანის აეროპორტში, რუსეთის მოთხოვნით დააკავეს. ცერცვაძეს, რომელიც აფხაზეთისა და 2008 წლის ომების ვეტერანია, რუსეთის ხელისუფლება 2003 წელს მომხდარ მკვლელობაში ადანაშაულებს, თუმცა მასზე საერთაშორისო ძებნა მხოლოდ 2016 წლის დეკემბერში გამოცხადდა. მისი ადვოკატის და ოპოზიცის წარმამოდგენელთა განცხადებით, ცერცვაძის პირადი მონაცემები რუსეთს საქართველოს ხელისუფლებამ გადასცა.