უცხოური ინვესტიციები რუსეთს ტოვებს, კაპიტალის გადინებამ რეკორდს მიაღწია

უცხოელ ინვესტორებს რუსული კომპანიების აქციებიდან თანხები გააქვთ. ეს ტენდენცია, უკვე ზედიზედ მეოთხე თვეა, შეინიშნება. თანხამ   1.6 მილიარდ დოლარს გადააჭარბა – ეს ბოლო სამი წლის განმავლობაში ყველაზე მაღალი მაჩვენებელია, – წერს რუსული გაზეთი „კომერსანტი“.

ექსპერტები კაპიტალის რეკორდული გადინების რამდენიმე მიზეზს ასახელებენ. ძირითადი მიზეზებია:

– აშშ-ის და რუსეთის შეუმდგარი დაახლოება;

– ნავთობის ფასების ვარდნა;

– უმსხვილეს რუსულ კომპანიებს „სისტემასა“ და „როსნეფტს“ შორის კონფლიქტი;

რუსეთსა და აშშ-ს შორის დაძაბული ურთიერთობების შენარჩუნება ამერიკული ეკონომიკური სანქციების გაგრძელებას და გამკაცრებს ნიშნავს. ეს სანქციები შეიძლება რუსეთის ბაზარზე მომუშავე ნებისმიერ კომპანიას შეეხოს.

ნავთობმომპოვებელ ქვეყნებს შორის მოპოვების შეზღუდვის თაობაზე დადებული შეთანხმების მიუხედავად, ნავთობის ფასის ვარდნა გრძელდება. ნავთობი და ბუნებრივი აირი რუსეთის ბიუჯეტის შევსების მთავარ წყაროებს წარმოადგენს.

„სისტემასა“ და „როსნეფტს“ შორის არსებულმა კონფლიქტმა ინვესტორებს დაანახა რუსული სასამართლო სისტემის სისუსტე, სადაც გადაწყვეტილებები პოლიტიკური კონიუნქტურიდან გამომდინარე მიიღება.

შედარებისთვის: იმ დროს როდესაც რუსული ბაზარი ინვესტორებისთვის მიმზიდველობას კარგავს, სხვა განვითარებადი ბაზრები იზრდება. ბოლო ოთხი თვის განმავლობაში ლიდერები აღმოჩნდნენ ინდოეთი (2.6 მილიარდი დოლარი) და ბრაზილია (1 მილიარდი).