საქართველოს შინაგან საქმეთა სამინისტრო აზერბაიჯანელ ჟურნალისტს ეძებს

აზერბაიჯანელი ჟურნალისტს აფგან მუხტარლის  მთელი საქართველოს მასშტაბით ეძებენ, – ეს ინფორმაცია საქართველოს შინაგან საქმეთა სამინისტროს წარმომადგენლებმა გაავრცელეს.

ოფიციალურ უწყებაში ამბობენ, რომ მუხტარლის დაკარგვის შესახებ დღეს მისი ოჯახის წევრებმა განაცხადეს.

აფგან მუხტარლი ერთ წელზე მეტია თბილისში ცხოვრობს. ჟურნალისტური საქმიანობიდან გამომდინარე მას აზერბაიჯანის ხელისუფლებასთან პრობლემები ჰქონდა. მუხტარლი გუშინ 29 მაისს სახლიდან გავიდა და მას შემდეგ აღარ დაბრუნებულა. სატელეფონო ზარებს კი არ პასუხობს. ბოლოს აზერბაიჯანელი ჟურნალისტი მისმა მეგობარმა საღამოს დაახლოებით 7 საათზე ნახა.

გასულ კვირას ჯემნიუსმა ვრცელი რეპორტაჟი მოამზადა აზერბაიჯანელ პოლიტდევნილებზე, რომლებიც საქართველოს აფარებენ თავს. ამ რეპორტაჟის ერთ-ერთი გმირი სწორედ აფგანი იყო. ჯემნიუსთან საუბარში ის ამბობს, რომ ბოლო 6-7 თვეა აზერბაიჯანელ ატქივისტებს საქართველოში პრობლემებს უქმნიან.