საქართველოს პარლამენტში დეპუტატს თავი გაუტეხეს

საქართველოს პარლამენტის შენობა დღეს ცხელ წერტილად იქცა. “პატრიოტთა ალიანსის”  წევრი ემზარ კვიციანი “ევროპული საქართველოს”   ლიდერს გიგა ბოკერიას დაუპირისპირდა. კვიციანმა ბოკერიას “უცხო ქვეყნის რეზიდენტი” უწოდა და შემდეგ წყლით სავსე ჭიქა და საწერკალამი ესროლა. კვიციანი უფრო შორს წასვლასაც გეგმავდა, თუმცა მანდატურებმა შეაჩერეს.

დეპუტატებს შორის სიტყვიერი დაპირისპირების შესაწყვეტად, პარლამენტის თავმჯდომარე იძულებული გახდა, სხდომაზე შესვენება გამოეცხადებინა.

კიდევ ერთი, ამჯერად – უფრო სისხლიანი ინციდენტი უკვე პარლამენტის სათათბირო ოთახში განვითარდა, სადაც ერთმანეთს მმართველი გუნდის – “ქართული ოცნების” და „ევროპული საქართველოს“ დეპუტატები დაუპირისპირდნენ.

ცოტა ხანში ამ ოთახიდან “ევროპული საქართველოს” წევრი, დეპუტატი ოთარ კახიძე თავგატეხილი გამოიყვანეს.

როგორც თვითმხილველები ჰყვებიან, კახიძეს თავისივე თანაგუნდელის – გიორგი  კანდელაკის მიერ მოქნეული საფერფლე მოხვდა. კანდელაკმა საფერფლე “ქართული ოცნების” წევრს ვანო ზარდიაშვილს დაუმიზნა, თუმცა, როგორც აღმოჩნდა, არაზუსტად.

საქართველოს პარლამენტში ჩხუბი და ფიზიკური დაპირისპირება არც ისე იშვიათი მოვლენაა, თუმცა დღევანდელი ამბავი მაინც ისტორიულია – ამ მოწვევის პარლამენტში  დეპუტატებს  ერთმანეთი ჯერ არ უცემიათ.