სააკაშვილი: შემომიშვით საქართველოში და ნახეთ ვინ მოიგებს არჩევნებს
ექს-პრეზიდენტმა მიხეილ სააკაშვილმა საქართველოს მოქმედ პრეზიდენტს გიორგი მარგველაშვილს მოუწოდა დაუბრუნოს მას საქართველოს მოქალაქეობა და მისცეს საპრეზიდენტო არჩევნებში მონაწილეობის საშუალება.
“ჩამომიშვით საქართველოში და ნახეთ ვის დახვდება მილიონობით ადამიანი და ვინ მოიგებს არჩევნებს”, – აღნიშნა სააკაშვილმა ტელეკომპანია “რუსთავი 2”-ისთვის მიცემულ ინტერვიუში.
სააკაშვილმა მარგველაშვილს მიმართა და მას ლაჩარი უწოდა, საკუთარ თავს კი – ქართული სახელმწიფოს დამფუძნებელი:
“მარგველაშვილი არის აბსოლუტური ლაჩარი. იმიტომ რომ ჯერ ჩამომართვა მოქალაქეობა, თუ ელემენტარული ვაჟკაცობა აქვს, ელემენტარული რაღაც აქვს გატოკებული, დამიბრუნოს საქართველოს მოქალაქეობა. მათ მომისაჯეს სასჯელი, ამიკრძალეს პოლიტიკურ საქმიანობაში მონაწილეობა.
სამწუხაროდ, არასამთავრობო ორგანიზაციები გაიყუჩნენ, სად არის ეს ხალხი? რატომ არ იღებს ხმას, რომ ქართული სახელმწიფოს დამფუძნებელს არ უშვებენ საქართველოში?”, – განაცხადა მიხეილ სააკაშვილმა.
მისი თქმით, საქართველოში დაბრუნების შემთხვევაში ის აუცილებლად მოიგებს საპრეზიდენტო არჩევნებს:
“არაფერი არ მაქვს ცარიელი ხელების და ჩემი რეპუტაციის გარდა. შემომიშვით საქართველოში და განახებთ ვისი ეშინიათ და ვისით დააშინებენ ხალხს, შემომიშვით და მერე ვნახოთ, ვინ მოიგებს არჩევნებს”, – განაცხადა მან.
• საქართველოს მესამე პრეზიდენტმა მიხეილ სააკაშვილმა საქართველო 2013 წელს, მეორე საპრეზიდენტო ვადის ამოწურვის შემდეგ დატოვა და მას შემდეგ არ ჩამოსულა. სამშობლოში დაბრუნების შემთხვევაში მას პატიმრობა ელის.
2014 წელს უკრაინის პრეზიდენტმა პეტრო პოროშენკომ მიხეილ სააკაშვილს უკრაინის მოქალაქეობა მიანიჭა და ოდესის გუბერნატორად დანიშნა. 2016 წელს, ამ თანამდებობიდან გადადგომისა და პოროშენკოსთან კონფლიქტის შემდეგ, სააკაშვილმა უკრაინაში ოპოზიციური პარტია შექმნა და პოროშენკოს წინააღმდეგ დაიწყო ბრძოლა, რის გამოც ამ ქვეყანაში დიდი პრობლემები შეექმნა. სააკაშვილს უკრაინის მოქალაქეობა ჩამოართვეს და 2018 წლის თებერვალში ქვეყნიდან გააძევეს. უკრაინაში მის წინააღმდეგ სისხლის სამართლის საქმეა აღძრული.
ამჟამად სააკაშვილი ჰოლანდიაშია. ის ამბობს, რომ გააგრძელებს ბრძოლას უკრაინასა და საქართველოში ოლიგარქიული მმართველობის წინააღმდეგ.
საქართველოში სააკაშვილის წინააღმდეგ სისხლის სამართლის საქმე ოთხ ეპიზოდზეა აღძრული – სამსახურეობრივი მოვალეობის ბოროტად გამოყენება; მშვიდობიანი მიტინგის დარბევა და ტელევიზიაში შეჭრა; დეპუტატის ცემა და საბიუჯეტო თანხების გაფლანგვა.
ბოლო ერთი წლის განმავლობაში იგი ორჯერ გაასამართლეს:
2018 წლის იანვარში სასამართლომ მას სამწლიანი პატიმრობა მიუსაჯა ბანკის თანამშრომლის, სანდრო გირგვლიანის მკვლელების შეწყალებისთვის.
28 ივნისს კი, სასამართლომ სააკაშვილი დამნაშავედ სცნო დეპუტატ ვალერი გელაშვილის ცემის ორგანიზებაში და მას ექვსწლიანი პატიმრობა მიუსაჯა. სააკაშვილი ამბობს, რომ სასამართლო პოლიტიკურად მოტივირებული იყო და მას “ვალერი გელაშვილის საქმესთან იმდენივე კავშირი აქვს, რამდენიც კენედის მკვლელობასთან”.
