როგორ ავცდეთ თაღლითობას ბაქოში სამსახურის ძებნისას

წესი N1 – ყურადღებით წაიკითხეთ განცხადება

თუკი არაფრის კეთებაში მაღალ ხელფასს გთავაზობენ, ფრთხილად იყავით; ასეთ მახეებს პარფიუმერული, ან მედიკამენტების ქსელები აგებენ. არ დაგავიწყდეთ ფინანსური პირამიდებიც. თუ ასეთ განცხადებას გამოეხმაურებით, იცოდეთ, რომ აუცილებლად მოგთხოვენ პირველად შენატანს, იმისთვის, რომ კომპანიის აქციონერი გახდეთ. ამ შენატანის გამომუშავებასა და უკან დაბრუნებას კი მხოლოდ განსაკუთრებულად იღბლიანები ახერხებენ. იცოდეთ, რომ ეს ფული წყალს გაატანეთ.

წესი N2 – არ მოაწეროთ ხელი კაბალურ ხელშეკრულებას

კლიენტებისთვის სამსახურის ძებნაზე ორიენტირებული ნებისმიერი ფირმა თქვენთან აფორმებს ხელშეკრულებას, რომელსაც უნდა ერთვოდეს გადასახადების გადამხდელის საიდენტიფიკაციო ნომერი. ამ კოდს აზერბაიჯანულად “VÖEN” ეწოდება. გარდა ამისა, კონტრაქტში აუცილებლად უნდა იყოს მითითებული ვადა, რომლის ფარგლებშიც, ფირმა ვალდებული იქნება, გიშოვოთ სამსახური. ეს პერიოდი შეიძლება სამი თვეც იყოს და ერთი წელიც. მოკლედ, რაც უფრო კონკრეტულია ინფორმაცია, მით უკეთესი. მთავარია, აბსტრაქტულ დოკუმენტებს არ მოაწეროთ ხელი.

წესი N3 – მოიძიეთ საჭირო ცნობები

საძიებო სისტემაში ჩაწერეთ კომპანიის სახელი. ზოგჯერ ეს სავსებით საკმარისია იმისთვის, რომ აფერისტები აღმოვაჩინოთ. კომპანიის გახსნა, ფულის შეგროვება და “მომსახურების” გაწევისთვის თავის არიდება თაღლითების აპრობირებული მეთოდია. ეძებეთ ისეთი კომპანია, რომელსაც კარგი რეპუტაცია, ან მომხმარებელთა დადებითი გამოხმაურებები აქვს. ყველაფერს აჯობებს, რომ ასეთი დადებითი შეფასება თქვენი რომელიმე ნაცნობისგან მოისმინოთ.

წესი N4 – ნუ გადაიხდით წინასწარ

აუცილებლად მოგთხოვენ, წინასწარ გადაიხადოთ: რეგისტრაციისთვის, ანკეტისთვის, კონტრაქტის შედგენისთვის და, რა თქმა უნდა, საკუთრივ ვაკანსიისთვის. ნუ იჩქარებთ. უმჯობესი იქნება, თუკი ფულს მხოლოდ მას შემდეგ გადაიხდით, როდესაც რაიმე კონკრეტულ სამსახურს მოგიძებნიან. თუ ასე არ გამოვა და მაინც მოგიწევთ წინასწარ გადახდა, აუცილებლად შეინახეთ ჩეკი.