რა ვიცით შეკვეთილ მკვლელობაზე, რომელიც უკრაინაში მზადდებოდა და საქართველოში უნდა შესრულებულიყო

ქართველმა სამართალდამცავებმა შეკვეთილი მკვლელობა აღკვეთეს.

ბოლო ორ დღეში საქართველოსა და უკრაინაში ჩატარებული სპეცოპერაციების შედეგად ჯამში შვიდი ადამიანია დაკავებულია – ექვსი ბათუმში, ერთი – ხარკოვში.

სამი მათგანი, ხარკოვში დაკავებული უკრაინის მოქალაქის ჩათვლით, თბილისში მცხოვრები ქართველი კრიმინალური ავტორიტეტების – ძმები ფეიქრიშვილების (რომლებიც ცნობილი არიან როგორც “ავლაბრელი ტყუპები”) მოკვლას გეგმავდნენ.

დანარჩენი ოთხი კი, ასაფეთქებელი ნივთიერების “ტროტილის” უკანონო შეძენა-შენახვა-გასაღების ბრალდებით არიან დაკავებული.

ბათუმში დაკავებულთა შორის აჭარის ყოფილი ლიდერის, ასლან აბაშიძის დაცვის წევრები არიან.

შეკვეთილი მკვლელობის მომზადების საქმეზე ბრალდებულ ექვსივე პირს – ნუგზარ ბეჟანიძეს, გოჩა თადუმაძეს, გიორგი ბიბილაურს, ბექა ცინცაძეს, როლანდ ბერიძესა და იური მჟავანაძეს აღკვეთის ღონისძიების სახით პატიმრობა შეეფარდა.

• მოიმატა თუ არა დანაშაულმა საქართველოში?

• მოსაზრება: „კრიმინალური აფხაზეთი – როგორ მივიღეთ ის?“

გავრცელებული ოპერატიული ინფორმაციის თანახმად, შეკვეთილი მკვლელობა უკრაინაში იგეგმებოდა.

ძმები ფეიქრიშვილები თბილისში უნდა მოეკლათ. იგეგმებოდა მათი აფეთქება. ფეიქრიშვილების ადვოკატი ამბობს, რომ ძმების აფეთქება სხვადასხვა ადგილას იგეგმებოდა და ერთ-ერთი ლოკაცია იყო ის ადგილი, სადაც ერთ-ერთი ძმა ოჯახთან ერთად უნდა ყოფილიყო.

დაკავებულთაგან საქართველოს ორი მოქალაქე და უკრაინის ერთი მოქალაქე მკვლელობას უშუალოდ გეგმავდნენ. დანარჩენი ოთხი კი მათ ასაფეთქებელი ნივთიერების შეძენაში ეხმარებოდნენ.

უკრაინის მოქალაქე, რომელიც ხარკოვში დააკავეს, მკვლელობის შემსრულებელი უნდა ყოფილიყო. ამისთვის მას 20 ათას დოლარს უხდიდნენ.

ჯერჯერობით გამოძიება პირდაპირ არ ამბობს, ვინ იყო მკვლელობის დამკვეთი. თუმცა, საქმის პროკურორმა გიორგი კავსაძემ უკვე ახსენა გავლენიანი ქართველი კრიმინალური ავტორიტეტის – ვახტანგ (ვატო) ყიფიანის სახელი.

კავსაძის თქმით, გამოძიების ხელთ არსებული ინფორმაციით, ასაფეთქებელი მოწყობილობა, რომელიც ამოღებულია გამოძიების მიერ, სწორედ ყიფიანის დაკვეთით მზადდებოდა და ეს საქმეში არსებული მოწმეთა ჩვენებებით, ასევე სხვა მტკიცებულებებით დასტურდება.

პროკურორის თქმით, ამ ეტაპზე გამოძიება მკვლელობის მოტივს იკვლევს. კავსაძე აღნიშნავს, რომ ქართველი სამართალდამცავები ამ საქმეზე უკრაინელ კოლეგებთან ერთად მუშაობენ.

მკვლელობის სავარაუდო დაკვეთად ვატო ყიფიანს ასახელებენ ქართველი ჟურნალისტებიც. ისინი იხსენებენ კრიმინალურ ისტორიებს, რაც მიუთითებს იმაზე, რომ ძმები ფეიქრიშვილები და ყიფიანი ერთმანეთთან დაპირისპირებულ კრიმინალურ კლანებს წარმოადგენენ.

ყიფიანი წლებია საქართველოში არ ცხოვრობს. პატიმრობიდან ის 2008 წელს, აგვისტოს ომის შემდეგ, უდოს წესით გაათავისუფლეს.

კანონთან მიმართებაში უმწიკვლო რეპუტაცია არც ტყუპ ძმებს, ფეიქრიშვილებს აქვთ. ორივე ძმა ფიგურირებს ბოლო წლების ყველაზე გახმაურებულ კრიმინალურ საქმეებში.

გიორგი ფეიქრიშვილი 2016 წელს იარაღის უკანონოდ ფლობის გამო იყო დაკავებული. მისი დაკავება ვაკეში მომხდარ სისხლიან გარჩევას უკავშირდება, რა დროსაც კრიმინალური ავტორიტეტი სოსო ჯოხაძე მოკლეს. ქართული მედიის ცნობით, ძმებ ფეიქრიშვილებს  ჯოხაძეების დაჯგუფებასთან ღია კონფლიქტი ჰქონდათ. ჯოხაძეები ყიფიანის მეგობრები იყვნენ. სოსო ჯოხაძის მკვლელი ბადრი ნათობაძე კი, ფეიქრიშვილების ახლო მეგობარია.

მეორე ძმის, დავით ფეიქრიშვილის სახელი კიდევ ერთ გახმაურებულ საქმეს, ე.წ. “მაზავშიკების” საქმეს უკავშირდება. მაშინ, 2010 წლის მსოფლიო ჩემპიონატის დროს დაიჭირეს ცნობილი ფეხბურთელი გიორგი დემეტრაძე და კიდევ რამდენიმე პირი.

ისინი არალეგალურ ბუკმეიკერობას, ე.წ. “მაზავშიკობას” ეწეოდნენ. მოგებული ფული “კანონიერი ქურდების” დახმარებით “ამოჰქონდათ” და ნაწილს ე.წ. “ქურდულ ობშიაკში” აგზავნიდნენ. მაშინ ფეიქრიშვილმა აღიარა ამ სქემაში მონაწილეობა და მასთან საპროცესო შეთანხმება გაფორმდა.