ოპოზიციის მიტინგი ბაქოში: რას ითხოვენ დემონსტრანტები?

ბაქოში ოპოზიციის მიტინგი გაიმართა, რომელსაც, სულ ცოტა, 3 000 ადამიანი დაესწრო. მომიტინგეთა პლაკატებზე  გამოსახული ლოზუნგებით თუ ვიმსჯელებთ, ხალხი ითხოვს:

1. განათლების სისტემის რეფორმირებას
2. პოლიტპატიმრების გათავისუფლებას (პლაკატებზე არაერთი სახელი მოჩანდა – მ.შ. ექსტრემიზმის ბრალდებით გასამართლებული რელიგიური მოღვაწეების, მცირე ხნის წინ დაპატიმრებული ბლოგერის, მეჰმან ჰუსეინოვის, მოძრაობა „რე-ალის“ ლიდერის, ილგარ მამედოვისა და მრავალი სხვა აქტივისტის).
3. სოცუზრუნველყოფის საკითხების გადაწყვეტას და კორუფციის დამარცხებას.

პარტია „აზერბაიჯანის სახალხო ფრონტის“ ლიდერმა, ალი ქერიმლიმ კი ქვეყნის ყველა პრობლემა ახსენა – მ.შ. ხელისუფლების გადაცემის დელიკატური საკითხიც. “უკვე მრავალი წელია, რაც ქვეყნის ხელისუფლების სათავეში ერთი ოჯახი იმყოფება”, – თქვა ქერიმლიმ

JAMnews-ის კორესპონდენტი მიტინგის მონაწილეებს გაესაუბრა, იმისათვის, რათა გაერკვია, თუ რამ უბიძგა თითოეულ მათგანს პროტესტის გამოხატვისკენ.