ლუკაშენკო: მოძმე უკრაინა დამოუკიდებლობისთვის იბრძვის

„მოძმე უკრაინა“ ახლა თავისი დამოუკიდებლობისთვის იბრძვის. ამის შესახებ ბელარუსის პრეზიდენტმა ალექსანდრ ლუკაშენკომ 26 იანვარს,  მეციერებისა და პედაგოგიკის მუშაკებისთვის დოქტორის დიპლომებისა და პროფესორის ატესტატების გადაცემის ცერემონიაზე განაცხადა.

როგორც ბელარუსის პრეზიდენტის ოფიციალურ ვებგვერდზე გამოქვეყნებულ ინფორმაციაშია ნათქვამი, ლუკაშენკომ ქვეყნის წინაშე მდგომ  პრობლემებზე ისაუბრა. „ჩვენ დამოუკიდებლობა ძალიან ადვილად გვერგო: ყველა ერმა იომა, დღეს მოძმე უკრაინა იბრძვის. ჩვენ ომი არ უნდა დავუშვათ. ჩვენ მშვიდობისმოყვარე ერი ვართ“, – განაცხადა ლუკაშენკომ.

მისი თქმით, ბელარუსს დამოუკიდებლობის შესანარჩუნებლად  მრავალი სიძნელის გადალახვა უწევს.

„ამ ყველაფრის გადალახვას მხოლოდ გაერთიანებით შევძლებთ. და, მადლობა ღმერთს, დამოუკიდებლობისთვის ბრძოლის მთავარი მიმართულება ეკონომიკაზე გადის – არა სამხედრო, და არა პოლიტიკურ სფეროზე“, – თქვა ალექსანდრ ლუკაშენკომ.

უკრაინის აღმოსავლეთში საბრძოლო მოქმედებების დაწყებისთანავე ბელარუსის მეთაური ცდილობდა, შეენარჩუნებინა  ნეიტრალიტეტი და კარგი ურთიერთობა როგორც რუსეთთან, ისე უკრაინასთან. ლუკაშენკო არის  მინსკის მოლაპარაკებათა ფორმატის ინიციატორი, რომელშიც რუსეთის, უკრაინის, გერმანიისა და საფრანგეთის ლიდერები მონაწილეობდნენ. ამ მოლაპარაკებების ფარგლებში, 2015 წლის თებერვალში მიღწეულია მინსკის შეთანხმება ცეცხლის შეწყვეტისა და კონფლიქტის დარეგულირების შესახებ.